သျှမ်းပြည် နမ့်ခမ်းမြို့ တအာင်း(ပလောင်)အမျိုးသားလွတ်မြောက်ရေးတပ်မတော် (TNLA) မှဦးဆောင်ကျင်းပသည့် သင်္ကြန်ပွဲတော်နေရာတွင် ယနေ့ (ဧပြီ ၁၅)ရက် ညနေ ၄နာရီဝန်းကျင်၌ ပေါက်ကွဲမှု ဖြစ်ပွားခဲ့ကြောင်း သတင်းရရှိသည်။
နမ့်ခမ်းမြို့ TNLA ဦးဆောင်ပြီး မြို့လယ်ဘုရားကြီးပွဲတော်ဝင်း (ပန်ပွဲ)ရှိ ဗဟိုမဏ္ဍပ်ပွဲစင်နေရာတွင် ယနေ့ (ဧပြီ ၁၅)ရက် ညနေ ၄နာရီဝန်းကျင်၌ ပေါက်ကွဲမှုဖြစ်ပွားသော်လည်း လူထိခိုက်မှုမရှိကြောင်း နမ့်ခမ်းဒေသခံ အမျိုးသား တစ်ဦးက သျှမ်းသံတော်ဆင့်ကိုပြောသည်။
“ လူစည်ကားတဲ့ သင်္ကြန်ပွဲကျင်းပတဲ့နေရာမှာ ပေါက်ကွဲမှုဖြစ်တာ။ လူထိခိုက်မှုတော့မရှိဘူး။ အဲ့နားက လှကျော်တည်းခိုခန်းကတော့ နည်းနည်းထိသွားတယ်။ ကားတစ်စီးရဲ့မှန်ထိတယ်။ လူတွေကတော့ လန့်သွားကြတောပေါ့။ ဘာကြောင့် ဘယ်သူလာလုပ်လဲဆိုတာ မသိရသေးဘူး” ဟု ၎င်းအမျိုးသားက ဆိုသည်။
အဆိုပါ ပေါက်ကွဲမှု ဖြစ်ပွားသည့် ဗဟိုမဏ္ဍပ်နေရာတွင် TNLA တပ်သားများ လုံခြုံရေး တင်းကြပ်စွာနေရာယူထားသည့် နေရာဖြစ်ကြောင်း၊ ထို့ပြင် သင်္ကြန်ပွဲကို လာရောက်သည့်ပြည်သူများလည်း စည်းကားနေချိန် ရုတ်တရက် ပေါက်ကွဲမှုကြောင့် လူများထိတ်လန့်မှုဖြစ်ပွားခဲ့ကြောင်း သင်္ကြန်ပွဲတော်ကျင်းပသည့်နေရာအနီးတွင် နေထိုင်သည့် အမျိုးသမီး တစ်ဦးက သျှမ်းသံတော်ဆင့်ကိုပြောသည်။
“ တကယ်တော့ စစ်ရေးတွ မငြိမ်သက်သေးတဲ့အချိန်မှာ သင်္ကြန်ပွဲတော်ကို မကျင်းပသင့်တဲ့အချိန်ပါပဲ။ TNLA က လုံခြုံရေးတင်းကြပ်တဲ့ကြား ဒီလိုပေါက်ကွဲမှု ဖြစ်တာ စဥ်းစားစရာပါပဲ။ ဘယ်သူက လာပြီးပစ်လဲတော့မသိဘူး။ ပြည်သူတွေ သွားလည်ရင်လည်းသတိဝိရိယရှိဖို့လိုပါတယ်” ဟု ၎င်းအမျိုးသမီးက ပြောသည်။
TNLA ဦးဆောင်ကျင်းပသည့် နမ့်ခမ်းမြို့ သင်္ကြန်ပွဲတော်ကိုဒေသခံများက လုံခြုံရေးအရ ယခင်ကတည်းက စိုးရိမ်ခဲ့ကြောင်း၊ နိုင်ငံရေး မတည်ငြိမ်သည့်အချိန် ကျင်းပသည့်အတွက် ဒေသခံများအနေဖြင့် သတိရှိရှိဖြင့် လည်ပတ်ရန်လိုအပ်ကြောင်း နမ့်ခမ်း ဒေသခံ အသက် ၅၀အရွယ်ရှိ အမျိုးသားတစ်ဦးက ထပ်လောင်းပြောသည်။
“ ပွဲက တော်တော်စည်တာ၊ ပေါက်ကွဲတဲ့နေရာကလည်း ပွဲမဏ္ဍပ်စင်ဆိုတော့လန့်တာပေါ့။ ရပ်ကွက်တိုင်းကို သင်္ကြန်အကတစ်မျိုးစီ သွားကရတော့ အဲ့မှာက အကရော လာကြည့်တဲ့သူရော များတယ်၊ ပွဲစလုပ်မယ်ပြောကတည်းက စိတ်ထဲမှာတော့ စိုးရိမ်ပြီးသားပါ။ ဒီနေ့ ပေါက်ကွဲမှုက လူမထိပေမယ့် ကြောက်တော့ကြောက်တယ်” ဟု အထက်ပါ ပုဂ္ဂိုလ်က ဆိုပြန်သည်။
နမ့်ခမ်းမြို့တွင် သင်္ကြန်ပွဲတော် ကျင်းပမည့် မြို့လယ်ဘုရားကြီး ပွဲတော်ဝင်းရှိ ညဈေးတန်းတွင် ဖွင့်လှစ်ရောင်းချနေသည့် ဈေးဆိုင်များထံမှ အခွန်ကောက်ခံနိုင်ရန်အတွက် မတ်လအတွင်းက တအာင်း(ပလောင်)တပ်ဖွဲ့ TNLA မှ ဈေးသည်များနှင့် အစည်းအဝေးပြုလုပ်ခဲ့ရာ ညှိနှိုင်းမှု အဆင်မပြေခဲ့ကြောင်း နမ့်ခမ်းမြို့ ဈေးသည်များက ပြောဆိုသည်။
Leave a Comments