သျှမ်း-ကရင်နီ (ကယား) ပြည်နယ်စပ်ဒေသ လွိုင်ကော်မြို့နယ် လွိုင်လင်လေးကျေးရွာအုပ်စုရှိ စစ်ဘေးရှောင်များသည် ဆေးဝါးနှင့် စားနပ်ရိက္ခာရရှိရေးအတွက် တောင်ကြီးမြို့အထိ သွားရောက်ဝယ်ယူရပြီး ကားခကို တစ်ယောက် ကျပ် ၂ သိန်းအထိ ပေးဆောင်ရကြောင်း စုံစမ်းသိရသည်။
ယခင်က လွိုင်လင်လေးရွာမှ တောင်ကြီးမြို့သို့ ကားခကို တစ်ယောက်ကျပ် ၃ သောင်းအထိ ပေးဆောင်ရသော်လည်း ဆီဆိုင်မြို့နယ်မှာ တိုက်ပွဲဖြစ်ပွားလာပြီးနောက် လမ်းကြောင်းများ ပိတ်ဆို့သွားသောကြောင့် တောလမ်းများကို အသုံးပြုပြီး သွားလာရာ ကားခ တစ်ယောက် ကျပ် ၂ သိန်းအထိ မြင့်တက်လာကြောင်း လွိုင်လင်ကျေးရွာအုပ်စုရှိ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။
“အရင်တုန်းကတော့ ကျမတို့က နန်းတုတ်မှာ သွားဝယ်ရတယ်။ အခုနန်းတုတ်ဘက်မှာလည်း တိုက်ပွဲတွေ ထပ်ဖြစ်တော့ သွားလို့မရတော့ဘူး။ လွိုင်ကော်မြို့ကိုထဲကိုလည်း ဝင်လို့မရဘူး။ ဆီဆိုင်မြို့ကိုလည်း ဝင်လို့မရဘူး။ အခုကဘယ်ကိုသွားရလဲဆိုတော့ တောင်ကြီးမြို့အထိကို သွားရတယ်။ အရင်က ကားခ ၂ သောင်းကနေ ၃ သောင်းပေးရတယ် ဆိုပေမဲ့အခုနောက်ပိုင်း လမ်းတွေကမဖွင့်တော့ တောလမ်းကနေသွားရတာ ကားခ ကျပ် ၂ သိန်းအထိ ပေးရတယ်” ဟု ၎င်းက ပြောသည်။
ထို့အပြင် တောင်ကြီးမြို့မှ လွိုင်လင်ကျေးရွာသို့ ပြန်လာရန်အတွက်လည်း ကားရှားပါးသောကြောင့် တောင်ကြီးမြို့တွင် ၂ ညခန့်အိပ်ပြီးမှသာ ပြန်လာရကြောင်း ဆိုသည်။
လက်ရှိတွင် သျှမ်း-ကရင်နီ (ကယား) ပြည်နယ်စပ်တလျှောက်ရှိ ဒေသခံများအပါအဝင် စစ်ဘေးရှောင်များသည် ဘေးပတ်ပတ်လည် ကျေးရွာအနီးတဝိုက်တွင် တိုက်ပွဲများဖြစ်ပွားနေသောကြောင့် ထွက်ပေါက်ပိတ်နေသည့် အခြေအနေများရောက်ရှိနေပြီး စားနပ်ရိက္ခာနှင့် ဆေဝါးပြတ်လပ်မှု အခြေအနေနှင့် ကြုံတွေ့နေရသည်ဟု ပိန်းချစ်ရွာခံတစ်ဦးက ပြောသည်။
“တချို့နာတာရှည်ရောဂါသည်တွေက အမြဲတမ်းဆေးသောက်ရတာလေ။ ဆေးပြတ်သွားလို့မဖြစ်ဘူး။ အဲ့ကြောင့် သူများတောင်ကြီးတက်ရင် ဆေးမှာရတယ်။ သုံးလစာအတွက်ဆိုပြီး ဝယ်စုထားရတယ်။ ဒီဘက်မှာလည်း အလှူရှင်တွေ မရောက်တော့အရမ်းခက်ခဲတယ်။ ပြီးတော့ ဖုန်းလိုင်းတွေလည်းမရဘူး။ တချို့ပိုက်ဆံရှိရင်တော့ တောင်ကြီးမြို့မှာ အိမ်ငှားပြီးနေကြတယ်။ တချို့တဲ့လူတွေတချို့ကျတော့လည်း ရွာမှာ၊ အိမ်မှာ ပြန်လာနေရတာပေါ့” ဟု ပြောသည်။
စစ်ဘေးရှောင်များအနေဖြင့် ဆေးဝါးနှင့် စားနပ်ရိက္ခာအတွက် တောင်ကြီးမြို့အထိ သွားရောက် ဝယ်ယူသော်လည်း ပြည်ထောင်စုလမ်းမတလျောက်ရှိ စစ်ကောင်စီစစ်ဆေးရေးဂိတ်၌ မှတ်ပုံတင် အမှတ် ၂/ ကိုင်ဆောင်သူများ တင်းကြပ်စစ်ဆေးခံရခြင်းကြောင့် သွားလာရန်အတွက် စိတ်မလုံခြုံကြောင်း ဒေသခံများက ပြောသည်။
