သျှမ်းပြည် လားရှိုးမြို့တွင် ဖယောင်းတိုင်မီးကြောင့် နေအိမ်တစ်လုံး မီးလောင်ပျက်စီးခဲ့ကြောင်း စုံစမ်းသိရသည်။
ယမန်နေ့ (ဧပြီလ ၈ ရက်) ည ၇ နာရီခန့်တွင် လားရှိုးမြို့ ရပ်ကွက်(၅) ခိုင်ရွှေဝါလမ်းရှိ နေအိမ်တစ်လုံးတွင် ဖယောင်းတိုင်မီးကို အောက်ခံခွက်မပါဘဲ ထွန်းထားရာမှ ငါးထပ်သားကို မီးကူးစက်ပြီး နေအိမ်မီးလောင်ကျွမ်းခဲ့ကြောင်း လားရှိုးဒေသခံများက ပြောသည်။
“မီးလောင်တာကတော့ လူနေအိမ်ပါ။ အပေါ်ထပ်ကတော့ ငါးထပ်ပြား ခင်းထားတော့ စလောင်တာ၊ သူက သုံးထပ်ပြားပေါ်မှာ အောက်ခံခွက် မထားဘဲ ဖယောင်းတိုင်မီး ထွန်းပြီး ရှေ့မှာ မုန့်သွားဝယ်တာ။ အောက်ထပ်ကတော့ သိပ်မလောင်လိုက်ဘူး။ မီးပျက်တော့ မှောင်လို့ အိမ်မှာ ဖယောင်းတိုင်မီးထွန်းတာ”ဟု မီးငြိမ်းသတ်ပေးခဲ့သည့် လူမှုကူညီရေးအသင်းဝင်တစ်ဦးက သျှမ်းသံတော်ဆင့်ကို ပြောသည်။
လားရှိုးမြို့တွင် ဖယောင်းတိုင်မီးမှတဆင့် မီးကူးစက် လောင်ကျွမ်းခဲ့သည့် နေအိမ်ကို မီးသတ်တပ်ဖွဲ့နှင့် ပရဟိတ လူမှုကူညီရေးအသင်းများက ဝိုင်းဝန်း၍ မီးငြိမ်းသတ်နိုင်ခဲ့ရာ အခြားနေအိမ်များသို့ ကူးစက်ခဲ့ခြင်းမရှိဘဲ လူထိခိုက်မှု မရှိကြောင်း သိရသည်။
အဆိုပါ မီးလောင်ကျွမ်းမှုကြောင့် နှစ်ထပ်အုတ်ညှပ် နေအိမ်တစ်လုံး ပျက်စီးခဲ့ပြီး ဆုံးရှုံးမှုတန်ဖိုးမှာ ကျပ်ငွေ ၁၁ သိန်းခန့် ရှိကြောင်း ၎င်းလားရှိုးဒေသခံက ဆက်ပြောသည်။
“ညအိပ်ရင် ဖယောင်းတိုင်မီးတွေ၊ ခြင်ဆေးခွေတွေ ထွန်းပြီး မအိပ်ကြဖို့ပေါ့။ မီးကို အချိန်ပို မသုံးဖို့ပေါ့။ ဥပမာ – မနက်ခင်းဆို ၅ နာရီကနေ ၁၀ နာရီလောက်နဲ့ ညဘက်ဆိုလဲ ထမင်းဟင်း ချက်ပြီးတာနဲ့ မီးကို သေချာငြိမ်းဖို့ လိုတာပေါ့။ ကျန်တဲ့အချိန်တွေ မီးမသုံးဖို့ အဲ့လိုမျိုး သတိပေးချင်တာပေါ့”ဟု လားရှိုးမြို့ဒေသခံ ၎င်းလူမှုကူညီရေးအသင်းဝင်က သျှမ်းသံတော်ဆင့်ကို ပြောသည်။
အလားတူ ဧပြီလ ၆ ရက်နေ့၌ ကွတ်ခိုင်မြို့နယ် ဟိုပုံကျေးရွာတွင် မိဘအုပ်ထိန်းသူများ အလုပ်သွားနေစဉ် နေအိမ်တွင် ကျန်ရှိခဲ့သည့် ကလေးငယ်များမှ မီးခြစ်ဆော့ကစားရာမှ နေအိမ်တစ်ခုလုံး မီးလောင်ပြာကျခဲ့ကြောင်း ဒေသခံများထံမှ သိရသည်။
ပြီးခဲ့သည့် မတ်လ ၁၉ ရက်ကလည်း ကျောက်မဲမြို့၊ ရပ်ကွက်(၂) မန်နား ရှိ စစ်ဘေးရှောင် မိသားစုများ ငှားရမ်းနေထိုင်သည့် နေအိမ်တန်းလျားနှင့် အဝတ်အထည်ဆိုင်၊ ဆိုင်ကယ်ပြင်ဆိုင်များ ဖွင့်လှစ်ထားသည့် နေအိမ်တန်းလျား ၂ လုံးတို့ လျှပ်စစ်မီး ဝါယာရှော့ခ်ကြောင့် မီးလောင်ပျက်စီးသွားကြောင်း ကျောက်မဲဒေသခံများက ပြောသည်။
လက်ရှိတွင် နွေရာသီကာလ ရောက်ရှိလာခြင်းနှင့်အတူ သျှမ်းပြည်တွင် အပူချိန်များ စံချိန်တင် မြှင့်တက်နေပြီး ရေရှားပါးမှု ပြဿနာများနှင့်လည်း ရင်ဆိုင်နေရခြင်းကြောင့် မီးဘေးအန္တရာယ် ကြိုတင်ကာကွယ်နိုင်ရန် စနစ်တကျဖြင့် သတိထားသုံးစွဲရန် လိုအပ်သည်။
