သျှမ်းပြည်အရှေ့ပိုင်း မိုင်းယောင်းမြို့ရှိ “ဧဝရတ်”ရွှေဆိုင် ဓားပြတိုက်ခံရပြီး ဆိုင်ရှင်သေနတ်ပစ်ခံရ၍ အမျိုးသမီးတစ်ဦး ပွဲချင်းပြီး သေဆုံးခဲ့ကြောင်း စုံစမ်းသိရသည်။
ယနေ့ (ဧပြီလ ၈ ရက်) မွန်းလွဲ ၂ နာရီခွဲခန့်တွင် မိုင်းယောင်းမြို့ ရပ်ကွက်(၈) ဟိုခိုရပ်ရှိ ဈေးအနီး ဖွင့်လှစ်ထားသည့် “ဧဝရတ်”ရွှေဆိုင်ကို အမည်မသိ သေနတ်ကိုင်ဆောင်သူ လူငယ် (၄) ဦးက ဆိုင်ကယ်ဖြင့် ရောက်ရှိလာပြီး အနီးပတ်ဝန်းကျင်ကို သေနတ်ပစ်ခတ် ခြိမ်းခြောက်၍ ဆိုင်အတွင်းရှိ ရွှေထည်ပစ္စည်းများကို ဓားပြတိုက် လုယူသွားခဲ့ကြောင်း မိုင်းယောင်းမြို့ ဒေသခံများက ပြောသည်။
“ဆိုင်ကယ်နှစ်စီးနဲ့ အားလုံး ၄ ယောက်လာတာ မျက်နှာတောင် မအုပ်ထားဘူး။ ဆိုင်ရှင်လည်း အဝတ်ဆိုင်နောက်မှာ ဝင်ပုန်းတာတောင် လိုက်ပစ်ခံရပြီး ခြေထောက်ကို သေနတ်ကျည် မှန်သွားတယ်။ မိန်းကလေးတစ်ယောက်က အိမ်မှာနေရင်း သွားကြည့်မိတာ၊ သေနတ်ပစ်ခံရပြီးတော့ ဆုံးသွားတယ်။ ရွှေထည့်ထားတဲ့ ကတ္တပါဗန်း ၃ ဗန်း ပါသွားတယ်”ဟု မိုင်းယောင်းမြို့မှ ဖြစ်စဉ်သိရှိသူ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
မိုင်းယောင်းမြို့တွင် ရွှေဆိုင်ဓားပြတိုက်မှု ကျူးလွန်သူများသည် လမ်းမပေါ် သေနတ် ရမ်းသမ်းပစ်ခတ်မှုကြောင့် အသက် ၃၀ နှစ်ဝန်းကျင်ရှိ နန်းခမ်းမွန်း ဆိုသူ အမျိုးသမီးမှာ ဝမ်းဗိုက်ထိမှန်၍ ပွဲချင်းပြီး သေဆုံးသွားခဲ့ရကြောင်း မိုင်းယောင်းမြို့ ဒေသခံများထံမှ သိရသည်။
“ဆုံးသွားတဲ့တစ်ယောက်က ရွှေဆိုင်က မဟုတ်ဘူး၊ ဘေးအိမ်မှာ ဖိနပ်ဆိုင်ဖွင့်တဲ့ အမျိုးသမီးလေး။ သူက သမီးလည်း ၂ ယောက်ရှိတယ်၊ တစ်ယောက်က လသားအရွယ် နို့စို့ကလေးပဲ ရှိသေးတာ။ ဓားပြ ၄ ယောက်လုံးက သေနတ်ကိုင်ပြီး လမ်းပေါ်ထွက်လာတဲ့ လူတွေကို လျှောက်ပစ်တော့ သူ့ကို သေနတ်ကျည်ဆံ မှန်သွားတာ” မိုင်းယောင်းမြို့မှ ၎င်းဒေသခံ အမျိုးသမီးက သျှမ်းသံတော်ဆင့်ကို ဆက်ပြောသည်။
မိုင်းယောင်းမြို့ရှိ “ဧဝရတ်”ရွှေဆိုင်ကို သေနတ်ဖြင့်ခြိမ်းခြောက်ပြီး ဓားပြတိုက်ခံရမှုကြောင့် ရွှေထည်ပစ္စည်းများ ထည့်ထားသည့် ကတ္တပါဗန်း ၃ ဗန်း လုယူခံခဲ့ရပြီး ဆုံးရှုံးမှုတန်ဖိုးကို မသိရှိရသေးကြောင်း ဖြစ်စဉ်သိရှိသူ ၎င်းအမျိုးသမီးက ပြောသည်။
လက်ရှိအချိန်ထိ ပြစ်မှုကျူးလွန်သည့် သေနတ်ကိုင်ဆောင်သူ ၎င်းလူငယ် (၄) ဦးကို ဖမ်းဆီးရမိခြင်း မရှိသေးဘဲ ထွက်ပြေးလွတ်မြောက်နေဆဲဖြစ်ကြောင်း သိရသည်။
ယခုဖြစ်ပွားခဲ့သည့် ဓားပြတိုက်ခံရမှု ဖြစ်စဉ်မှာ မိုင်းယောင်းမြို့တွင် ပထမဆုံးအကြိမ် ဖြစ်ခြင်းကြောင့် ဒေသခံများမှာ စိုးရိမ်ထိတ်လန့်ပြီး ဈေးဆိုင်များ ပိတ်သိမ်းလိုက်ကြောင်း ဒေသခံများက ပြောဆိုသည်။
မိုင်းယောင်းမြို့နယ်သည် သျှမ်းပြည် အရှေ့ဘက် အကျဆုံး မြို့နယ်ဖြစ်ပြီး အိမ်နီးချင်း တရုတ်၊ လာအို၊ ထိုင်းနိုင်ငံတို့နှင့် နယ်နိမိတ်ချင်း ထိစပ်နေသည်။
