သျှမ်းပြည် မိုးမိတ်မြို့တွင် ဖမ်းဆီးထားသည့်အမျိုးသား ၂ ဦးကို စစ်ကောင်စီတပ်ဖွဲ့က ချောင်းစပ်အနီး၌ ပစ်သတ်ခဲ့ကြောင်း စုံစမ်းသိရသည်။

အဆိုပါအမျိုးသား ၂ ဦးကို ဧပြီလ ၁ ရက်နေ့ ညပိုင်းက စစ်ကောင်စီတပ်ဖွဲ့က ချောင်းစပ်အနီး၌ သေနတ်ဖြင့် ပစ်ခတ်ခဲ့ကြောင်း မိုးမိတ်မြို့ဒေသခံ အမျိုးသားတစ်ဦး သျှမ်းသံတော်ဆင့်ကို ပြောသည်။

ယမန်နေ့ (ဧပြီလ ၄ ရက်) နေ့လယ်တွင် ထိုအမျိုးသား ၂ ဦး၏အလောင်းကို နမ့်မိတ်ချောင်းတံတားအနီးမှာ ပုတ်ပွနေကြောင်းတွေ့ရှိရပြီး ဒေသခံများက ချောင်းဘေးတွင်မီးသဂြိုလ်ပေးခဲ့ရကြောင်း ဆိုသည်။

“ပြီးခဲ့တဲ့ ၃ ရက်နေ့လောက်က ဖြစ်သွားတာ။ အဲ့မတိုင်ခင်ကတည်းက စစ်တပ်က ဖမ်းထားတာ။ ဖမ်းထားပြီးတော့ အဲ့ညသေနတ်သံသံ ဆက်တိုက်ကြားရတာပဲ” ဟု ၎င်းကပြောသည်။

သေဆုံးသွားသည့် အမျိုးသား ၂ ဦးထဲမှ ၁ ဦးသည် မိုးမိတ်မြို့တောင်ပိုင်း ရွာတော်လေးကျေးရွာမှ ကိုစံရွှေဖြစ်ပြီး ကျန်အမျိုးသား ၁ ဦးကိုတော့ မည်သူမည်ဝါဖြစ်ကြောင်း ဆက်လက်စုံစမ်းမေးမြန်းနေကြကြောင်း သိရသည်။

ပြီးခဲ့သည့် ဖေဖော်ဝါရီလ ၂ ရက်တွင်လည်း မိုးမိတ်မြို့နယ် ရွှေဇာလီကျေးရွာတွင် အိမ်စောင့်ကျန်ခဲ့သည့် အရပ်သား ၅ ဦးကို အကြောင်းပြချက်မရှိဘဲ စစ်ဆေးရန်ဟုဆိုကာ စစ်ကောင်စီတပ်မှ ရွာလယ်ဘုရားသို့ ခေါ်ဆောင်သွားခဲ့ပြီး ပစ်ခတ်ခဲ့သည်။

ထို့အပြင် နေအိမ်ပြန်ကြည့်သည့် စစ်ဘေးရှောင်ဦးရေ ၄၀ ဦးထက်မနည်းကိုလည်း ဖမ်းဆီးထားပြီး ငွေခြိမ်းခြောက် တောင်းခဲ့သေးကြောင်း ဒေသခံများကပြောသည်။

“တိုက်ပွဲဖြစ်တုန်းကလည်း ဒီလိုမျိုးဖြစ်စဉ်တွေ အများကြီးရှိခဲ့တယ်။ အဲ့တုန်းက အယောက် ၅၀ လောက် ရှိတယ်။ အခုနောက်ပိုင်းမှထပ်ပြီးကြုံလာရတာ” ဟု အထက်ပါ အမျိုးသားတစ်ဦးက ထပ်လောင်းပြောသည်။

မိုးမိတ်မြို့ကို ဇန်နဝါရီလ ၂၇ ရက်က စစ်ကောင်စီက ပြန်လည်ထိန်းချုပ်လာပြီးနောက်ပိုင်း ဒေသခံများ၏ နေအိမ်အတွင်းရှိ ပစ္စည်းများ ဖောက်ထွင်းခိုးယူပြီး ပြန်လည်ရောင်းချနေကြောင်း ဒေသခံများကပြောသည်။