သျှမ်းပြည်တောင်ပိုင်း ဆီဆိုင်၊ ဟိုပုံးနှင့် ပင်လောင်းမြို့နယ်တွင် တိုက်ပွဲ ၂လကျော်ကြာ အရပ်သားသေဆုံးမှု ၅၅ ဦးထိရှိလာနေကြောင်း စုံစမ်းသိရသည်။
အရပ်သားသေဆုံးမှုသည် စစ်ကောင်စီ၏ လက်နက်ကြီး၊ လေကြောင်းဗုံးကြဲခြင်းနှင့် ဖမ်းဆီးသတ်ဖြတ် ခြင်းကြောင့်ဖြစ်ပြီး ထိုထဲတွင် အသက် ၆ လသားမှ ၁၀ နှစ်အတွင်းရှိ ကလေးငယ် ၅ ဦး၊ အမျိုးသမီး ၃ ဦးအပါအဝင် ကျား-မ အတည်မပြုနိုင်သူ ၆ ဦးနှင့် အမျိုးသား ၄၁ ဦး ဖြစ်ကြောင်း ပအိုဝ်းလူငယ်အစည်းအရုံး တာဝန်ခံတစ်ဦးက ပြောသည်။
“အထူးသဖြင့်တော့ လက်နက်ကြီးထိမှန်တာ၊ လေကြောင်းဗုံးကြဲမှုကြေင့် ထိခိုက်သေဆုံးတာ အပါအဝင် ဖမ်းဆီးသတ်ဖြတ်ခံရတာတွေ ပါဝင်ပါတယ်” ဟု ၎င်းကပြောသည်။
ထို့အတူ လက်နက်ကြီး၊ လေကြောင်းဗုံးကြဲခြင်းကြောင့် ကလေးငယ်နှင့် အမျိုးသမီးအပါအဝင် အရပ်သားထိခိုက်ဒဏ်ရာမှု ၇၀ ဦးဝန်းကျင်အထိ မြင့်တက်လာနေကြောင်းလည်း ပအိုဝ်းလူငယ်အစည်းအရုံးက ဧပြီလ ၂ ရက်တွင် ထုတ်ပြန်ထားသည်။
အရပ်သားထိခိုက်သေဆုံးမှု၏ (၅၀) ရာခိုင်နှုန်းသည် လေကြောင်း၊ ဗုံးကြဲ တိုက်ခိုက်မှုကြောင့် ဖြစ်ပြီး အရပ်သား အဆောက်အအုံ ထိခိုက်ပျက်စီးမှု၏ (၈၀) ရာခိုင်နှုန်းခန့်သည်လည်း လက်နက်ကြီး ပစ်ခတ်တိုက်ခိုက်ခြင်း ကြောင့် ဖြစ်သည်ဟု ထုတ်ပြန်ချက်၌ ရေးသားဖော်ပြထားသည်။
သျှမ်းတောင် ၂ လကျော်ကြာ တိုက်ပွဲကြားမှာ ဘုန်းကြီးကျောင်းဆောင်အပါအဝင် အဆောက်အအုံ ထိခိုက်ပျက်စီးမှု ၅၇၁ ခုရှိသည်။
ထို့အပြင် တိုက်ပွဲကြား ဖမ်းဆီးခံရသူများလည်း စုစုပေါင်း ၂၀ ဦးအထိရှိပြီး ပအိုဝ်းအမျိုးသား လွတ်မြောက်ရေး တပ်မတော် PNLA မှ ဖမ်းဆီးထားခြင်းအပါအဝင် စစ်ကောင်စီနှင့် လက်အောက်ခံ ပြည်သူ့စစ် PNO ဘက်မှ ဖမ်းဆီးထားပြီး လက်ရှိအချိန်ထိ ဖမ်းဆီးခံရသူများအားလုံး ပြန်လည်လွတ်မြောက်လာခြင်း မရှိသေးကြောင်း သိရသည်
Leave a Comments