ယနေ့ (ဧပြီလ ၃ ရက်)တွင် လင်းခေးမြို့နယ် ဝမ်ဟတ်ကျေးရွာအုပ်စု၌ ကျင်းပသည့် ရှင်လောင်းပွဲသို့ သျှမ်းပြည် ပြန်လည်ထူထောင်ရေးကောင်စီ RCSS ဥက္ကဋ္ဌ ဗိုလ်ချုပ်ကြီး ယွက်စစ် တက်ရောက်ပြီး ရှင်လောင်းများထံ အလှူငွေ ပေးအပ်လှူဒါန်းပေးခဲ့ကြောင်း သိရသည်။
၎င်းနောက်တွင် လင်းခေးမြို့နယ်အတွင်း နွေရာသီ သျှမ်းစာပေသင်တန်း ဖွင့်လှစ်သင်ကြားနေသည့် နားကုန်းကျေးရွာသို့ ဆက်လက်သွားရောက်ပြီး ဆရာ/မ နှင့် ကျောင်းသားကျောင်းသူများကိုလည်း ငွေကြေးထောက်ပံ့ပေးခဲ့ကြောင်း Tai Freedom မီဒီယာက ယနေ့ (ဧပြီလ ၃ ရက်)တွင် ထုတ်ပြန်လာသည်။
အလားတူ ယမန်နေ့ (ဧပြီလ ၂ ရက်) ကလည်း လင်းခေးမြို့နယ် ဝမ်ဟတ်ကျေးရွာအုပ်စုရှိ ဘုန်းကြီးကျောင်းတွင် RCSS ဥက္ကဋ္ဌ ဗိုလ်ချုပ်ကြီး ယွက်စစ်နှင့် ဒေသခံပြည်သူများ လူထုတွေ့ဆုံပွဲ ထပ်မံပြုလုပ်ခဲ့သည်။
မတ်လ နောက်ဆုံးပတ်မှ စတင်ပြီး လင်းခေးခရိုင်အတွင်းရှိ မိုင်းပန်၊ မောက်မယ်၊ လင်းခေး၊ မိုးနဲနှင့် နမ့်စန်မြို့နယ်များရှိ ဒေသခံပြည်သူများကို သျှမ်းပြည် ပြန်လည်ထူထောင်ရေးကောင်စီ RCSS ဥက္ကဋ္ဌ ဗိုလ်ချုပ်ကြီးယွက်စစ်က လူထုတွေ့ဆုံပွဲများ ဆက်တိုက်ပြုလုပ်လာသည်။
၎င်းမြို့နယ်များရှိ RCSS ထိန်းချုပ်နယ်မြေများတွင် အခြေခံစစ်သင်တန်း တက်ရောက်နေသူများကိုလည်း တပြိုင်နက်တည်း တွေ့ဆုံအားပေးခဲ့ကြောင်း သိရသည်။
ပြီးခဲ့သည့် ဖေဖော်ဝါရီလ အတွင်းကလည်း မိုင်းပန်၊ ကျိုင်းတောင်း၊ ကာလိနှင့် ကွန်ဟိန်းမြို့နယ်များရှိ ဒေသခံများကိုလည်း RCSS ဥက္ကဋ္ဌက လူထုတွေ့ဆုံပွဲ ပြုလုပ်ခဲ့သည်။
