သျှမ်းပြည် နမ္မတူမြို့တွင် တအာင်းအမျိုးသမီးအဖွဲ့အစည်း (TWO)မှ ဦးဆောင်ပြီး ပထမအကြိမ် တအာင်းအမျိုးသမီးဖိုရမ်ကို ကျင်းပပြုလုပ်ခဲ့ကြောင်း စုံစမ်းသိရသည်။

မတ်လ ၂၈ နှင့် ၂၉ ရက်တို့တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA သိမ်းပိုက်ထားသည့် နမ္မတူမြို့၌ တအာင်းအမျိုးသမီး အဖွဲ့အစည်း (TWO)မှ ဦးဆောင်၍ ပထမအကြိမ် တအာင်းအမျိုးသမီးဖိုရမ်ကို နမ္မတူမြို့တော်ခန်းမတွင် ကျင်းပပြုလုပ်ခဲ့ပြီး အမျိုးသမီးကိုယ်စားလှယ် (၁၅၀) ဦးခန့် တက်ရောက်ခဲ့ကြောင်း သိရသည်။။

“နိုင်ငံရေး အခန်းကဏ္ဍ အပါအဝင် ဆုံးဖြတ်ချက်ချတဲ့ အခန်းကဏ္ဍတိုင်းမှာ အမျိုးသမီးပါဝင်မှု ပိုမိုမြင့်မားလာစေရန်၊ တအာင်းဒေသ အသီးသီးရှိ အမျိုးသမီးအပေါ် အန္တရာယ်ဖြစ်စေသည့် ဓလေ့ထုံးတမ်းများ ဖော်ထုတ်နိုင်ဖို့နဲ့ လျှော့ချနိုင်မည့် နည်းလမ်းတွေ ရှာဖွေနိုင်ဖို့ ဖိုရမ်ပြုလုပ်ရခြင်း ဖြစ်ပါတယ်”ဟု တအာင်းအမျိုးသမီးအဖွဲ့ (TWO) မှ ပြောရေးဆိုခွင့်ရှိသူက သျှမ်းသံတော်ဆင့်ကို ပြောသည်။

၎င်းဖိုရမ်သို့ နမ့်ဆန်၊ မန်တုံ၊ ကွတ်ခိုင်၊ မူဆယ်၊ နမ့်ခမ်း၊ ကျောက်မဲ၊ နမ္မတူနှင့် မိုးမိတ်မြို့နယ်ရှိ တအာင်းအရပ်ဘက် အဖွဲ့အစည်းများ၊ တအာင်းစာပေနှင့် ယဉ်ကျေးမှု ကော်မတီဝင်များ၊ ကျေးရွာအကြမ်းဖက်မှု လျှော့ချရေးကော်မတီဝင်များမှ အမျိုးသမီးကိုယ်စားလှယ်များ တက်ရောက်ခဲ့ကြောင်း သိရသည်။

နမ္မတူမြို့တွင် ကျင်းပခဲ့သည့် ဖိုရမ်ဆွေးနွေးပွဲ နှစ်ရက်တာအတွင်း ကျား-မ ခွဲခြားမှုနှင့် ဓလေ့ထုံးတမ်းများကြောင့် အမျိုးသမီးများကို ခွဲခြားဖိနှိပ်သည့် အကြမ်းဖက်မှုများ၊ စစ်ပွဲပဋိပက္ခအတွင်း ဆက်နွယ်သော လိင်ပိုင်းဆိုင်ရာ အကြမ်းဖက်မှုများကို ဖော်ထုတ်ခြင်း၊ လက်ရှိတွင် နိုင်ငံရေးနှင့် ဆုံးဖြတ်ချက်ချသည့် အခန်းကဏ္ဍတွင် အမျိုးသမီးပါဝင်မှုများကို ဆွေးနွေးခဲ့ကြောင်း မတ်လ ၃၀ ရက်တွင် သတင်းထုတ်ပြန်ထားသည်။

“လက်ရှိနိုင်ငံရေး အခြေအနေအရ အမျိုးသမီးများအတွက် လုံခြုံမှုမရှိနေခြင်း၊ အကြမ်းဖက်ခံရမှုများ ရှိနေသော်လည်း တိုင်ကြားရန် နေရာ အခက်အခဲရှိနေခြင်း၊ အမျိုးသမီးများအပေါ် အန္တရာယ်ရှိနေသည့် ဓလေ့ထုံးတမ်း – အိမ်ထောင်မကျသေးဘဲ ကိုယ်ဝန်ရသည့် အမျိုးသမီးများကို ရွာပြင်ထုတ်ခြင်း၊ ခွဲခြားဆက်ဆံနေခြင်း စသဖြင့် များစွာ ရှိနေပါတယ်”ဟု TWO ပြောရေးဆိုခွင့်ရှိသူ ၎င်းအမျိုးသမီးက သျှမ်းသံတော်ဆင့်ကို ဆက်ပြောသည်။

ထို့အပြင် တအာင်းအမျိုးသမီးအဖွဲ့သည် အမျိုးသမီးထုအား ကိုယ်စားပြုပြီး နိုင်ငံရေး ဦးဆောင်မှုနှင့် ဆုံးဖြတ်ချက်ချသည့် အခန်းကဏ္ဍတွင် အမျိုးသမီးကိုယ်စားပြု ပါဝင်မှု လျစ်လျူရှုနေခြင်းကို ကန့်ကွက်ရှုတ်ချပြီး ကျား-မ တန်းတူရေး ရရှိလာရန်အတွက် ဖိုဝါဒ ကြီးစိုးမှုကို တော်လှန်တိုက်ထုတ်သွားမည်ဟုလည်း မတ်လ ၃၁ ရက် ထုတ်ပြန်ကြေညာချက်တွင် ပြောဆိုထားသည်။