တရုတ်နိုင်ငံ အာရှရေးရာ အထူးကိုယ်စားလှယ်နှင့် စစ်အာဏာသိမ်းခေါင်းဆောင် မင်းအောင်လှိုင်တို့ နေပြည်တော်၌ တွေ့ဆုံပြီး နယ်စပ်ကုန်သွယ်ရေး ဆွေးနွေးခဲ့ကြောင်း သတင်းသိရသည်။

ယမန်နေ့ (ဧပြီလ ၁ ရက်)တွင် တရုတ်နိုင်ငံ အာရှရေးရာ အထူးကိုယ်စားလှယ် မစ္စတာ တိန့်ရှီကျွင်းနှင့် စစ်အာဏာသိမ်းခေါင်းဆောင် မင်းအောင်လှိုင်တို့ နေပြည်တော်၌ တွေ့ဆုံခဲ့ပြီး တရုတ်-မြန်မာ နှစ်နိုင်ငံ နယ်စပ်ဒေသ ကုန်သွယ်ရေးကိစ္စရပ်များနှင့် အွန်လိုင်းလောင်းကစား လိမ်လည်မှုများ ပပျောက်ရေး နှစ်နိုင်ငံ ပူးပေါင်းဆောင်ရွက်နေသည့် ကိစ္စရပ်များကို ဆွေးနွေးခဲ့ကြောင်း စစ်ကောင်စီက ထုတ်ပြန်ထားသည်။

ထို့အပြင် ငြိမ်းချမ်းရေး လုပ်ငန်းစဉ်တွင် တရုတ်နိုင်ငံက ကူညီဆောင်ရွက်နေသည့် အခြေအနေများနှင့် မြန်မာနိုင်ငံ၏ နိုင်ငံရေး ဖြစ်ပေါ်ပြောင်းလဲမှု အခြေအနေများကိုလည်း ဆွေးနွေးခဲ့ကြောင်း ဆိုသည်။

တရုတ်အထူးကိုယ်စားလှယ် မစ္စတာ တိန့်ရှီကျွင်းက စစ်ခေါင်းဆောင်နှင့် ယမန်နေ့ (ဧပြီ ၁ ရက်)က တွေ့ဆုံဆွေးနွေးပြီးနောက် တပြိုင်နက် တရုတ်-မြန်မာ နယ်စပ်အနီး တရုတ်နိုင်ငံဘက်ခြမ်းတွင် တရုတ်ပြည်သူ့ လွတ်မြောက်ရေးတပ်မတော် (PLA) ၏ စစ်ရေးလေ့ကျင့်မှု စတင်ကြောင်း သတင်းထုတ်ပြန်လာသည်။

၎င်းစစ်ရေးလေ့ကျင့်မှုကို ဧပြီလ ၂ ရက်နေ့မှ ၃ ရက်နေ့အထိ နှစ်ရက်တိုင်တိုင် ပြုလုပ်မည်ဖြစ်ပြီး နှစ်စဉ်ပြုလုပ်နေကျ အစီအစဉ်အဖြစ် လေ့ကျင့်လုပ်ဆောင်ခြင်းဖြစ်ကြောင်း တရုတ်ပြည်သူ့ လွတ်မြောက်ရေးတပ်မတော် (PLA) တောင်ပိုင်းတိုင်းစစ်ဒေသ သတင်းထုတ်ပြန်ချက်အရ သိရသည်။

လက်ရှိတွင် တရုတ်နိုင်ငံဘက်က နယ်စပ်အနီး စစ်ရေးလေ့ကျင့်မှုသည် မြန်မာ-တရုတ် နယ်စပ်တွင် ကချင်လွတ်လပ်ရေးတပ် KIA နှင့် ပူးပေါင်းတပ်များက စစ်ကောင်စီတပ်ခန်းများကို ထိုးစစ်ဆင် သိမ်းပိုက်နိုင်ခြင်းနှင့် တိုက်ဆိုင်နေပြီး ၂၀၂၃ နိုဝင်ဘာလ နောက်ဆုံးပတ်ကလည်း “၁၀၂၇ စစ်ဆင်ရေး” တိုက်ပွဲပြင်းထန်နေသည့် ကာလတွင် တရုတ်ဘက်ခြမ်း၌ အလားတူ စစ်ရေးလေ့ကျင့်မှု ပြုလုပ်ခဲ့ဖူးသည်။

“၁၀၂၇ စစ်ဆင်ရေး”အတွင်း စစ်ကောင်စီနှင့် ညီနောင်မဟာမိတ် ၃ ဖွဲ့တို့သည် တရုတ်နိုင်ငံ၏ စီစဉ်ပေးမှုဖြင့် ကူမင်းမြို့၌ (၄)ကြိမ်တိုင်တိုင် တွေ့ဆုံဆွေးနွေးခဲ့ပြီး “ဟိုင်ဂင် သဘောတူညီချက်”ဖြင့် သျှမ်းမြောက်တွင် ယာယီအပစ်အခတ် ရပ်စဲနိုင်ခဲ့သော်လည်း တိုက်ပွဲဆက်လက် ဖြစ်ပွားနေသည့် ရခိုင်ပြည်နယ်တွင်ပါ အပစ်ရပ်နိုင်ရန် တရုတ်နိုင်ငံက ကြိုးစားနေကြောင်း သိရသည်။

ဖေဖော်ဝါရီလ ၂၉ ရက်မှ မတ်လ ၁ ရက်နေ့အထိ ကူမင်းမြို့၌ စစ်ကောင်စီနှင့် ညီနောင်မဟာမိတ် ၃ ဖွဲ့တို့အကြား စတုတ္ထအကြိမ် တွေ့ဆုံခဲ့ပြီးနောက် တရုတ်-မြန်မာ ကုန်သွယ်ရေးလမ်းကြောင်းများ ပြန်ဖွင့်နိုင်ရေးနှင့် နယ်စပ်တည်ငြိမ်ရေးတို့ကို ကတိပြုခဲ့ကြောင်း ညီနောင်မဟာမိတ် ၃ ဖွဲ့က မတ်လ ၆ ရက်တွင် ထုတ်ပြန်ခဲ့သည်။

၎င်းနောက်တွင် လောက်ကိုင်မြို့နယ်ရှိ ချင်းရွှေဟော် နယ်စပ်ကုန်သွယ်ရေးဂိတ်ကို စစ်‌ကောင်စီနှင့် ညီနောင်မဟာမိတ် တို့ အပေးအယူလုပ်ပြီးနောက် ကိုးကန့်တပ်ဖွဲ့ MNDAA က ပြန်ဖွင့်ပေးခဲ့ကြောင်း ချင်းရွှေဟော် ဒေသခံများက ပြောသည်။

သို့သော် မြန်မာ-တရုတ် နယ်စပ်ကုန်သွယ်ရေး၏ အဓိက လမ်းကြောင်းဖြစ်သည့် မန္တလေး-မူဆယ် ကုန်သွယ်ရေးလမ်းမကြီးမှာ လုံခြုံရေး အခြေအနေများကြောင့် ပြန်လည်ဖွင့်လှစ်နိုင်ရန် မသေချာသေးဘဲ တစ်နှစ် ဒေါ်လာ ဘီလီယံ ဆယ်ချီ ကုန်သွယ်ရေး လမ်းကြောင်း အမြန် ပြန်ဖွင့်နိုင်ရန် ယူနန်ပြည်နယ် ကုန်သည်ကြီးများ အသင်းက ယူနန်ပြည်နယ် အစိုးရကို ဖိအားပေးနေသည်ဟု သတင်းရင်းမြစ်များက ပြောဆိုသည်။