သျှမ်းတောင် ဒေသခံလူထုနှင့် ဆက်တိုက်တွေ့ဆုံလာသည့် RCSS ဥက္ကဋ္ဌ

သျှမ်းပြည်တောင်ပိုင်း လင်းခေးခရိုင်အတွင်းရှိ ဒေသခံလူထုကို သျှမ်းပြည် ပြန်လည်ထူထောင်ရေးကောင်စီ RCSS ဥက္ကဋ္ဌက ဆက်တိုက်တွေ့ဆုံလာကြောင်း စုံစမ်းသိရသည်။

မတ်လ နောက်ဆုံးပတ်မှ စတင်ပြီး လင်းခေးခရိုင်အတွင်းရှိ မိုင်းပန်၊ မောက်မယ်၊ လင်းခေး၊ မိုးနဲနှင့် နမ့်စန်မြို့နယ်များရှိ ဒေသခံပြည်သူများကို သျှမ်းပြည် ပြန်လည်ထူထောင်ရေးကောင်စီ RCSS ဥက္ကဋ္ဌ ဗိုလ်ချုပ်ကြီးယွက်စစ်က လူထုတွေ့ဆုံပွဲများ ဆက်တိုက်ပြုလုပ်လာသည်။

၎င်းမြို့နယ်များရှိ RCSS ထိန်းချုပ်နယ်မြေများတွင် အခြေခံစစ်သင်တန်း တက်ရောက်နေသူများကိုလည်း တပြိုင်နက်တည်း တွေ့ဆုံအားပေးခဲ့ကြောင်း သိရသည်။

ယနေ့ (ဧပြီလ ၁ ရက်)တွင် မိုးနဲမြို့နယ်နှင့် မောက်မယ်မြို့နယ်အတွင်းရှိ ဒေသခံပြည်သူ ထောင်နှင့်ချီသည် စစ်ဝတ်စုံဖြင့် ရောက်ရှိလာသည့် RCSS ဥက္ကဋ္ဌ ဗိုလ်ချုပ်ကြီးယွက်စစ်ကို ကြိုဆိုနေသည့် ပုံများကို Tai Freedom မီဒီယာမှ ထုတ်ပြန်လာသည်။

အလားတူ မတ်လ ၂၈ ရက်တွင် မိုင်းပန်မြို့နယ်အတွင်းရှိ RCSS ထိန်းချုပ်နယ်မြေများတွင် အခြေခံစစ်သင်တန်း တက်ရောက်နေသူများကို RCSS ဥက္ကဋ္ဌမှ သွားရောက်တွေ့ဆုံခဲ့ပြီး ၎င်းတစ်ရက်တည်းတွင် လင်းခေးမြို့နယ်တွင် စစ်သင်တန်း တက်ရောက်နေသူများကို တွေ့ဆုံခဲ့သည်။

မတ်လ ၂၉ ရက်တွင် လင်းခေးမြို့နယ်ရှိ ဒေသခံပြည်သူများနှင့် တွေ့ဆုံခဲ့ပြီး RCSS ဥက္ကဋ္ဌမှ လက်ရှိနိုင်ငံရေးအခြေအနေ၊ အဖွဲ့အစည်း၏ မူဝါဒနှင့် သျှမ်းအမျိုးသား သွေးစည်းညီညွတ်ရေး ကိစ္စရပ်များကို ရှင်းလင်းပြောကြားခဲ့ပြီး ဒေသခံပြည်သူများနှင့်လည်း အမေးအဖြေ ပြုလုပ်ခဲ့ကြောင်း

ထို့အပြင် RCSS တပ်ဖွဲ့မှ စိုင်းစိုင်းငင်းက ဒေသခံပြည်သူလူထုနှင့် အခြေခံစစ်သင်တန်း တက်ရောက်နေသည့် သင်တန်းသား/သူများကို နိုင်ငံရေးသဘောတရားများ ဟောပြောခဲ့ကြောင်း Tai Freedom မီဒီယာတွင် ဖော်ပြထားသည်။

မတ်လ ၃၀ ရက် နံနက်ပိုင်းတွင်လည်း နမ့်စန်မြို့နယ်အတွင်းရှိ RCSS ထိန်းချုပ်နယ်မြေတွင် စစ်သင်တန်းတက်ရောက်နေသူများကိုလည်း ထပ်မံသွားရောက်၍ တွေ့ဆုံအားပေးခဲ့ပြီး ညနေပိုင်းတွင် ဒေသခံပြည်သူများနှင့် လူထုတွေ့ဆုံပွဲ ပြုလုပ်ခဲ့ကြောင်း သိရသည်။

ဖေဖော်ဝါရီလ အတွင်းကလည်း မိုင်းပန်၊ ကျိုင်းတောင်း၊ ကာလိနှင့် ကွန်ဟိန်မြို့နယ်များရှိ ဒေသခံများကိုလည်း RCSS ဥက္ကဋ္ဌက လူထုတွေ့ဆုံပွဲ ပြုလုပ်ခဲ့သည်။

RCSS တပ်ဖွဲ့အနေဖြင့် ဖေဖော်ဝါရီလ ၁၃ ရက်တွင် တပ်သားသစ် စတင်ဖိတ်ခေါ်ပြီးနောက် စစ်ရေးပဋိပက္ခကာလ သျှမ်းပြည်တွင် နေထိုင်သည့် မည်သည့်တိုင်းရင်းသား လူမျိုးမဆို အသက် ၁၈ နှစ်မှ ၄၅ နှစ်အထိ ကျား၊ မ အားလုံး သျှမ်းပြည်အမျိုးသားရေး တာဝန် ထမ်းဆောင်နိုင်ရန်အတွက် RCSS/SSA ၏ စစ်မှုထမ်းမူဝါဒကို ဖေဖော်ဝါရီလ ၁၉ ရက်တွင် ထပ်မံထုတ်ပြန်ထားသည်။

၎င်းနောက်တွင် RCSS တပ်ဖွဲ့ထံသို့ ဝင်ရောက်စစ်မှုထမ်းဆောင်ပါက စစ်ကောင်စီထံမှ ကင်းလွတ်ခွင့်ရမည်ဖြစ်ကြောင်း RCSS ပြောရေးဆိုခွင့်ရှိသူ ဗိုလ်မှူးကြီးစိုင်းခမ်းစံက သျှမ်းသံတော်ဆင့်ကို ဖေဖော်ဝါရီလ ၁၉ ရက်တွင် ဖြေကြားထားသည်။

ပြီးခဲ့သည့် မတ်လ ၁၇/၁၈ ရက်က ချင်းမိုင်မြို့တွင် ကျင်းပပြုလုပ်ခဲ့သည့် NCA လက်မှတ်ရေးထိုးထားသော တိုင်းရင်းသားလက်နက်ကိုင် (၇)ဖွဲ့၏ မျက်နှာစုံညီ အစည်းအဝေးတွင်လည်း “7 EAO Alliance” (၇)ဖွဲ့က ထိန်းချုပ်ထားသည့် နယ်မြေဒေသ အသီးသီးတွင် ကိုယ်ပိုင်ပြဋ္ဌာန်းခွင့်၏ အုပ်ချုပ်ရေးစနစ်ဖြင့် စတင်အုပ်ချုပ်သွားရမည် ဖြစ်ကြောင်း RCSS ဥက္ကဋ္ဌ ဗိုလ်ချုပ်ကြီး ယွက်စစ်က ပြောဆိုခဲ့သည်။

အခြားတစ်ဘက်တွင် NCA အပစ်ရပ် ၇ ဖွဲ့နှင့် စစ်ကောင်စီ၏ ငြိမ်းချမ်းရေး ဖော်ဆောင်မှု ညှိနှိုင်းရေးကော်မတီ (NSPNC) တို့ မတ်လ ၂၉ ရက်နေ့က နေပြည်တော်တွင် တွေ့ဆုံခဲ့ပြီး RCSS တပ်ဖွဲ့မှ ဗဟိုအလုပ်အမှုဆောင် ကော်မတီဝင် စဝ်ဆောင်းဟန် တက်ရောက်ခဲ့သည်။