သျှမ်းပြည်နယ် တောင်ပိုင်း၊ ကလောမြို့တွင် စစ်ကောင်စီ ပြဌာန်းသည့် အဓမ္မ စစ်မှုထမ်း ဥပဒေအရ စစ်မှုထမ်းရန် ရွေးချယ်ခံရသည့် လူငယ်များနှင့် မိသားစုများကို ထောက်ပံ့ရန် ဆိုသည့် အကြောင်းပြချက်ဖြင့် တစ်အိမ်လျှင် ငွေကျပ် တစ်သောင်းမှ ကျပ်ငါးသောင်းအထိ စတင် ကောက်ခံခံနေကြောင်း မြို့ခံများက ယနေ့ (မတ်လ ၂၉ ရက်) တွင် ပြောသည်။

စစ်မှုထမ်း ပထမအသုတ် အဖြစ် ကလောမြို့နယ်မှ လူငယ် ၄၀ စုဆောင်းပေးရပြီး ယင်းလူငယ်များနှင့် ၄င်းတို့၏ မိသားစုများအား ထောက်ပံ့ရန် ကလောမြို့ပေါ်သာမက အောင်ပန်းနှင့် ဟဲဟိုး အပါအဝင် မြို့နယ် တစ်ခုလုံး ရပ်ကွက် ကျေးရွာ အလိုက် အုပ်ကြီးများက လိုက်လံ ကောက်ခံနေပြီဟု မြို့နယ် အုပ်ချုပ်ရေးအဖွဲ့နှင့် နီးစပ်သူ တစ်ဦးက ပြောသည်။

“အနည်းဆုံး တစ်အိမ် တစ်သောင်း။ အဆင်ပြေတဲ့အိမ်က နှစ်သောင်း သုံးသောင်း၊ လုပ်ငန်းရှိတဲ့အိမ်က ငါးသောင်း အဲလို အဆင်ပြေသလို ကောက်နေကြပြီ။ တချို့ ချမ်းသာတဲ့သူတွေကတော့ သူတို့အိမ်က လူတွေမပါဖို့ အုပ်ကြီးတွေကို သပ်သပ်ပေးတာမျိုးလည်းရှိတယ်” ဟု ၄င်းကရှင်းပြသည်။

စစ်တပ်ကြီးစိုးသည့် ကလောမြို့နယ်တွင် စစ်မှုထမ်းရမည့် လူငယ်များစာရင်း ကောက်ယူပြီးစီးရာ ပထမ အသုတ်၌ စစ်မှုထမ်းဟောင်း သားသမီးများ၊ မဘသ အစွန်းရောက်များနှင့် ငွေကြေးချို့တဲ့သည့် မိသားစုများမှ လူငယ်များ စစ်မှုထမ်းရန် ဆန္ဒပြုထားသဖြင့် မဲနှိုက်ရွေးချယ်မှု နည်းပါးသည်ဟု ဒေသခံများက ပြောသည်။

“မြို့ပေါ်လည်း ငွေကောက်တယ်။ တစ်အိမ် အနည်းဆုံးတစ်သောင်းပဲ။ ရွာဘက်တွေလည်း အကုန်ကောက်နေတာပဲ။ ဒါက ပထမ အသုတ်အတွက်ဆိုတော့ နောက်ထပ်တွေ ထပ်ထပ်လာအုံးမယ် ထင်တယ်။ လူတွေက စီးပွားရေး ကျပ်တည်းနေတဲ့ အချိန်ဆိုတော့ စ်တ်ညစ်ကြတာပေါ့” ဟု အောင်ပန်းမြို့ခံ တစ်ဦးက ပြောသည်။

နွေရာသီ အပန်းဖြေမြို့ အဖြစ်ကျော်ကြားသော ကလောမြို့ခံများသည် အကြောက်တရား ကြီးမားပြီး ဒေသတွင်း စစ်တပ် အလိုကျနေထိုင်သည့် မြို့အဖြစ် နာမည်ကျော်ကြားသော်လည်း ကလောမြို့နယ် အတွင်း ပါဝင်သည့် အောင်ပန်းမြို့နှင့် ဟဲဟိုးမြို့မှာမူ စစ်အာဏာရှင်ကို တော်လှန်ရာတွင် နာမည်ကျော်ကြားသည်။

လက်ရှိ နွေရာသီ ကျောင်းပိတ်ရက် ဖြစ်သော်လည်း ကလောမြို့တွင် ခရီးသွားဧည့်သည် နည်းပါးနေဆဲဖြစ်ပြီး သင်္ကြန်ကာလ ခရီးသွားဧည့်သည် များပြားရန် မျှော်လင့်ကြောင်း မြို့ခံများက ပြောသည်။