သျှမ်းပြည် ပင်လောင်းမြို့နယ် နန်းတုတ်ကျေးရွာကို စစ်ကောင်စီတပ်က လက်နက်ကြီးဖြင့် ထပ်မံပစ် ခတ်ခဲ့သောကြောင့် ရွာလုံးကျွတ်ထွက်ပြေးနေရကြောင်း စုံစမ်းသိရသည်။

ယမန်နေ့ (မတ်လ ၂၆) ရက် ညပိုင်းတွင် ဖယ်ခုံမြို့အခြေစိုက် ခြေမြန်တပ်ရင်း ခမရ-၃၃၆ မှ စစ်ကောင်စီသည် အခြားတစ်ဖက်ကမ်းရှိ ပင်လောင်းမြို့နယ် နန်းတုတ်ကျေးရွာကို လက်နက်ကြီးဖြင့်ထပ်မံပစ်ခတ်ခဲ့ကြောင်း နန်းတုတ်ကျေးရွာဒေသခံများထံမှ သိရသည်။

အလားတူ ပင်လောင်းမြို့နယ် ဆောင်းပြောင်းကျေးရွာရှိ စစ်ကောင်စီတပ်ဖွဲ့က အမြောက်လက်နက်ကြီးဖြင့် နန်းတုတ်ကျေးရွာထဲကို ပစ်ခတ်ခဲ့သေးကြောင်း ဆိုသည်။

“ကျနော်တို့ရွာကတော့ အခြေအနေမမှန်တော့ဘူး။ မနေ့ညကလည်း လက်နက်ကြီးထပ်ပစ်တယ်။ အသံကျယ်သလား မမေးနဲ့။ ဖယ်ခုံကနေ ပစ်လာတာလည်းဟုတ်တယ်။ ဆောင်းပြောင်းကနေလည်း ပစ်လာတယ်။ အခုကျနော်တို့လည်းပြေးနေရတယ်၊ ရွာသားတွေအကုန်လုံးလည်း မပြန်နိုင်တော့ဘူး” ဟု နန်းတုတ်ကျေးရွာဒေသခံ အသက် ၂၀ ကျော် အမျိုးသားတစ်ဦးကပြောသည်။

ယင်းကဲ့သို့ စစ်ကောင်စီတပ်မှ လက်နက်ကြီးဖြင့် ရမ်းသမ်းပစ်ခတ်မှုကြောင့် နေအိမ်ထိခိုက်ပျက်စီးမှုများ ရှိကြောင်း သိရသည်။

ဖယ်ခုံမြို့နှင် အခြားတစ်ဖက်ကမ်းရှိ နန်းတုတ်ကျေးရွာတွင် စစ်ဘေးရှောင်အပါအဝင် အင်းသား၊ ပအိုဝ်း နှင့် သျှမ်းလူမျိုးပေါင်းစုံများစု ပေါင်းနေထိုင်ကြပြီး နန်းတုတ်တောင်ရွာ၊ မြောက်ရွာ၊ အရှေ့ရွာဟူ၍ ရှိသည်။

လက်ရှိတွင် စစ်ကောင်စီ၏ လေကြောင်းတိုက်ခိုက်မှု၊ လက်နက်ကြီးဖြင့် ပစ်ခတ်မှုများကြောင့် စစ်ဘေးရှောင် အပါအဝင် ဒေသခံဦးရေ ခန့်မှန်ခြေ ၃ထောင်ခန့်က ရွာလုံးကျွတ်ထွက်ပြေးတိမ်းရှောင်နေရသည်ဟု နန်းတုတ်ရွာခံတစ်ဦးကထပ်လောင်းပြောသည်။

“အခုတော့ ကျနော်ရွာကတော့ ရွာလုံးကျွတ်ရှောင်နေရတယ်။ သျှမ်းရွာတွေကော၊ ပအိုဝ်းရွာတွေကော အကုန် ရှောင်ကုန်ပြီ။ ကျနော်တို့မှာက တိုက်ပွဲလည်းမဖြစ်ဘူး။ ဒါပေမယ့် ဓာတ်ဆီတွေ၊ ဒီဇယ်တွေ သယ်လာလို့လား မသိဘူး။ တိုက်ပွဲမဖြစ်ဘဲ လေယာဉ်နဲ့ကြဲ၊ လက်နက်ကြီးပစ်နေတာ။ ကျနော်တို့ရွာက တအားစည်တာလေ” ဟု ၎င်းကပြောသည်။

ထွက်ပြေးတိမ်းရှောင်နေရသည့် နန်းတုတ်ကျေးရွာမှ ဒေသခံများသည် အနီးတဝိုက် ကျေးရွာ၊ တောတောင်နှင့် ပင်လောင်း၊ နောင်တရားဘက်သို့ ထွက်ပြေးခိုလှုံသွားကြောင်း သိရသည်။

ပြီးခဲ့သည့် မတ်လ ၂၃ ရက်တွင်လည်း ပင်လောင်းမြို့နယ် နန်းတုတ်ကျေးရွာကို စစ်ကောင်စီတပ်က တိုက်လေယာဉ်ဖြင့် ၂ ကြိမ် ဗုံးကြဲတိုက်ခိုက်ခဲ့သလို လက်နက်ကြီးဖြင့် ၅ ကြိမ် ပစ်ခတ်ခဲ့ပြီး ဆေးခန်း အဆောက်အဦအပြင် ဆိုင်ခန်း ၁ လုံးနှင့် နေအိမ် ၆ လုံးပျက်စီးသွားခဲ့သည်.,

အလားတူ ဖယ်ခုံမြို့နယ် လအိကျေးရွာကို မတ်လ ၂၂ ရက်တွင် စစ်ကောင်စီတပ်က တိုက်လေယာဉ်ဖြင့် ဗုံးကြဲတိုက်ခိုက်ခဲ့သောကြောင့် အိမ်ခြေ ၅၀၀ နီးပါး ထွက်ပြေးတိမ်းရှောင်ရဆဲဖြစ်သည်။