Sunday, May 26, 2024

မူဆယ် လက်နက်ကိုင်အယောင်ဆောင်အဖွဲ့ အွန်လိုင်းစာပို့ခြိမ်းခြောက်ပြီး လူပြန်ပေးဆွဲမှု ဆက်ရှိနေ

Must read

သျှမ်းပြည် မူဆယ်မြို့တွင် လက်နက်ကိုင် အယောင်ဆောင်အဖွဲ့များမှ ဒေသခံများထံ အွန်လိုင်းစာပို့ ခြိမ်းခြောက်ပြီး လူပြန်ပေးဆွဲမှုများ ဆက်ရှိနေကြောင်း စုံစမ်းသိရသည်။

ပြီးခဲ့သည့် ဖေဖော်ဝါရီလမှ စတင်ပြီး မူဆယ်မြို့တွင် လက်နက်ကိုင် အယောင်ဆောင်အဖွဲ့များက မူဆယ်မြို့ပြပျောက်ကြားအဖွဲ့၊ မြို့တွင်းတော်လှန်သော အုပ်စုအဖွဲ့ (MRTTD) နှင့် မူဆယ် PDF အယောင်ဆောင်အဖွဲ့ (MSPDF) စသည့် နာမည်အမျိုးမျိုးဖြင့် မြို့နေလူထုကို အွန်လိုင်းမှ စာပို့ခြိမ်းခြောက် ငွေညှစ်တောင်းခံပြီး လူပြန်ပေးဆွဲမှုများ ဆက်ရှိနေသေးကြောင်း မူဆယ်ဒေသခံများက ပြောသည်။

“ပြန်ပေးဆွဲပြီး ဖမ်းခံရလို့ ပြန်လွတ်လာတဲ့လူတွေကို မေးကြည့်တော့ သူတို့ဖမ်းသွားတာဆို အများကြီးရှိတယ်၊ သူတို့နဲ့ သွားနေရတာ တစ်ယောက်တည်း မဟုတ်ဘဲနဲ့ နေရာတိုင်းက ဖမ်းလာတာလို့ ပြောတယ်။ ဘယ်သူမှ အသံမထွက်ရဲတော့ အခုလို ခြိမ်းခြောက်ဖိနှိပ်မှုက ဆက်ရှိနေဦးမှာပဲ။ အခုထိလည်း စာပို့ခြိမ်းခြောက်ပြီး ငွေညှစ်နေတာ နေ့တိုင်းပဲ”ဟု မူဆယ်မြို့မှ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

မတ်လ ၁၉ နှင့် ၂၀ ရက်တို့တွင် မူဆယ်မြို့ရှိ မြို့တွင်းတော်လှန်သော အုပ်စုအဖွဲ့ (MRTTD) ဟုဆိုကာ မြို့ပေါ်ရှိ တရုတ်-မြန်မာ ငွေလဲလုပ်ငန်း၊ လျှပ်စစ်ပစ္စည်း၊ ဆိုင်ကယ်ပစ္စည်းနှင့် ဖုန်းဆိုင်များသို့ Viber မှတဆင့် စာပို့ခြိမ်းခြောက်ပြီး ငွေညှစ်တောင်းခံနေကြောင်း မူဆယ်ဒေသခံများထံမှ သိရသည်။

ထို့အပြင် စာပို့ခြိမ်းခြောက်လာသည့် ၎င်းတို့အဖွဲ့ကို ညှိနှိုင်းစကားပြောဆိုမှု မရှိခြင်း၊ အကြောင်းပြန်ကြားမှု မရှိခြင်းတို့ ပြုလုပ်ပါက မိသားစုနှင့် ဝန်ထမ်းအသက်ကို အိမ်တွင် လာရောက်ပစ်ခတ်၍ ဗုံးဖောက်ခွဲပြီး လက်နက်နှင့် ဖောက်ခွဲရေးပစ္စည်း ထားရှိမည်ဟုလည်း ထပ်မံခြိမ်းခြောက်ထားသည်။

“သာမန် ပြည်သူတွေကတော့ ဓားပြတိုက်ခံရတာပဲဖြစ်ဖြစ်၊ လူပြန်ပေးဆွဲခံရတာပဲဖြစ်ဖြစ် ဘယ်လိုမှ လုံခြုံမှုမရှိဘူး။ TNLA ဆိုရင်လည်း ပြည်သူတွေဆီ ဆက်ကြေးပဲ ခနခန လာကောက်တာ ဘာလုံခြုံရေးမှ တာဝန်မယူပေးနိုင်ဘူး။ ပိုက်ဆံလာတောင်းတဲ့အချိန်ပဲ ဘယ်လိုတာဝန်ယူပေးမယ် ဆိုတာ ပြောတာ၊ တကယ်တမ်း ဘယ်အဖွဲ့မှ အားကိုးလို့မရဘူး”မူဆယ်မြို့မှ ၎င်းဒေသခံအမျိုးသားက သျှမ်းသံတော်ဆင့်ကို ဆက်ပြောသည်။

မူဆယ်မြို့နယ်တွင် ယခင်က နာမည်ကြီးခဲ့သည့် အွန်လိုင်းငွေလိမ် ကျားဖြန့်လုပ်ငန်းများသည် နေရာပြောင်းရွှေ့ လည်ပတ်နေပြီး မြန်မာ-တရုတ်နယ်စပ် နန်းတော်ဂိတ်သို့ သွားသည့် ပြည်ထောင်စု လမ်းမကြီးတလျှောက် ဂုံးဂင်း လေးကောင်ဂျင် လောင်းကစားများ ပေါ်ပေါ်ထင်ထင် ဖွင့်လှစ်ထားကြောင်း မူဆယ်ဒေသခံများက ပြောသည်။

လက်ရှိတွင် မူဆယ်မြို့ ရဟတ်ယာဉ်ကွင်းနှင့် ဂေါက်ကွင်းဘက်၊ ကောင်းမူးတုံရပ်ကွက် ပန်လုံ ၁ နှင့် ၂ လမ်းတလျှောက်နှင့် လုံထန်ပြည်သူ့စစ်အဖွဲ့သည် ပန်ခမ်းနှင့် စွမ်စော်ရပ်ကွက်တို့တွင် လောင်းကစားဝိုင်း လုပ်ငန်းများ ဖွင့်လှစ်ထားပြီး ဂိမ်းဆိုင်များတွင်လည်း ပြည်သူ့စစ်များက လုံခြုံရေးယူ‌ပေးထားသည်ဟု ဒေသခံများထံမှ သိရသည်။

“မြို့ပတ်ပတ်လည်မှာ လက်နက်ကိုင်အဖွဲ့ ရှိနေပေမယ့် မြို့ထဲမှာက ရှုပ်နေတုန်းပဲ။ စစ်ကောင်စီက ပြည်သူ့စစ်တွေကိုလည်း လွှတ်ထားတယ်၊ သူခိုးဓားပြနဲ့ သူတို့တွေက တစ်အုပ်စုထဲတောင် ဖြစ်မှာ။ ရဲတွေက ဖမ်းမိရင်တောင်မှ သူတို့လူ ဆိုပြီးတော့ ပြန်လာထုတ်သွားတယ်လို့‌ ပြောတယ်။ သူတို့ ထုတ်မပြောပေမယ့် တစ်ဖွဲ့တည်းပဲ၊ တခြားနာမည်နဲ့ ထပ်ဖွဲ့ပြီး လုပ်စားနေကြတာ”ဟု မူဆယ်မြို့မှ ၎င်းလက်နက်ကိုင် အယောင်ဆောင်အဖွဲ့များ၏ ခြိမ်းခြောက်ငွေတောင်းခံရသူ ကုန်သည်တစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် မတ်လ ၁၇ ရက်ကလည်း မူဆယ်မြို့ ကောင်းမူးတုံရပ်ကွက်ရှိ ပန်လုံ ၁ လမ်းတွင် အမည်မသိ လက်နက်ကိုင်အဖွဲ့မှ ဆက်ကြေးမပေးသူကို သေနတ်ဖြင့် လိုက်လံပစ်ခတ်ပြီး ဖမ်းဆီးခေါ်ဆောင်သွားခဲ့ကြောင်း မူဆယ်ဒေသခံများက ပြောသည်။

အလားတူ မတ်လ ၁၃ ရက်နေ့ကလည်း မူဆယ်မြို့ တောင်ရပ်ကွက်ရှိ မြန်မာ-တရုတ် ငွေလဲလုပ်ငန်း လုပ်ကိုင်သည့် နေအိမ်သို့ မူဆယ် PDF အမည်ခံထားသည့် MSPDF အယောင်ဆောင်အဖွဲ့မှ လက်ပစ်ဗုံး လာရောက်ဖောက်ခွဲခဲ့ပြီး မိသားစုဝင်များ၏ အသက်အန္တရာယ်ကိုလည်း ခြိမ်းခြောက်ခဲ့ကြောင်း မူဆယ်ဒေသခံများထံမှ သိရသည်။

Leave a Comments

- Advertisement -spot_img

Latest article