သျှမ်းပြည် ပင်လုံမြို့နယ်တွင် ပြောင်းဖူးများဈေးကျနေချိန် ရှမ်းပြည် တိုးတက်ရေးပါတီ၊ ရှမ်းပြည်တပ်မတော် SSPP ၏ဂိတ်များတွင် ပြောင်းတင် တွဲကားများကို ပိုက်ဆံ တိုးကောက်နေကြောင်း စုံစမ်းသိရသည်။
သျှမ်းပြည် ပင်လုံမြို့နယ် နောင်လိုင်ကျေးရွာတွင် ယခု မတ်လ ပထမပတ်မှစ၍ SSPP ဂိတ်မှလည်း ပြောင်းဖူးတင်သည့် တွဲကားများကို ငွေတိုးကောက်လာမှုကြောင့် ပြောင်းပိုင်ရှင်များ အရှုံးပေါ်နေကြောင်း ပြောင်းစိုက်သည့် အမျိုးသားတစ်ဦးက သျှမ်းသံတော်ဆင့်ကိုပြောသည်။
“အရင်နှစ်တွေက မကောက်ဘူး ထမင်းဖိုးဟင်းဖိုးလောက်ပဲ။အခုသူတို့က ၁၂ဘီးကား တစ်စီး ဆိုရင် ၁သိန်းခွဲ လောက်ပေါ့။ တွဲကားဆိုရင် ၃သိန်းဝန်းကျင်လောက်ပေါ့။ကုန်ခလိုပြောပြီးကောက်တာ။သူတို့ကလည်း အဲ့လိုကောက်တယ် ပြောင်းဈေးကမကောင်းဖူးလေ ရှုံးတာပေါ့။” ကြုံတွေ့ခဲ့သူ အမျိုးသားတစ်ဦးက ပြောသည်။
SSPP ထိန်းချုပ်နယ်မြေထဲတွင် ပြောင်းဖူးလုပ်ကိုင်နေသူများသည် ပြောင်းဖူးသိုလှောင်ခများ၊တွဲကား ခ များလည်း နှစ်စဥ် ဆက်ကြေး ပေးနေရကြောင်း ဒေသခံများက ပြောသည်။
ပြီးခဲ့သည့် လများတွင် ပြောင်းတစ် ၁ ပိဿာလျှင် ၁၀၄၀ – ၁၀၀၀ ကျပ်ခန့်ထိရှိပြီး ယခု မတ်လ တွင် တစ်ပိဿလျှင် ၇၀၀ မှ ၁၀၀၀ ဝန်းကျင်ထိ စျေးကျနေကြောင်း သိရသည်။
နိုင်ငံရေးရှုပ်ထွေးမှု၊ ကုန်စျေးနှုန်းမြင့်တက်မှုကြောင့် ဓာတ်မြေသြဇာစျေးနှုန်းလည်း အလိုအလျောက် စျေးတက်နေသဖြင့် ပြောင်းစျေးသည် တစ်ပိဿာလျှင် ကျပ် ၁၀၀၀ အောက်အထိ စျေးကျနေကြောင်း ပြောင်းစိုက်တောင်သူများက ပြောသည်။
Leave a Comments