ပအိုဝ်းအမျိုးသားလုံး အထွဋ်အမြတ်ထားသည့် ပအိုဝ်းအမျိုးသားနေ့ကို စည်းလုံးညီညွတ်စွာနှင့် အောင်မြင်စွာ ကျင်းပရေးအတွက် ပအိုဝ်းနယ်မြေအတွင်း ၁ လကြာ ပစ်ခတ်တိုက်ခိုက်မှု ရပ်စဲကြရန် ပအိုဝ်းအမျိုးသား လွတ်မြောက်ရေးအဖွဲ့ချုပ် (PNLO) နာယက ခွန်ဥက္ကာက ပြောဆိုလိုက်သည်။
အဆိုပါ ပြောဆိုမှုသည် ယမန်နေ့ (မတ်လ ၁၉ ရက်) တွင် ထုတ်ပြန်ခဲ့သည့် PNLO ပြန်ကြားလွှာ၌ ထည့်တွင်းပြော ဆိုခဲ့ခြင်းဖြစ်သည်။
မတ်လ ၂၄ ရက်ကျရောက်မည့် ပအိုဝ်းအမျိုးသားနေ့ကို အောင်မြင်စွာကျင်းပနိုင်ရေးအတွက် ပအိုဝ်းနယ်မြေအဖြစ် သတ်မှတ်ထားသည့် ဆီဆိုင်မြို့နယ်၊ ဟိုပုံးမြို့နယ်နှင့် ပင်လောင်းမြို့နယ်အတွင်း ဖြစ်ပေါ်နေသည့် လက်နက်ကိုင်ပဋိက္ခကို မတ်လ ၂၃ ရက်မှ ဧပြီလ ၂၃ အထိ တစ်လကြာ ပစ်ခတ်တိုက်ခိုက်မှုရပ်စဲကြရန် မေတ္တာရပ်ခံထားကြောင်း ဆိုသည်။
ယင်းကဲ့သို့ ယာယီပစ်ခတ်တိုက်ခိုက်မှု ရပ်စဲခြင်းကြောင့် ပအိုဝ်းအမျိုးသားနေ့ပွဲတော်များကို နေရာအနှံ့ အောင်မြင်စွာ ကျင်းပနိုင်မည်ဖြစ်ကြောင်း၊ ပဋိပက္ခများ လျှော့ကျစေနိုင်ခြင်းအပြင် အလှူအတန်းများ ပြုလုပ်နိုင်ခြင်းနှင့် လူသားချင်းစာနာထောက်ထားမှုဆိုင်ရာ အကူအညီများကို စစ်ဘေးရှောင်များထံသို့ ပို့ဆောင်ကူညီနိုင်မည်ဖြစ်ကြောင်း ထုတ်ပြန်ချက်၌ ရေးသားဖော်ပြထားသည်။
သို့သော် ဆီဆိုင်မြို့နယ်နှင့် ဟိုပုံးမြို့နယ်တွင် ပအိုဝ်းအမျိုးသားလွတ်မြောက်ရေးတပ်မတော် PNLA၊ ပူးပေါင်းတော်လှန်ရေး အင်းအားစုတပ်ဖွဲ့နှင့် စစ်ကောင်စီ၊ ပြည်သူ့စစ် PNA တို့အကြား လက်ရှိအချိန်ထိ စစ်ရေးတင်းမာနေလျက်ရှိနေသည်။
အဆိုပါ မြေနယ်ဒေသအတွင်း စစ်ကောင်စီဘက်က လက်နက်ကြီး၊ ဒရုန်းနှင့် လေကြောင်းတိုက်ခိုက်မှုများ နေ့စဉ်နီးပါးလိုပင် ပြုလုပ်နေသည်။
ထို့အပြင် လောင်းမြို့နယ်အတွင်း ပြည်သူ့တော်လှန်ရေး အင်းအားစု PDFs နှင့် စစ်ကောင်စီတပ်၊ ပြည်သူ့စစ် PNA တို့အကြား ယနေ့အချိန်ထိ တိုက်ပွဲဆက်လက်ဖြစ်ပွားနေသည်။
ပုံစာ-၂၀၂၃ ခုနှစ် မတ်လ (၅) ရက်တွင် ပင်လောင်းမြို့နယ်မှာ (၇၄) ကြိမ်မြောက် ပအိုဝ်းအမျိုးသားနေ့ကို ကျင်းပနေစဉ်
