သျှမ်းပြည် နမ့်ခမ်းမြို့နယ်ရှိ မန်ဟောင်းနှင့် နောင်တောင်း ကူးတို့ဆိပ်သို့ သွားမည့် ကြံကားများကို TNLA က ကမ်းကူးခွင့် ပိတ်ထားသဖြင့် ကြံတောင်သူများ အခက်အခဲ ကြုံတွေ့နေရကြောင်း စုံစမ်းသိရသည်။

ပြီးခဲ့သည့် မတ်လ ၁၁ ရက်မှ စတင်ပြီး နမ့်ခမ်းမြို့နယ်မှ တရုတ်ပြည်သို့ သွားမည့် ကြံကားများကို မန်ဟောင်း နှင့် နောင်တောင်း ကူးတို့ဆိပ် (စက်လှေဆိပ်)ဂိတ်တွင် တအာင်း(ပလောင်) အမျိုးသားလွတ်မြောက်ရေး တပ်မတော် TNLA မှ အကြောင်းပြချက် မရှိဘဲ ဖြတ်သန်းခွင့်မပြုခဲ့ကြောင်း ကြံတောင်သူ အမျိုးသားတစ်ဦးက သျှမ်းသံတော်ဆင့်ကို ပြောသည်။

ထိုကြံကားများသည် နောင်တောင်း-ပိန်းမိုင် နယ်စပ်ဂိတ်ကို ဖြတ်၍ တရုတ်နိုင်ငံသို့ တင်ပို့မည့် ကြံကားများဖြစ်သည်။

“ကြံပို့လို့မရတာ တစ်ပတ်ကျော်ရှိပြီ။ နမ့်ခမ်းက TNLA ကို သွားမေးတော့လည်း သူတို့အထက်လူကြီးက ပိတ်ခိုင်းလို့ ပိတ်ရတာ လို့ပဲ ပြန်ပြောတယ်။ နောင်တောင်း စက်လှေဆိပ်ကနေ ကမ်းမကူးရတော့ ကြံကားလည်း အဲ့ဒီမှာပဲ ရပ်ထားရတာ၊ တရုတ်ဘက်ကို ဝင်ဖို့ စောင့်နေတာ”ဟု နမ့်ခမ်းမြို့ဒေသခံ ကြံတောင်သူတစ်ဦးက သျှမ်းသံတော်ဆင့်ကို ပြောသည်။

TNLA တပ်ဖွဲ့မှ စက်လှေဆိပ်ကို ရုတ်တရက် ပိတ်လိုက်ခြင်းကြောင့် တရုတ်ဘက်သို့ တင်ပို့မည့် ကြံကားများလည်း နောင်တောင်း စက်လှေဆိပ်တွင် ၁၅ စီးထက်မနည်း ရပ်ထားရသည့်အပြင် ကြံခင်းများထဲတွင် ခုတ်ထားသည့် ကြံချောင်းများလည်း ပျက်စီးဆုံးရှုံးမှုများ ရှိနေကြောင်း နမ့်ခမ်းဒေသခံများထံမှ သိရသည်။

“အခုလို ရုတ်တရက်ကြီး လှေဆိပ်ပေးမဖြတ်တော့ ခုတ်ထားတဲ့ ကြံချောင်းတွေက ကြံခင်းထဲမှာ ပုံထားရတာ အများကြီး။ ကြံချောင်းက ခုတ်ထားပြီး ချက်ချင်းမပို့ရတော့ ဒီတိုင်းထားရင် ခြောက်သွားတယ်၊ အလေးချိန် လျော့သွားတာပေါ့။ ကုမ္ပဏီရောက်သွားရင်လည်း ကြံက မလှတော့တာရယ်၊ တန်လျော့တာနဲ့ဆို ငွေအပြည့် မရတော့ဘူး”ဟု နမ့်ခမ်းမြို့မှ ၎င်းကြံတောင်သူ အမျိုးသားက သျှမ်းသံတော်ဆင့်ကို ဆက်ပြောသည်။

ယခုကဲ့သို့ နမ့်ခမ်းမြို့နယ်ရှိ စက်လှေဆိပ်များကို TNLA တပ်ဖွဲ့က ဖြတ်သန်းခွင့်မပေးဘဲ ပိတ်ပင်ထားခြင်းနှင့် ပတ်သက်ပြီး သျှမ်းသံတော်ဆင့်မှ TNLA တပ်ဖွဲ့ထံသို့ ဆက်သွယ်မေးမြန်းထားသော်လည်း လက်ရှိအချိန်ထိ ပြန်လည်ဖြေကြားခြင်း မရှိသေးပေ။

နမ့်ခမ်းမြို့နယ်ကို ထိန်းချုပ်ထားသည့် တအာင်း(ပလောင်)တပ်ဖွဲ့ TNLA မှ မန်ဟောင်းနှင့် နောင်တောင်း စက်လှေဂိတ်များကို ကြိုတင်အသိပေးခြင်း မရှိဘဲ ရုတ်တရက် ဖြတ်သန်းခွင့် ပိတ်လိုက်ခြင်းဖြစ်ကြောင်း ဟိုဆိုင်း၊ မန်ခမ်း၊ နောင်မွန်းနှင့် နောင်ခိုရွာများမှ ကြံတောင်သူများမှာ အခက်အခဲဖြစ်နေကြောင်း နမ့်ခမ်းမြို့နယ် ကြံတောင်သူများက ပြောသည်။

“အခုက ဒီကြံရောင်းရမှ ဝင်ငွေရှိမှာဆိုတော့ အခက်အခဲကတော့ အများကြီးရှိတယ်။ ကြံရောင်းလို့ ရတဲ့ပိုက်ဆံနဲ့ပဲ တစ်နှစ်လုံး စားဝတ်နေရေး ဖြေရှင်းသွားရတာ။ ကြံစိုက်တုန်းကလည်း အရင်းအနှီးက ကုမ္ပဏီဆီက ယူထားရတာဆိုတော့ အဲ့ဒီအကြွေးတွေလည်း ပြန်ဆပ်ရမှာ။ မြေဩဇာဖိုး၊ အလုပ်သမားဖိုး ဒီဟာတွေလည်း ရှင်းရဦးမှာ”ဟု နမ့်ခမ်းဒေသခံ ကြံတောင်သူ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

လက်ရှိတွင် နမ့်ခမ်းမြို့နယ်မှ ကြံများကို တရုတ်ကုမ္ပဏီမှ ၎င်းတို့၏ ၁၂ ဘီးကားဖြင့် လာရောက်သယ်ယူကာ ကားတစ်စီးလျှင် ၃၀ မှ ၃၅ တန်အထိ တင်ဆောင်နိုင်ပြီး ကြံတစ်တန်လျှင် တရုတ်ငွေ ၃၀၉ ယွမ် ပေါက်ဈေးရှိကြောင်း နမ့်ခမ်းဒေသခံများထံမှ သိရသည်။

နမ့်ခမ်းမြို့နယ်မှ ထွက်ရှိသည့် ကြံများကို ဇန်နဝါရီလမှ စတင်၍ နောင်တောင်း-ပိန်းမိုင် နယ်စပ်ဂိတ်ရှိ ကုန်အဝင်အထွက် သီးသန့်ဂိတ်မှတဆင့် တရုတ်နိုင်ငံသို့ တင်ပို့နေပြီး ၎င်းဂိတ်အနီးတွင် သျှမ်းတပ် SSPP/SSA နှင့် တအာင်း(ပ‌လောင်)တပ်ဖွဲ့ TNLA တို့ နေရာယူထားသည်။