သျှမ်းပြည် ပင်လောင်းမြို့နယ် ဆောင်းပြောင်းနှင့်တောင်မဲသင်း တိုက်ပွဲအတွင်း စစ်ကောင်စီနှင့်လက်အောက်ခံ ပြည်သူ့စစ် PNA ဘက်က ထိခိုက်ကျဆုံးမှု များနေကြောင်း စုံစမ်းသိရသည်။

ပင်လောင်းမြို့နှင့် မိုင် ၂၀ ခန့်ကွာဝေးသော ဆောင်းပြောင်းကျေးရွာအနီးတွင် ယမန်နေ့ (မတ်လ ၁၈ ရက်)က ပြည်သူ့တော်လှန်ရေးအင်းအားစု PDFs နှင့် စစ်ကောင်စီတပ်၊ ပြည်သူ့စစ် PNA တို့အကြား တိုက်ပွဲပြင်းထန် ခဲ့ကြောင်း ပင်လောင်းမြို့ဒေသခံတစ်ဦးက ပြောသည်။

“မနေ့ကညဆောင်းပြောင်းဘက်မှာ တိုက်ပွဲတော်တော်လေးပြင်းထန်တယ်။ နေ့လယ် ၂ နာရီခွဲကနေ ညနေ ၅ နာရီခွဲအထိ ပစ်နေကြတာ။ စစ်ဘေးရှောင်တွေကတော့ မနေ့ကအထုတ်တွေကိုယ်စီဆွဲပြီး ဆိုင်ကယ်နဲ့ ထွက်တဲ့လူလည်းထွက်၊ ကားနဲထွက်လာတဲ့သူကထွက် ပြေးလာကြတာ” ဟု ၎င်းက ပြောသည်။

အဆိုပါ တိုက်ပွဲအတွင်း စစ်ကောင်စီနှင့် လက်အောက်ခံ ပြည်သူ့စစ် PNA ဘက်က ထိခိုက်ကျဆုံးမှုများပြီး ထိခိုက်ဒဏ်ရသည့် ၎င်းတို့တပ်ဖွဲ့ဝင် တပ်သားဦးရေ ၃၀ ခန့်ကို ကန်တာ(Canter)ကား ၂ စီးဖြင့် မြို့ထဲသို့ ဖြတ်ကာ သယ်ဆောင်လာခဲ့သည်ဟု မျက်မြင်ဒေသခံတစ်ဦးက ပြောသည်။

“မနေ့ကတော့ စစ်တပ်နဲ့ PNA ဘက်ကထိတာများတယ်။ ကျနော်တွေ့တာတော့ ကန်တားကားအပြည့် တစ်စီးရယ်၊ နောက်စစ်တပ်က တစ်စီးရယ် အထိခိုက်တွေနဲ့မြို့ထဲကို ဖြတ်လာတာ တွေ့တယ်။ အနည်းဆုံးကတော့ လူဦးရေ ၃၀ လောက်တော့ရှိတယ်” ဟု ၎င်းမျက်မြင်တစ်ဦးက ပြောသည်။

ထို့အပြင် တိုက်ပွဲကြောင့် ဆောင်းပြောင်း၊ တောင်မဲသင်း၊ နိမ့်နိန်း၊ တောင်စလုံး စသည့်ကျေးရွာများမှ စစ်ဘေးရှောင် ၃ ထောင်ခန့်က ထပ်မံထွက်ပြေးခဲ့ရပြီး ပင်လောင်းမြို့ပေါ်ရှိ ဘုန်းကြီးကျောင်းများနှင့် နောင်တရားမြို့ရှိ ဘုန်ကြီးကျောင်းများသို့ လာရောက်ခိုလှုံနေခဲ့ရကြောင်း သိရသည်။

ယင်းတိုက်ပွဲအခြေအနေနှင့် ပတ်သက်၍ ပင်လောင်းမြို့နယ်အတွင်း လှုပ်ရှားနေသည့် ပြည်သူ့ကာကွယ်ရေး တပ်ဖွဲ့ဝင် PDF တစ်ဦးက “ ဟုတ်တယ်။ မနေ့ကဆောင်းပြောင်းဘက်မှာ တော်လှန်ရေးအင်အားစုတွေ ပြန်တိုက်နေပါတယ်” ဟု သျှမ်းသံတော်ဆင့် ဖြေကြားသည်။

သို့သော် တိုက်ပွဲအသေးစိတ်ကိုတော့ တော်လှန်ရေးအင်းအားစုတပ်ဖွဲ့ဘက်က တရားဝင်ထုတ်ပြန်သွားမည်ဟု ပြောသည်။

တိုက်ပွဲအတွင်း ထိခိုက်ကျဆုံးမှုများသည့် စစ်ကောင်စီလက်အောက်ခံ ပြည်သူ့စစ် PNA က ပင်လောင်းမြို့ရှိ ရပ်ကွက်အုပ်ရေးမှူးကို ယမန်နေ့ (မတ်လ ၁၈) ရက် ညနေပိုင်းက အစည်းအဝေးခေါ်ခိုင်းစေပြီး ရိက္ခာထောက်ပံ့ကြေးအတွက် တစ်အိမ်လျှင် ကျပ်ငွေ ၆ သောင်း ထည့်ရန်၊ မထည့်ပါက ရှေ့တန်းတက်ရမည် ဖြစ်ကြောင်း ပင်လောင်းမြို့ခံတစ်ဦးက ပြောသည်။

“မနေ့ညကတော့ ကိုယ့်ရပ်ကွက်အုပ်ချုပ်ရေးမှူးက အစည်းအဝေးခေါ်တယ်။ တစ်အိမ်ကို ကျပ်ငွေ ၆ သောင်းထည့်ရမယ်။ အခုလို ထည့်ရတာက ရှေ့တန်းမှာတာဝန်ထမ်းနေတဲ့ စစ်သားတွေအတွက် ရိက္ခာထောက် ပံ့ကြေးလို့တော့ ပြောတယ်။ မထည့်နိုင်ရင်ရှေ့တန်းသွားရမယ်။ ရှေ့တန်းသွားရင် ထောက်ပံ့ပေးမယ်ဆိုပြီးလည်း ပြောတယ်။ ကျနော်တို့လူကြီး၊ လူငယ်တွေကတော့ ငြင်းတယ်။ ရှေ့တန်းမသွားဘူး၊ ပိုက်ဆံပေးလိုက်မယ်လို့ ဆုံးဖြတ်လိုက်တယ်” ဟု ၎င်းမြို့ခံတစ်ဦးက ပြောသည်။

ထိုရိက္ခာထောက်ပံ့ကြေးကိုလည်း မတ်လ ၂၀ ရက်မှာ နောက်ဆုံးရက်အဖြစ် ထည့်ရမည်ဖြစ်ကြောင်း၊ မထည့်ပေးပါက အရေးယူမည်ဖြစ်ကြောင်း ပြောဆိုထားသည်ဟု သိရသည်။

ပြီးခဲ့သည့် ၂၀၁၉ ခုနှစ် သန်းခေါင်စာရင်းအရ ပင်လောင်းမြို့ပေါ် အိမ်ခြေ (၂,၃၀၀) ကျော်ရှိရာ ပြည်သူ့စစ် PNA ၏ ရိက္ခာထောက်ပံ့ကြေးအတွက် စုစုပေါင်း ကျပ်သိန်းပေါင်း ၁၅၀၀ ဝန်းကျင်ရှိကြောင်း သိရသည်။