သျှမ်းပြည်တွင် ပြည်သူ့ စစ်မှုထမ်းရန်အတွက် အစားထိုးခေါ်ရန် ကျပ်ငွေ သိန်း ၁၀၀ ထိပေါက်ကြောင်း စုံစမ်း သိရသည်။

သျှမ်းပြည် မြို့နယ်များတွင် ယခု ရက်တစ်ပတ်အတွင်း ပြည်သူ့စစ်မှုထမ်းရန်အတွက် ရပ်ကွက်နှင့် ကျေးရွာ အုပ်ချုပ်ရေးမှူးမှ အစည်းဝေးပြုလုပ်ပြီး မဲနှိုက်ခေါ်ယူနေသည်။

ထိုပြည်သူ့ စစ်မှုထမ်းရန်အတွက် အစားထိုးခေါ်ယူရန် ကျပ်ငွေ သိန်း ၁၀၀ ကျော်ထိ ရှိကြောင်း အသက် ၄၀ ကျော် ဒေသခံအမျိုး သားတစ်ဦးက သျှမ်းသံတော်ဆင့်ကို ပြောသည်။

“ဒီမှာတော့ တစ်ရပ်ကွက်ကို တစ်ယောက်ပေါ့ခေါ်တာ။ ဒီနေ့လည်း တခြားရပ်ကွက်တွေကိုလည်းခေါ်နေတုန်း။ သူတို့ကတော့ အစားထိုးသွားခိုင်းမယ်ဆိုရင် တစ်အိမ်ကို ၁ သိန်း ထည့်ရမှာ။ရပ်ကွက် ၄ မှာဆိုရင်တော့ အိမ်ခြေ ၂၀၀ လောက်ရှိတယ်လေ။ အစားထိုးဖို့ ပိုက်ဆံက ၁၀၀ ကျော်ထပ်မနည်းဘူး။” ဟု မိုင်းနောင်မြို့‌ ဒေသခံ အမျိုးသားတစ်ဦးက ပြောသည်။

ထိုအပြင်အချို့မြို့နယ်များတွင် မူးယစ်ဆေးဝါးသုံးဆွဲသူများကို ပြည်သူ့စစ်မှုထမ်းရန် အတွက်လည်း ပိုက်ဆံပေးကာ အစားထိုးခေါ်ယူနေကြောင်း ဒေသခံများက သျှမ်းသံတော်ဆင့်ကိုပြောသည်။

“ ကျမတို့ကျတော့ မဲနှိုက်ဖို့သဘောမတူကြဘူး။အကုန်ညှိထားတာ။ အကုန်စုပြီး လူရှာပေးရင်ရတယ်ပြောတော့ ဆေးသမားတစ်ယောက်ကို ရှာပေးလိုက်ရတာ။ အကုန်စုပြီး‌တော့ သိန်း ၅၀ ကလည်း သူတို့ပေးရတာပေါ့။ သူလည်း သဘောတူတယ်။အခုကတော့ ကလေးတွေက အလုပ်သွားလုပ်နေတာလေ။ ကျနော်တို့ မိဘတွေပဲကျန်တာ။သူတို့က ကလေးမရရင် အမေကိုထောင်ထဲထည့်လည်း ကျမတို့က သဘောတူတယ်”ဟု မိုင်းယောင်းမြို့ ဒေသခံ အသက် ၄၀ ကျော်အမျိုးသမီးတစ်ဦးက ပြောသည်။

ပြည်သူ့စစ်မှုထမ်းရန် ခေါ်ယူပြီးနောက် အချို့လူငယ်များလည်း အခြားဒေသသို့ ထွက်ပြေးတိမ်းရှောင်ရန် နှင့် ထိုင်းနိုင်ငံသို့ သွားရောက်နေထိုင်ရန် အတွက်လည်း အခက်အခဲများရှိနေကြောင်း မိုင်းရှုးမြို့ လူငယ်တစ်ဦးက သျှမ်းသံတော်ဆင့်ကို ပြောသည်။

“အခုချိန်မှာက ပြေးဖို့မှ အဆင်မပြေတော့တာ။ ထိုင်းဘက်ဝင်ရအောင်လည်း လမ်းမှာ SSPP နဲ့ RCSS ကလည်း ဖမ်းနေတာလေ။ တကယ်လို့ပြေးပြီးထားပါတော့ အကုန်လုံးပြေးဖို့လည်းအဆင်မပြေဘူးလေ။ သူများ တွေကတော့ ပြေးနေကကြတာပဲ။မြို့ထဲလည်းအရင်လို မကျန်သလောက်ပေါ့။”ဟု မိုင်းရှူးမြို့ လူငယ်တစ်ဦးက ပြောသည်။

ပြည်သူ့စစ်မှုထမ်းဗဟိုအဖွဲ့ကို စစ်ကောင်စီက ဖွဲ့စည်းမှုနှင့် အတူ စစ်မှုထမ်းရန်အတွက် စတင်ဆင့်ခေါ် ကာ လူသစ်စုဆောင်းမှုကို သင်္ကြန်ကာလ ရုံးပိတ်ရက် အပြီး ဧပြီလအတွင်း စတင်မည်ဖြစ်ကာ ပထမ အသုတ် အနေဖြင့် လူ ၅,၀၀၀ အောက် စတင် ခေါ်ယူရန် လျာထားကြောင်း စစ်ကောင်စီ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ပြီးခဲ့သည့် (ဖေဖော်ဝါရီ ၁၃)ရက် BBC သတင်းဌာန၏ မေးမြန်းမှုကို ဖြေကြားထားသည်။

ယခု ပြဋ္ဌာန်းထားသည့် စစ်မှုထမ်းဉပဒေအရ အသက် ၁၈ နှစ်မှ အသက် ၃၅ နှစ်အတွင်း အမျိုးသမီးများနှင့် အသက် ၁၈ နှစ်မှ အသက် ၂၇ နှစ်အတွင်း အမျိုးသမီးများ စစ်မှုထမ်းရမည် ဖြစ်သည်။

စစ်မှုထမ်းရန်အတွက် စစ်သင်တန်းကာလကို ၃ လလျာထားပြီး တစ်နှစ်လျှင် ၄ ကြိမ် စစ်မှုထမ်းရန် ခေါ်ယူမည်ဟု ဆိုထားရာ တစ်နှစ်လျှင် ပြည်သူ ၂၀,၀၀၀ စစ်မှုထမ်းရန် ခေါ်ယူမည်ဖြစ်ကြောင်း သိရသည်။

၂၀၁၉ ခုနှစ် ကောက်ယူထားသည့် ကြားဖြတ်သန်းကောင်စာရင်းအရ စစ်မှုမထမ်းမနေရ ဉပေဒေနှင့် အကျုံးဝင်သူ မြန်မာနိုင်ငံသား အမျိုးသား ၆ ဒသမ ၃ သန်းနှင့် အမျိုးသမီး ၇ ဒသမ ၇ သန်း စုစုပေါင်း ၁၄ သန်းရှိသည်ဟု စစ်ကောင်စီက ထုတ်ပြန်ထားသည်။

ပညာရှင်ဟု သတ်မှတ်ခံရသည့် အမျိုးသားများအနေဖြင့် အသက် ၁၈ နှစ်မှ ၄၅ နှစ်အတွင်း၊ အမျိုးသမီးများ အနေဖြင့် အသက် ၁၈ နှစ်မှ ၃၅ နှစ်အတွင်း စစ်မှုထမ်းရမည်ဖြစ်သည်။
စစ်မှုထမ်းကာလသည် ၂ နှစ်အထိ ဖြစ်ပြီး အရေးပေါ်အခြေအနေဟု သတ်မှတ်ပါက စစ်မှုထမ်း ကာလကို ၅ နှစ်အထိ သက်တမ်းတိုးနိုင်ကာ စစ်မှုထမ်းရန် ငြင်းဆိုပါက ထောင်ဒဏ် ၅ နှစ်အထိ ချနိုင်ကြောင်းလည်း ဉပဒေ ပြန်ဋ္ဌာန်ထားသည်။