သျှမ်းပြည်နယ် တောင်ပိုင်း၊ ဖယ်ခုံနှင့် ပင်လောင်းမြို့နယ်ကြား ဒေသများတွင် စစ်ကောင်စီ PNO ပူးပေါင်းတပ်နှင့် KNDF ပူးပေါင်းတပ်ဖွဲ့များ တိုက်ပွဲ ပြင်းထန်နေကြောင်း ဒေသခံများနှင့် စစ်ရေးသတင်းရင်းမြစ်က ယနေ့ (မတ်လ ၁၇) ရက်နေ့တွင် ပြောသည်။
ဖယ်ခုံမြို့နယ်နှင့် ဆက်စပ်နေသည့် ပင်လောင်းမြို့နယ်၊ လုံးပျဥ်ကျေးရွာအုပ်စု၊ တောင်မဲသင်းကျေးရွာနှင့် အနီးတဝိုက်တွင် ယနေ့ (မတ် ၇)ရက် နံနက်ပိုင်းတွင် တိုက်ပွဲ စတင်ခဲ့ပြီး လက်ရှိ တိုက်ပွဲ ပြင်းထန်နေသဖြင့် ထွက်ပြေး တိမ်းရှောင်နေရကြောင်း ဒေသခံ တစ်ဦးကပြောသည်။
“ခုမနက် တိုက်ပွဲစဖြစ်လို့ အကုန်လုံး ပြေးနေရတယ်။ အရင်နေ့တွေကလည်းဖြစ်တယ်။ အရင်နှစ် ကတည်းက တိုက်ပွဲဖြစ်လို့ ခဏခဏပြေးနေရတာ။ တောင်မဲသင်း တစ်ရွာထဲ မဟုတ်ဘူး၊ တောင်စလုံး၊ မြောက်စလုံး၊ တောင်လုံးပျဥ် အဲရွာတွေကော ပြေးနေရတယ် ကြားတယ်” ဟု ဒေသခံက ပြောသည်။
တိုက်ပွဲအတွင်း စစ်ကောင်စီတပ် လက်နက်ကြီး ပစ်ခတ်နေကာ နှစ်ဖက်တပ် ထိခိုက်သေဆုံးမှုနှင့် ပြည်သူလူထု ထိခိုက်မှု ရှိမရှိကိုမူ စုံစမ်းမေးမြန်းနေဆဲ ဖြစ်သည်။
လက်ရှိ ဖယ်ခုံနှင့် ပင်လောင်းကြားရှိ လမ်းများကို စစ်ကောင်စီ PNO ပူးပေါင်းတပ်က ပိတ်ဆို့ထားသည့် နည်းတူ လမ်းများ အသုံးပြု သွားလာမှု မပြုရန် တော်လှန်ရေးတပ်များက သတိပေးထားသည်။
ကရင်နီပြည်နယ်နှင့် ဆက်စပ်နေသည့် ဖယ်ခုံနှင့် ပင်လောင်ကြားရှိ နောင်ဝိုး၊ ဗန်းမောက်နှင့် နမ်းဖောမူ ဒေသတွင် တိုက်ပွဲ အပြင်းအထန် ဖြစ်ပွားနေသဖြင့် ပြည်သူများ ကုန်းလမ်းသာမက ရေလမ်း အသုံးပြု ခရီးသွားလာခြင်း မပြုလုပ်ပါရန်နှင့် ဘေးလွတ်ရာသို့ အမြန်ဆုံး တိမ်းရှောင်ပေးရန် ယမန်နေ့တွင် KNDF က မေတ္တာရပ်ခံ ထုတ်ပြန်ထားသည်။
ပြီးခဲ့သည့် မတ်လ ပထမပတ်က စတင်ကာ ပင်လောင်းမြို့နယ် တောင်ဘက်၊ ဗန်းမောက်၊ မိုင်းဖြတ်၊ နမ်းဖာမူနှင့် ဆောင်းပြောင်းရွာသို့ စစ်ကောင်စီ PNO ပူးပေါင်းတပ် အင်အားဖြည့် တပ်စွဲပြီးနောက် မတ်လ ၁၀ ရက်နေ့တွင် တိုက်ပွဲစတင် ဖြစ်ပွားရာက ယခုကဲ့သို့ ဒေသတွင်း တိုက်ပွဲ ပြင်းထန်လာခြင်းဖြစ်ကြောင်း စစ်ရေးသတင်းရင်းမြစ်က ဆိုသည်။
“အဲဒီဒေသက ပေါက်ထွက်သွားရင် နေပြည်တော်ကို ခြိမ်းခြောက်နိုင်တယ်။ အဲတော့ တပ်ဘက်က ထိန်းချုပ်ဖို့ကြိုးစားမှာပဲ။ ခုတိုက်ပွဲမှာ PNO အကျများတယ်လို့တော့ ကြားတယ်။ အသေးစိတ်တော့ မသိရသေးဘူး” ဟု စစ်ရေးသတင်းရင်းမြစ်က ရှင်းပြသည်။
လက်ရှိ ဖြစ်ပွားနေသည့် တိုက်ပွဲများကြောင့် ထောင်နှင့်ချီသည့် ဒေသခံများ ထွက်ပြေးနေရပြီး အများစု ပင်လောင်းမြို့နယ်အတွင်းသို့ ထွက်ပြေးတိမ်းရှောင်လာကြသည်။
