ကချင်ပြည် ဝိုင်းမော်မြို့နယ် တိုက်ပွဲအတွင်း ပိတ်မိနေသည့် ပြည်သူ နှစ်ထောင်ကျော်ကို ကယ်ထုတ် နိုင်ခဲ့ပြီး စားနပ်ရိက္ခာနှင့် နေရာထိုင်ခင်း အခက်အခဲများကြုံတွေ့နေရကြောင်း စုံစမ်းသိရသည်။

ဝိုင်းမော်မြို့နယ်တွင် စစ်ကောင်စီနှင့် KIA တို့ဖြစ်ပွားခဲ့သော တိုက်ပွဲများကြောင့် ရွှေညောင်ပင်၊ အောင်မြေ(၁)နှင့် အောင်မြေ(၂)ကျေးရွာအတွင်း ပိတ်မိနေသော ဒေသခံများက ယမန်နေ့ (မတ်လ ၁၃) ရက်တွင် ကယ်ထုတ်နိုင်ခဲ့ကြောင်း ဝါရှောင် ဆရာတော်က သျှမ်းသံတော်ဆင့်ကို မိန့်ကြားသည်။

“ သူတို့တွေကတော့ ဝိုင်းမော်မြို့နယ်၊အောင်မြေ ၂ နဲ့ ရွှေညှောင်ပင် နဲ့ စစ်ပွဲအတွင်းမှာ ပိတ်မိတဲ့ ပြည်သူတွေ ကို ဘုန်းဘုန်းတို့ မနေ့ကမှ သွားကယ်လာကြတာ။လူပေါင်း ၂ ကျော် လောက်တော့ရှိတယ်။ အကုန်လုံးက ရွာမှာ မနေရဲကြတော့ဘူးလေ။”ဟု ဝါရှောင် ဆရာတော်က မိန့်သည်။

လက်ရှိတွင် ထို စစ်ဘေးရှောင် ၂ ထောင်ကျော်ကို သိမ်ကြီးစုကျောင်းတိုက်၊ ဝန်းသိုကျောင်းတိုက် စသည့် နေရာများတွင် ထားရှိပြီး၊ စားနိပ်ရိက္ခာနှင့် နေရာထိုင်ခင်းအခက်အခဲများ ကြုံတွေ့ နေရကြောင်းသိရသည်။

“လူတွေက အခုမှ ၄ နေရာလောက်ကို ဖြန့်ပြီးပို့ထားရတယ်။မနေ့ကမှ ရောက်တာဆိုတော့ အကုန်လုံး ခက်ခဲနေတာပေါ့။အိမ်သာတွေ၊ရေတွေ၊အမျိုးသမီးနဲ့ပတ်သက်တာတွေအများကြီးပေါ့ လိုတယ်။ စားဖို့နဲ့ နေရာထိုင်ခင်းအတွက်က အခက်ခဲဖြစ်နေတာပေါ့။အခုတော့ စာရင်းတွေ ကောက်နေတုန်း။”ဟု ဝါရှောင် ဆရာတော် ကဆက်မိန့်ကြားသည်။

ဝိုင်းမော်မြို့နယ်တွင် ပြီးခဲ့သည့်မတ်လ ၇ ရက်မှစ၍ KIA၊ PDF ပူးပေါင်းတပ်များနှင့် စစ်ကောင်စီတပ်တို့ တိုက်ပွဲဖြစ်ပွားခဲ့ပြီး မတ်လ ၁၄ ရက်နေ့အထိ တိုက်ပွဲဆက်လက်ဖြစ်ပွားနေကြောင်း သိရသည်။