သျှမ်းပြည် မြောက်ပိုင်း သီပေါမြို့ နှင့် ကျောက်မဲမြို့ကြား ကို တအာင်း(ပလောင်) အမျိုးသားလွတ်မြောက်ရေးတပ်မတော် (TNLA)က ယနေ့ (မတ် ၁၃)ရက် နံနက်ပိုင်းမှ စတင်ကာ ဖြတ်သန်းခွင့်မပြုကြောင်း စုံစမ်းသိရသည်။
သျှမ်းပြည် မြောက်ပိုင်း သီပေါမြို့ နှင့် ကျောက်မဲမြို့ကြားရှိ ကျင်သီတံတားတွင် TNLA က ယနေ့ (မတ်လ ၁၃) ရက် နံနက်ပိုင်းတွင် သွားလာခွင့် ပိတ်ထားကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“ပိတ်တာက ကျောက်မဲနဲ့ သီပေါကြား ကို ပေးမဖြတ်တာပါ။ အစက သီပေါအဝင် ကျင်သီတံတားကလေ လမ်းလျှောက်ဖြတ်ပြီး ကားတစ်ဆင့်ပြန်စီးရတာ။ အခုက ပေးမဖြတ်တော့လို့ သီပေါတိုးဂိတ်နဲ့ အဲ့ ကျင်သီတံတား က ၆မိုင် ၇မိုင်လောက်ပဲဝေးတယ်”ဟု ဒေသခံအမျိုးသားတစ်ဦးက ပြောသည်။
ပြီးခဲ့သည့် ဖေဖော်ဝါရီ နောက်ဆုံးပတ်တွင်လည်း စစ်ကောင်စီတပ်သည် မိုင်းရယ်မြို့ မှတဆင့် သီပေါမြို့သို့ ဦးတည်ပြီး ၁၂ဘီးကား အစီးရေ ၂၀ကျော် မောင်းနှင်းသွားကြောင်း သိရသည်၊
ဆက်လက်ပြီး မတ်လ ပထမပတ်အတွင်း ကျောက်မဲမြို့အခြေစိုက် စစ်ကောင်စီတပ် စကခ-(၁)၊ ခမရ-၅၀၁/၅၀၂ နှင့် အမြောက်တပ်များမှ စစ်ကောင်စီတပ်သား အများအပြားသည် အနီးပတ်ဝန်းကျင်ရှိ ကျေးရွာများသို့ စစ်အင်အားဖြန့်ကျက်နေကြောင်း ကျောက်မဲဒေသခံများက ပြောသည်။
” ပြည်သူတွေကတော့ တိုက်ပွဲတွေ ပြန်ဖြစ်လာမှာ ကြောက်နေတာ။ အခုက ဘာကြောင့် လမ်းကို ပိတ်လိုက်လဲဆိုတာ မသိဘူး” ဟု သီပေါ ဒေသခံ အမျိုးသားတစ်ဦးက ထပ်လောင်းပြောသည်။
သီပေါမြို့နယ်အတွင်း ၂၀၂၃ နိုဝင်ဘာလ ၁၂ ရက်တွင် ဗုံးခွဲဖျက်ဆီးခံခဲ့ရသည့် ကျောက်မဲ-သီပေါအကြားရှိ ကျင်သီတံတားနှင့် ဒီဇင်ဘာလ ၁ ရက်က စစ်ကောင်စီတပ်နှင့် TNLA တပ်ဖွဲ့တို့၏ နှစ်ဘက်တိုက်ပွဲအကြား အလုံးစုံဖျက်စီးခံခဲ့ရသည့် သီပေါ-လားရှိုးအကြားရှိ စဉ့်အင်တံတားတို့အား လက်ရှိအချိန်အထိ ပြန်လည်ပြုပြင်နိုင်ခြင်း မရှိသေးပေ။
Leave a Comments