သျှမ်းပြည် သီပေါမြို့ ဝမ်ဟိုင်းကျေးရွာအုပ်စု နမ့်ဟူးနွဲ့ကျေးရွာရှိ နေအိမ်တစ်လုံးကို တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) မှ ညအချိန်မတော် ဝင်ရောက်ပြီး၊ အိမ်ရှင်အမျိုးသားကို အကြောင်းမဲ့ သေနတ်ဒင်းဖြင့်ရိုက်နှက်ခဲ့ကြောင်း စုံစမ်းသိရသည်။
လွန်ခဲ့သည့် မတ် ၁၀ရက် ညသန်းခေါင် အချိန်တွင် သီပေါမြို့ ဝမ်ဟိုင်းကျေးရွာအုပ်စု၊ နမ့်ဟူးနွဲ့ ကျေးရွာရှိ နေအိမ်တစ်လုံးထဲသို့ TNLA တပ်သား(၆)ဦးက စစ်ယူနီဖောင်းဝတ်ဆင်ပြီး အတင်းအဓမ္မ ဝင်ရောက်ကာ အိမ်ရှင်အမျိုးသားကို သေနတ်ဒင်းဖြင့် အကြောင်းမဲ့ ရိုက်နှက်ခဲ့ကြောင်း ဖြစ်စဥ်ကို သိသည့် အမျိုးသားတစ်ဦးက သျှမ်းသံတော်ဆင့်ကိုပြောသည်။
“ညသန်းခေါင် အချိန် တံခါးကို သေနတ်နဲ့ထုပြီး ဆောင့်ကန်ဝင်လာတာ။ အဲ့မှာ အိမ်ရှင်အမျိုးသားကို ဆွဲထုတ်ပြီး သေနတ်ဒင်းနဲ့ထုရိုက်တာပဲ။ ဒဏ်ရာကတော့ ခေါင်းမှာ ညိုမဲဒဏ်ရာရသွားတယ်” ၎င်းအမျိုးသားက ဆိုသည်။
အဆိုပါ TNLA တပ်သား(၆)ဦး အရပ်သားအိမ်ထဲသို့ အတင်းအဓမ္မ ဝင်လာစဥ်တွင် ထိုအိမ်ထဲတွင် မိသားစုဝင် ၄ဦးနေထိုင်ပြီး၊ အိမ်ရှင်အမျိုးသားကို သေနတ်ဒင်းနဲ့ရိုက်နှက်ချိန်တွင်လည်း “ သတိထားပြီးနေ၊ နောက်ဒီထက်နာမယ်”ဆိုပြီး ခြိမ်းခြောက်ပြောဆိုကာ ပြန်ထွက်သွားကြောင်း နမ့်ဟူးနွဲ့ကျေးရွာ ဒေသခံ အမျိုးသား တစ်ဦးက ထပ်လောင်းပြောသည်။
TNLA တပ်သားများသည် ညအချိန်မတော် အရပ်သားနေအိမ်ထဲသို့ အတင်းအဓမ္မဝင်ရောက်ပြီး အိမ်ရှင် အမျိုးသားကို သေနတ်ဒင်းဖြင့်ရိုက်နှက်မှုကြောင့် ပြည်သူများနောက်ထပ်မံလာရောက်ပြီးပြုလုပ်မည်ကို စိုးရိမ်နေကြောင်း သိရသည်။
ထို့အပြင် မတ်လ ၉ ရက်မှ စတင်ကာ ယနေ့အချိန်အထိ နမ့်ဟူးနွဲ့ကျေးရွာအတွင်း အဝင်အထွက်လမ်းများ အားလုံးကို TNLA က တားမြစ်ပိတ်ပင်ထားပြီး ဒေသခံများ တောင်ယာခြံ သွားခွင့်လည်း ပိတ်ပင်ထားကြောင်း နမ့်ဟူးနွဲ့ ဒေသခံတစ်ဦးက သျှမ်းသံတော်ဆင့်ကို ပြောသည်။
ယင်းကဲ့သို့ ကိစ္စဖြစ်စဥ် နှင့် ပတ်သက်ပြီး တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) ၏ ပြန်ကြားရေး ဌာန နှင့် ပြောရေးဆိုခွင့် ရှိသူထံသို့ ဖုန်းဖြင့် ဆက်သွယ်သော်လည်း အဆက်အသွယ်မရရှိခဲ့ပေ။
၁၀၂၇ စစ်ဆင်းရေး သီပေါမြို့နယ်တွင်း စတင်ချိန်မှ စတင်ကာ TNLA တပ်သားများက မြို့နယ်တွင်းရှိ ကျေးရွာများ အချို့၌ TNLA တပ်သားများက နေရာယူ တပ်စွဲနေထိုင်ကြောင်း သိရသည်။
၁၀၂၇ စစ်ဆင်ရေး အတွင်း ဗုံးခွဲဖျက်ဆီးခံထားရသည့် သီပေါမြို့မှ ကျောက်မဲ-သီပေါအကြားရှိ ကျင်သီတံတား၊ သီပေါ-လားရှိုးအကြားရှိ စဉ့်အင်တံတား၊ သီပေါ-နမ္မတူအကြားရှိ မိုးတေတံတားတို့အား လက်ရှိအချိန်အထိ ပြန်လည်ပြုပြင်နိုင်ခြင်း မရှိသေးကြောင်း သီပေါဒေသခံများထံမှ သိရသည်။
Leave a Comments