သျှမ်းပြည် ဆီဆိုင်-ဆိုက်ခေါင်ကြားရှိ ပင်စုံလမ်းခွဲတွင် ပအိုဝ်းပြည်သူ့စစ် PNO အဖွဲ့နာမည်ခံပြီး ဦးခွန်သန်းထိုက်အောင် (ခ) သန်းထိုက်အောင်ဆိုသူမှ ပိုက်ဆံတောင်းနေကြောင်း ဒေသခံတစ်ဦး၏ သတင်းပေးပို့ချက်အရ သိရသည်။

ပအိုဝ်းပြည်သူ့စစ် PNO အဖွဲ့နာမည်ခံဖြင့် ဆိုက်ခေါင်စံပြကျေးရွာ ရပ်ကွက်သူကြီးဆိုသူ ဦးခွန်သန်းထိုက်အောင် (ခ) ဦးထိုက်အောင်က ရပ်ရွာလုံခြုံရေးအတွက်ဟုဆိုကာ မတ် ၁ ရက်မှစ၍ ဆီဆိုင်-ဆိုက်ခေါင်ကြားရှိ ပင်စုံလမ်းခွဲမှာ ဂိတ်အသစ်ဖွင့်ခဲ့ကြောင်း သိရသည်။

ထို့နောက် ပင်စုံလမ်းခွဲဂိတ်သို့ ဖြတ်လာသည့် ကားများကို တစ်စီးလျှင် ၅ ထောင်ကျပ်၊ စက်သုံးဆီ တင်ဆောင်လာပါက ၂၀ လီတာတစ်ဗူးကို ၃ ထောင်ကျပ်၊ ပီပါ ၁ လုံးကို ၁၅,၀၀၀ ကျပ်နှင့် ပီပါ ၁၀ လုံးကို ၁၅၀,၀၀၀ ကျပ် စသည့်ဖြင့် တောင်းခံနေကြောင်း ဆီဆိုင်မြို့နယ် ကားသမားတစ်ဦးကပြောသည်။

“အစကတော့ ဟုတ်ပါတယ်။ ရည်ရွယ်ချက်ကတော့ လုံခြုံရေးပေါ့။ အခုတော့ ကားတစ်စီးကို ၅ ထောင်ကျပ်၊ ဒီဇယ်-ဓာတ်ဆီ လီတာ ၂၀ တစ်ဗူးကို ၃ ထောင်ကျပ်၊ ပီပါ ၁ လုံးကို ၁၅,၀၀၀ ကျပ် တောင်းတယ်။ ငွေပေးရင် အကုန်သယ်လို့ရတယ်။ ပိုက်ဆံမပေးရင် ဒီဇယ်၊ ဓာတ်ဆီ အကုန်သိမ်းယူပါတယ်။ ပြောင်းတင်တဲ့ကားတွေလည်း ပိုက်ဆံတောင်းနေတယ်” ဟု ၎င်းကပြောသည်။

ထို့အပြင် လုံခြုံရေးဂိတ်စောင့်ပေးရန်အတွက် ဆိုက်ခေါက်ကျေးရွာ မင်္ဂလာရပ်ကွက်နှင့် တံတားဦးရပ်ကွက်မှ ဒေသခံများကို အလှည့်ကျစနစ်ဖြင့် တစ်ရက်လျှင် ၅ ဦးအထိ စောင့်ပေးရကြောင်း သိရသည်။

လက်ရှိတွင် တိုက်ပွဲကြောင့် ဒေသခံများသည် စားဝတ်နေရေးအတွက် ခက်ခဲနေချိန် ပအိုဝ်းပြည်သူ့စစ် PNO အဖွဲ့အစည်းအနေဖြင့် ကူညီပေးရန်လိုအပ်ပြီး ပိုက်ဆံတောင်းခံခြင်းများ မဖြစ်သင့်ကြောင်း ဆိုက်ခေါင်ကျေးရွာ လူငယ်တစ်ဦးက တောင်းဆိုသည်။

“အမှန်တကယ် တောသူ၊ တောင်သားတွေက ခြံလုပ်စားရတာလေ။ ကိုယ့်လူမျိုး အချင်းချင်း ဒီအခြေအနေမှာ ကူညီရိုင်းပင်းရမှာလေ။ ဒီလိုလုပ်နေတာကတော့ မဖြစ်သင့်ဘူး။ တာဝန်ရှိ PNO လူကြီးမင်းများကနေ တာဝန်ယူ ဖြေရှင်းသင့်တယ်။ လက်အောက်ငယ်သားတွေကလည်း ပိုက်ဆံတောင်းဖို့ပဲ သိတယ်။ ကားတစ်စီးလာရင် ဘယ်လို တောင်းရမလဲပဲသိတယ်။ ကျန်တာမကြည့်တော့ဘူး” ဟု ၎င်းကထပ်လောင်းပြောသည်။

အလားတူ ဆီဆိုင်မြို့နယ် ပုံးအင်းဒေသနှင့် တောင်ကြီးမြို့နယ် ပအိုဝ်းလူမျိုး အများစု နေထိုင်သည့် ပအိုဝ်းပြည်သူ့စစ် PNO အဖွဲ့မှ ဒေသခံများထံ ကျပ်ငွေ ၁ သိန်းမှ ၁၀ သိန်းအထိ အခွန် (ဆက်ကြေး) ကောက်ခံနေလျှက်ရှိသည်။