သျှမ်းပြည် ဆီဆိုင်မြို့နယ်တွင် စစ်ကောင်စီမှ လက်နက်ကြီး၊ဒရုန်းများ အဆက်မပြတ် ပစ်ခတ်ခဲ့မှုကြောင့် ဘာသာရေး အဆောက်အဦး၊ဈေးနှင့် နေအိမ်အများအပြား ပျက်စီးကြောင်း စုံစမ်းသိရသည်။

ဆီဆိုင်မြို့အတွင်းတွင် ပြီးခဲ့သည့် မတ်လ ၁၁ ရက် နံနက် ၆ နာရီမှ ၁၁ နာရီအထိ တိုက်ပွဲဖြစ် ပွားခြင်မရှိဘဲ စစ်ကောင်စီမှ အကြောင်းမဲ့ လက်နက်ကြီးများဖြင့် အကြိမ် ၄၀ ခန့် ပစ်ခတ်ခဲ့ကြောင်း ပအိုဝ်းအမျိုးသား လွတ်မြောက်ရေးတပ်မတော် ( PNLA) က ယမန်နေ့ (မတ် ၁၂)ရက် ညပိုင်းတွင် ထုတ်ပြန်လာသည်။

ထိုနောက် နေ့လည် ၂ နာရီနောက်ပိုင်းတွင် ဆီဆိုင်မြို့ မြောက်ဘက်တွင် စစ်ကောင်စီနှင့် PNLA တို့ ညနေ ၄ နာရီထိ တိုက်ပွဲများ ဖြစ်ပွားခဲ့ကြောင်း ထုတ်ပြန်ချက်တွင်ရေးသားထားသည်။

ထိုစစ်ကောင်စီမှ လက်နက်ကြီး၊ဒရုန်းဖြင့် ပစ်ခတ်တိုက်ခိုက်မှုကြောင့် ဘာသာရေးအဆောက်အဦးများ ဈေးနှင့် နေအိမ်အများအပြား ထိခိုက် ပျက်စီးခဲ့ကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“တစ်မြို့လုံးမှာ ပျက်စီးမှုက၇၅%လောက်တော့ရှိနိုင်တယ်။ ပျက်စီးမှုအများဆုံးက ဟိုခဲရပ်ကွက်ပေါ့။ စျေးဆိုလို့ရှိရင် 100% လောက်ကို ပျက်စီးနေပြီ။ ဒါကတော့ပြော စရာစကားလုံး ရှာမတွေ့ရလောက်အောင် ကိုခံစားရတာပေါ့။ကိုယ်တွေတစ်ယောက်တည်းရဲ့ ခံစားချက်မဟုတ်ပါဘူး။ တစ်မြို့လုံး၊တစ်မြို့နယ်လုံးက ပြည်သူတွေလည်း ဒီလိုပဲခံစားကြရမှာပဲ။”ဟု ဒေသခံအမျိုးသားတစ်ဦးက ပြောသည်။

ဟိုပုံးမြို့နယ် မဲနယ်တောင်ဒေသကိုလည်း လက်နက်ကြီးများဖြင့် ဆက်လက်ပစ်ခတ်ခဲ့ပြီး စစ်ကောင်စီသည် လူ့အခွင့်အရေးချိုးဖောက်မှုများ စစ်ရာဇဝတ်မှုများကို ပေါ်ပေါ်တင်တင် ကျူးလွန်းနေလျက် ရှိကြောင်း PNLA ၏ ထုတ်ပြန်ချက်တွင်ရေးသားဖော်ပြထားသည်။

ပြီးခဲ့သည့် မတ်လ ၁၀ ရက်နေ့တွင်လည်းဆီဆိုင်မြို့နယ်တွင် စစ်ကောင်စီစစ်နှင့် PNLA တို့ တိုက်ပွားများ ပြင်းထန်စွာဖြစ်ပွားခဲ့ပြီး စစ်ကောင်စီမှ လက်နက်ကြီး ဒရုန်းဖြင့် ၁၀၈ ကြိမ်ခန့် ပစ်တိုက်ခိုက်ခဲ့ပြီး ပြည်သူနေအိမ် ၁၆ လုံးထက်မနည်း ပျက်စီးခဲ့သည်။

ဆီဆိုင်မြို့နယ်နှင့် ဟိုပုံးမြို့နယ်တွင် တိုက်ပွဲများကြောင့် အဆောက်အဦးပျက်စီးမှု ၁၉၆ လုံးရှိပြီး စစ်ဘေးရှောင်ဦးရေ စုစုပေါင်း ၈၉၂၇၈ ဦးနှင့် သေဆုံးသူ ၄၉ ဦးအထိရှိနေကြောင်း Pa-o youth Organization မှ ထုတ်ပြန်ခဲ့သည်။