သျှမ်းပြည် နောင်ချိုမြို့နယ်တွင် တိုက်ပွဲဖြစ်ပွားမည်ကို ကြံတောင်သူများ စိုးရိမ်နေကြပြီး၊ ဆမ္မဆယ် သကြားစက်လည်း ယာယီပိတ်ထားမည်ဖြစ်ကြောင်း စုံစမ်းသိရသည်။

ပြီးခဲ့သည့် ဖေ‌ဖော်ဝါရီလ တတိယပတ်မှ စတင်ပြီး နောင်ချိုမြို့နယ် သုံးဆယ်နှင့် ဆမ္မဆယ် ကျေးရွာအုပ်စုတွင် စစ်ကောင်စီတပ်နှင့် တအာင်း(ပလောင်)အမျိုးသားလွတ်မြောက်ရေးတပ်မတော် TNLA၊ PDF ပူးပေါင်းတပ်ဖွဲ့တို့အကြား စစ်ရေးတင်းမာနေပြီး တိုက်ပွဲဖြစ်ပွားမည်ကို စိုးရိမ်မှုကြောင့် ကြံတောင်သူများမှာ ကြံတင်ပို့ရာတွင် အခက်အခဲ ကြုံတွေ့နေရကြောင်း နောင်ချိုဒေသခံများက ပြောသည်။

“စစ်ရေးအခြေအနေက မတည်ငြိမ်သေးဘူး။ အခုက တချို့TNLA တပ်သားတွေ တပ်ဆုတ်သွားပေမယ့် ဓနု-PDF လည်း ရွာနားမှာ ရှိသေးတယ်။ ဂိတ်တွေဆောက်ပြီး စောင့်တာ သကြားစက်ရုံရောက်ဖို့ ၃/၄ ဂိတ် ဖြတ်ရတယ်။ စစ်ကောင်စီဂိတ်ဆိုရင်လည်း အစစ်အဆေး ကြမ်းတယ်။ ကားပေါ်ပါလာတဲ့ လူစာရင်းပေးရတယ်၊ လက်မှတ်ထိုးပြီးမှ သွားရတယ်”ဟု နောင်ချိုမြို့မှ ဒေသခံ ကြံတောင်သူတစ်ဦးက သျှမ်းသံတော်ဆင့်ကို ပြောသည်။

နောင်ချိုမြို့နယ် သုံးဆယ်နှင့် ဆမ္မဆယ် ကျေးရွာအုပ်စုအတွင်း တအာင်း(ပလောင်) အမျိုးသားလွတ်မြောက်ရေးတပ် TNLA နှင့် PDF ပူးပေါင်းတပ်များအပြင် ဓနုပြည်သူ့လွတ်မြောက်ရေးတပ်ဦး DPLF တို့လည်း သွားလာလှုပ်ရှားနေကြောင်း နောင်ချိုဒေသခံများထံမှ သိရသည်။

“တိုက်ပွဲဖြစ်လာရင်တော့ ကြံပို့နေတဲ့ လမ်းကြောင်းလည်း ပိတ်သွားနိုင်တယ်။ ပြီးတော့ ကြံကားတွေလည်း သွားလို့မရနိုင်ဘူး။ တိုက်ပွဲဖြစ်မှာ ကြောက်တော့ အခု ကြံတောင်သူတွေကတော့ မြန်မြန်ခုတ်နေရတယ်၊ ကြံကားတွေလည်း စက်ရုံမှာ အရမ်းများပြီး တန်းစီနေရတယ်။ အဲ့တာကြောင့် ဆမ္မဆယ်ဘက်က ကြံတွေကို အင်းဝိုင်းဘက်မှာ သွားချမယ်လို့ ပြောတာ”ဟု နောင်ချို ကြံတောင်သူတစ်ဦးက ပြောသည်။

ထို့အပြင် လက်နက်ကိုင်အဖွဲ့များမှ ထောင်ထားခဲ့သော မြေမြှုပ်မိုင်းနှင့် တိုက်ပွဲပြင်းထန်စဉ်က ကျရောက်ခဲ့ပြီး မပေါက်ကွဲသေးသော လက်နက်ကြီးများမှာ ဆမ္မဆယ် ကျေးရွာအုပ်စုရှိ ကြံခင်းများထဲတွင် အများအပြား ကျန်ရှိနေခြင်းကြောင့် အလုပ်သမားများမှာ စိုးရိမ်ထိတ်လန့်နေရကြောင်း နောင်ချိုဒေသခံများထံမှ သိရသည်။

“ပြီးခဲ့တဲ့လ ၂၅ ရက်က သကြားစက်ပိတ်မယ်လို့ ပြောတာလည်း ကြံတောင်သူတွေ တောင်းဆိုလို့ မပိတ်ဖြစ်လိုက်ဘူး။ ဒီလ ၅ ရက်နေ့ကျတော့လည်း ဆမ္မဆယ်စက်ရုံကို ပိတ်မယ်လို့ ပြောနေတာ၊ ဒါလည်း ကြံတောင်သူတွေက စက်ရုံမပိတ်ဖို့ အသနားခံ ပြောထားတာ။ ၁၅ ရက်နေ့ကျရင် ဆမ္မဆယ်က အမှတ်(၁)စက်ရုံကို ပိတ်ပြီး အင်းဝိုင်းမှာ ရှိတဲ့ အမှတ်(၃) စက်ရုံအသစ်မှာ သွားပို့ရမယ်လို့ ပြောတယ်”ဟု နောင်ချိုမြို့မှ ၎င်းကြံတောင်သူ အမျိုးသားက သျှမ်းသံတော်ဆင့်ကို ဆက်ပြောသည်။

လက်ရှိတွင် နောင်ချိုမြို့အခြေစိုက် အမြောက်တပ်အပြင် အုမ္မသီးနှင့် ရွှေညောင်ပင်ကျေးရွာအနီး စခန်းချတပ်စွဲထားသည့် စစ်ကောင်စီတပ်များမှ သုံးဆယ်ကျေးရွာဘက်သို့ နေ့စဉ်နီးပါး လက်နက်ကြီး ရမ်းသမ်းပစ်ခတ်လာခြင်းကြောင့် TNLA နှင့် PDF ပူးပေါင်းတပ်များက ရွာသားများကို ရွှေ့ပြောင်းရန် ပြောဆိုထားကြောင်း နောင်ချိုဒေသခံများထံမှ သိရသည်။

ပြီးခဲ့သည့် ဖေဖော်ဝါရီလ ၂၅ ရက်ကလည်း ကျောက်မဲမြို့နယ်တွင် ကြံခင်းထဲ ကြံတင်ရန်သွားသည့် အရပ်သား ၄ ဦးသည် မပေါက်ကွဲသေးသည့် လက်နက်ကြီးကို ထိခိုက်မိရာ ပေါက်ကွဲမှုဖြစ်ပွားခြင်းကြောင့် လူငယ် ၁ ဦး သေဆုံးပြီး ၃ ဦး ထိခိုက်ဒဏ်ရာရရှိခဲ့ကြောင်း ဒေသခံများထံမှ သိရသည်။