သျှမ်းပြည် လားရှိုးမြို့နယ် ဒေသခံများကို အလှည့်ကျရေခပ်ပေးရန်နှင့် ဆိုင်ကယ်ငှားရမ်းပေးရန်အတွက် တအာင်း(ပလောင်) အမျိုးသား လွတ်မြောက်ရေးတပ်မတော် TNLA မှအတင်းစေခိုင်းနေကြောင်း စုံစမ်းနေကြောင်းသိရသည်။
လားရှိုးမြို့နယ် နမ့်ပေါင်ကျေးရွာအုပ်စုနှင့် ခုန်စုန်ကျေးရွာအုပ်စုအတွင်း လှုပ်ရှားနေသည့် TNLA တပ်ဖွဲ့မှ တပ်ရင်း ၅၅၇ အောင်ဆာဆိုသူက ၎င်းတို့ ချိုးရေ၊ သုံးရေအတွက် ဒေသခံများကို အလှည့်ကျရေခပ်ခိုင်းစေသည့်အပြင် တပ်သားများ သွားလာရန်အတွက် ဆိုင်ကယ် နှစ် စီးမှ လေးစီးအထိ ပို့ဆောင်ခိုင်းကြောင်း အမည်မဖော်လိုသူ ဒေသခံတစ်ဦးက သျှမ်းသံတော်ဆင့်ကို ပြောသည်။
“သူတို့ရွာထဲကိုဝင်လာကတည်းကပဲ ဘယ်ရွာရောက်ရောက် ရွာသားတွေကို အလှည့်ကျဆိုင်ကယ်နဲ့ သွားချင်တဲ့နေရာပို့ခိုင်းတာ။ အခုကျသွားမပို့ရပေမယ့် တစ်နေ့ဆိုင်ကယ် ၂ စီးကို သူတို့ကိုပေးရတယ်။ အလှည့်ကျနဲ့ပေါ့။ နောက်ပြီး သူတို့ချိုးရေ၊ သုံးရေအတွက် မနက်တစ်ခေါက်၊ ညနေတစ်ခေါက် အလှည့် ရေခပ်ပေးရတယ်” ဟု အမည်မဖော်လိုသည့် ဒေသခံ အမျိုးသား တစ်ဦးက ပြောသည်။
အဆိုပါကျေးရွာအတွင်း TNLA တပ်ဖွဲ့မှ စတင်လှုပ်ရှားလာချိန် “၁၀၂၇ စစ်ဆင်ရေး” ကာလအစောပိုင်း ကတည်းကစပြီး ဒေသခံများသည် ရေခပ်၊ ဆိုင်ကယ်ငှားရမ်းပေးရန် အတင်းခိုင်းစေခြင်းခံရာ လက်ရှိအချိန်ထိ ၃ လကြာပြီဖြစ်သော်လည်း TNLA တပ်သားများအတွက် ပြုလုပ်ပေးနေရဆဲကြောင်း သိရသည်။
“စစ်သားတွေဆိုကတည်းကတော့ ကျနော်တို့မှာ ကြောက်နေရတာပေါ့။ ငါတို့ကိုရေလာပို့ပေးဆိုလည်း ကျနော်တို့က မပို့ချင်လည်း ပို့ပေးရတာ။ ဆိုင်ကယ်ရှာပေးဆိုလည်း ကျနော်တို့ဘက်က ဘာမှမတတ်နိုင်ဘူး။ ဆိုင်ကယ်မရှိရင်လည်း ဝယ်ပေးလိုက်တယ်။ ဘာမှမငြင်းရဲဘူး” ဟု ၎င်းကပြောသည်။
ယင်းကဲ့သို့ TNLA လက်အောက်ခံတပ်သားအချို့ လုပ်ရပ်များကြောင့် ကျေးရွာအတွင်း စုပေါင်းနေထိုင်ကြသည့် တိုင်းရင်းသားလူမျိုးအချင်းချင်း အမြင်မှားစေပြီး တစ်ဦး၊ တစ်ဖွဲ့ကို မုန်းတီးရာမှ လူမျိုးရေး ပဋိပက္ခ ဖြစ်စေလာနိုင်ကြောင်း၊ အထက်ပါလူကြီးများမှ လက်အောက်ခံငယ်သားများကို စိစစ်သင့်ကြောင်း ဒေသခံများက တောင်းဆိုထားသည်။
အလားတူ သီပေါမြို့နယ် မိုးတေကျေးရွာအုပ်စု၊ ပန်လန်းရွာကျေးရွာနှင့် နားကြူကျေးရွာအကြား လှုပ်ရှားနေသည့် TNLA တပ်ဖွဲ့ကလည်း ဒေသခံများကို ထမင်းဟင်းချက် ပို့ပေးရန် အတင်းစေခိုင်းခဲ့ကြောင်း သိရသည်။
