Thursday, April 18, 2024

သျှမ်းတောင် မြို့အများအပြား တပတ်ကြာ မီးပျက်မှုကြုံနေရ

Must read

သျှမ်းပြည်တောင်ပိုင်း မြို့အများအပြား တစ်ပတ်ကျော်ကြာ မီးပြတ်နေပြီး ပြည်သူများ အခက်အခဲကြုံတွေ့ နေရကြောင်း စုံစမ်းသိရသည်။

သျှမ်းပြည် တောင်ပိုင်းအတွင်း ပအိုဝ်းအမျိုးသားလွတ်မြောက်ရေးတပ်မတော် (PNLA) နှင့် စစ်ကောင်စီတို့ တိုက်ပွဲပြင်းထန်ခဲ့ရာ ဖေဖော်ဝါရီ ၂၁ ရက်နေ့မှစပြီး မိုင်းပွန်မြို့ တွင် တစ်ပတ်ကျော်ကြာ မီးပျက်ခဲ့ပြီး၊ လက်ရှိမှာ လွိုင်လင် ၊ပင်လုံ၊လဲချား၊မိုင်းရှူး စသည့်မြို့များ မီးပျက်ကာ ဒေသခံ ပြည်သူများ အခက်အခဲကြုံနေရသည်။

ဖေဖော်ဝါရီလ ၂၈ ရက်တွင်လည်း လေကြောင်း၊ လက်နက်ကြီးကျည် ပစ်ခတ်မှုကြောင့် မိုင်းပွန် နှင့် လွိုင်လင်ကြားရှိ တာဝါတိုင်ပျက်စီးခဲ့သဖြင့် လျှပ်စစ်မီး ပြတ်ကာ မြို့နယ်အများအပြား မီးများ ပြတ်တောက်နေကြောင်း ဒေသခံများက သျှမ်းသံတော်ဆင့်ကိုပြောသည်။

“မိုင်းပွန်ကတော့ သူတို့တိုက်ပွဲစဖြစ်ကတည်းက မီးတွေပျက်နေတာ ခုထိမလာသေးဘူး။ တာဝါတိုင်တွေ လက်နက်ကြီးထိလို့ ပျက်တယ်ကြားတယ်။ မီးပြင်တဲ့လူတွေကလည်း တိုက်ပွဲတွေဖြစ်ကတည်းက လွိုင်လင်ဖက်မှာသွားနေနေကြတာ။”ဟု မိုင်းပွန်ဒေသခံအမျိုးသားတစ်ဦးက ပြောသည်။

ထိုပြင် တစ်ပတ်ကျော်ကြာ ပိတ်ထားသော မိုင်းပွန် တံတားကို ယနေ့ (မတ်လ ၁) ရက် နံနက်ပိုင်းတွင် ပြန်ဖွင့် လိုက်ကြောင်း သတင်းရရှိသည်။

မိုင်းပွန်မြို့နှင့် ဟိုပုံးမြို့ကြားတွင် တိုက်ပွဲများဖြစ်ပွားနေသော်လည်း လမ်းကို ပြန်လည်ဖွင့်လှစ် လိုက်သည့်အတွက် ဒေသခံနှင့် ကားသမားများအတွက်တော့ စိုးရိမ်နေရကြောင်း သိရသည်။

Leave a Comments

- Advertisement -spot_img

Latest article