သျှမ်းပြည် ကျိုင်းတုံမြို့နယ်မှ ဆယ်အိမ်မှူး တစ်ဦးသည် သေနတ်ဖြင့် ချောင်းမြောင်း ပစ်ခတ်ခံရပြီး သေဆုံးသွား ကြောင်း သိရသည်။
ပြီးခဲ့သည့် ဖေဖော်ဝါရီလ ၁၇ ရက်တွင် သေနတ်ဖြင့် ပစ်သတ်ခံရသည့် ကျိုင်းတုံမြို့၊ ပန်ယောင်းကျေးရွာမှ အသက် (၃၅) နှစ် ဆယ်အိမ်မှူး တစ်ဦးသည် အမျိုးသမီးဖြစ်သူ နှင့် လားဟူပွဲတော် အပြန် လမ်းတစ်ဝက် အရောက်၌ သေနတ်ဖြင့် ပစ်သတ်ခံရခြင်း ဖြစ်ကြောင်းသိရသည်။
“ပြန်လာတဲ့ လမ်းမှာ သစ်တုံး တစ်တုံးလမ်းပေါ် ကန့်လန့်ဖြတ်နေလို့ သူ့ အမျိုးသားက ဆိုင်ကယ်ပေါ်က ဆင်းပြီး အဲ့သစ်တုန်းကို ဖယ်ဖို့ သွားတဲ့ အချိန်မှာ သေနတ်နဲ့ ပစ်ခံရတာတဲ့၊ သေနတ်သံ ကြားကြားချင်း သူ့အမျိုးသမီးက ဆိုင်ကယ်ကို နောက်လှည့်ပြီး မောင်းပြေးသွားတာ၊ သူ့ယောက်ျား လဲသွားတာပဲ မြင်လိုက်မိတယ်ဆိုပဲ” ဟု နီးစပ်သူ တစ်ဦးက သျှမ်းသံတော်ဆင့်ကိုပြောသည်။
ယင်းကဲ့သို့ အမျိုးသား ဖြစ်သူ ဆယ်အိမ်မှူးမှ ပစ်ခတ် သတ်ဖြတ်ခံရခြင်း နှင့် ပတ်သက်ပြီး အမျိုးသမီး ဖြစ်သူ နှင့် ဆွေမျိုးတော်စပ်သူများက အမှုမှန်ပေါ်ပေါက်ပြီး ကျူးလွန်သူကို အရေးယူပေးစေလိုကြောင်း ရဲစခန်း နှင့် သက်ဆိုင်ရာ ဌာနများထံသို့ တိုင်ကြားထားသော်လည်း အကြောင်းထူး မရှိသေးကြောင်း သျှမ်းသံတော်ဆင့် ကိုဆက်ပြောသည်။
“ခုဆို အမှုကလည်း တစ်ပတ်လောက်ရှိလာပြီ။ နာရေးတောင် ပြီးသွားပြီ အမှုနဲ့ ပတ်သက်တာ မေးလိုက်ရင် ရဲစခန်း ဘက်ကလည်း စုံစမ်းနေတုန်းပဲ ဆိုပြီးတော့ပဲ အကြောင်းပြန်တယ်။ ဘာသဲလွန်စ ရနေလဲ၊ ဘယ်လောက် ထိ စုံစမ်းနေလဲဆိုတာလည်း မပြောဘူး။ ကျမတို့ကတော့ အမှုမှန် ပေါ်ပေါက်ရေးကိုပဲ လိုလားတယ်။ ကျူးလွန် သူ သူကိုလည်း ထိထိမိမိ အရေးယူပေးစေချင်တယ်” ဟု သျှမ်းသံတော်ဆင့်ကို ပြောသည်။
ပစ်မှုကျူးလွန်သူများကို အရေးယူ ဖမ်းဆီး နိုင်ခြင်းမရှိပါက နောက်နောင် အပစ်ကျူးလွန်သူများ အတင့်ရဲလာနိုင်ချေရှိပြီး တရားဥပဒေကို ကြောက်လန့်မှု မရှိကြမည်စိုးသည့်အတွက် ရဲများ၊ သက်ဆိုင်ရာများ ထိရောက်စွာ အလုပ်လုပ်ကိုင်စေလိုကြောင်းလည်း တောင်းဆိုထားကြသည်။
ပြီးခဲ့သည့် ဖေဖော်ဝါရီလ ၁၃ ရက် နှင့် ၁၁ ရက်တွင်လည်း ကျိုင်းတုံမြို့နယ်အတွင်း၌ ပေါက်ကွဲမှု နှစ်ကြိမ်တိုင် ဖြစ်ပွားခဲ့ပြီး ထိခိုက်ဒဏ်ရာရသူများလည်း ၅ ဦးထက်မနည်း ရှိခဲ့ကြောင်းသိရသည်။
