သျှမ်းပြည် ဟိုပုံး နှင့် မိုင်းပွန်တွင် စစ်ကောင်စီ နှင့် PNO ပြည်သူ့ စစ်တို့ လမ်းပိတ်ထားသဖြင့် ကားများပိတ်မိနေကြောင်း စုံစမ်းသိရသည်။
သျှမ်းပြည် ဟိုပုံးမြို့နှင့် မိုင်းပွန်မြို့ကြားရှိ ထမ်စမ်းဂူအနီးတွင် ယနေ့ (ဖေဖော်ဝါရီလ ၂၁) ရက် နံနက် ၁၀ နာရီခွဲ ဝန်းကျင်တွင် စစ်ကောင်စီ နှင့် PNO ပြည်သူ့ စစ်တို့ လမ်းများပိတ်ထားပြီး ဖြတ်သန်းသွား လာခွင့်မပြုကြောင်း ဒေသခံများက သျှမ်းသံတော်ဆင့်ကိုပြောသည်။
“ မိုင်းပွန်ကနေ ဟိုပုံးလမ်းကို ပိတ်ထားလိုက်ပြီ။ ထမ်စမ်းဂူမှာ စစ်ကောင်စီက သေနတ်နဲ့ပစ်ဖို့စောင့်နေတာတဲ့ ။ စေတီကနေ ပုံအယ်ကျေးရွာထဲကို ပစ်နေတာ။ ကျနော်တို့ ဆီအွန်ကျေးရွာမှာတော့ လမ်းတွေကို အကုန်လုံးပိတ်ထားလိုက်ပြီ။ ကျနော်တို့ အခုလည်း အိမ်ပြန်လို့မရတော့ဘူး”ဟု စစ်ဘေးရှောင်နေသူ အမျိုးသားတစ်ဦးက ပြောသည်။
တိုက်ပွဲပြင်းထန်နေသည့် ဟိုပုံးမြို့နယ်ထဲတွင် စစ်ကောင်စီက ထမ်စမ်းဂူ စေတီအနီးတွင် တပ်စွဲထားပြီး ခရီးသွားလာနေသူများကို သေနတ်ဖြင့် ပစ်ခတ်နေကြောင်း ဒေသခံ တစ်ဦးက ပြောသည်။
မိုင်းရှူး-တောင်ကြီးတို့ သွားနေသောကားများသည် မိုင်းပွန်နှင့် ဟိုပုံးလမ်း ဖြတ်သန်း သွားလာခွင့် မရှိသည့်အတွက် လှည့်ပြန်နေသော ကားများလည်းရှိနေကြောင်း ကားသမားတစ်ဦးက သျှမ်းသံတော်ဆင့်ကိုပြောသည်။
“မိုင်းပွန်-ထမ်စမ်းဂူနာ သူတို့ စစ်သားတွေစောင့်နေတာ။၁၀ နာရီလောက်မှာ ဟိုပုံးနား ရောက်တော့ ကားတွေအများကြီး တန်းစီပြီးတော့ ရပ်ထားတယ်။ အဲ့နဲ့ပြန်လှည့် လာလိုက်ရတယ်။ စောင့်နေတာ စစ်သားတွေက များတာပေါ့။မိုင်းရှူးကတော့လာတဲ့ကားတွေကတော့ လွိုင်လင် တောင်မှာ ပိတ်ထားတယ်ပြောလာတယ်။”ဟု ကိုယ်တိုင်ကြုံတွေ့ခဲ့သည့် ကားသမားတစ်ဦးက ပြောသည်။
ဟိုပုံးမြို့နယ်အတွင်းကို ယမန်နေ့ ဖေဖော်ဝါရီ ၂၀ ရက်နေ့မှစပြီးတော့ စစ်ကောင်စီက လေကြောင်းလိုင်းနဲ့ စတင်ပစ်ခတ်ခဲ့တာဖြစ်ပြီး၊ ပအိုဝ်းအမျိုးသားလွတ်မြောက်ရေးတပ်မတော် PNLAနှင့် စစ်ကောင်စီ၊ PNO ပြည်သူ့စစ်တို့တိုက်ပွဲများပြင်းထန်ခဲ့ကြောင်း သိရသည်။
ပအိုဝ်းအမျိုးသားလွတ်မြောက်ရေးတပ်မတော် (PNLA) ထိန်းချုပ်ထားသည့် ဆီဆိုင်မြို့ကို စစ်ကောင်စီတပ်က တင့်ကား၊ သံချပ်ကာကားများ အပါအဝင် စစ်အင်အား အလုံးအရင်း အသုံးပြု ထိုးစစ်ဆင်ရန် ပြင်ဆင်နေကြောင်း စစ်ရေးသတင်းရင်းမြစ်က ယမန်နေ့ (ဖေဖော်ဝါရီ ၂၀ ရက်) မှာ သျှမ်းသံတော်ဆင့်ကို ပြောသည်။
Leave a Comments