သျှမ်းပြည် မိုးမိတ်မြို့နယ်အတွင်း စစ်ဘေးတိမ်းရှောင်ထွက်ပြေးနေရသည့် ဒေသခံများ၏ နေအိမ်များသည် ဖောက်ထွင်းခံရပြီး ပစ္စည်းများ ခိုးယူခံရမှု ရှိနေကြောင်း စုံစမ်းသိရသည်။
ဒေသအတွင်း စစ်ရေးတင်းမာမှု ရှိနေသေးသည့် အခြေအနေများကြောင့် နေရပ်မပြန် ရဲကြသေးသည့် မိုးမိတ် ဒေသခံ စစ်ဘေးရှောင်များ၏ နေအိမ်သည် ဖောက်ထွင်းခံရပြီး ပစ္စည်းများခိုးယူခံရခြင်း ဖြစ်ကြောင်း ဖြစ်စဥ်ကို သိရှိသည့် ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
“လူမရှိတဲ့ အိမ်တိုင်းလိုလို ဖောက်ထွင်းခံနေရတာပဲ။ မြို့ထဲ ရှိနေတဲ့ သူတွေကလည်း မိုးချုပ်ပြီ ဆိုတာနဲ့ ဘယ်သူမှ ကိုယ့်ဝိုင်းကိုယ့်အိမ်ကနေ မထွက်ရဲကြဘူးလေ။ မြို့ပတ်တဲ့ စစ်ကောင်စီကားတွေ ရှိလည်း သူခိုးကတော့ ရအောင်ခိုးတာပဲ။ မနက်မိုးလင်းလာပြီဆိုရင် ဟိုအိမ်ဖောက်ခံရပြီ။ ဒီအိမ်ဖောက်ခံရပြီ ဆိုပြီး နေ့တိုင်းလိုလို ကြားရတယ်” ဟု လုံခြုံရေး အရ အမည်မဖော်လိုသူ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။
လက်ရှိမိုးမိတ်မြို့အတွင်း၌ အာဏာသိမ်း စစ်ကောင်စီတပ်မှ မြို့တွင်း ၊ မြို့ပြင် နေရာယူ တပ်စွဲထားပြီး ည မထွက်ရ အမိန့် နှင့်အတူ ညစဥ် ကင်းလှည့်နေသည့်အတွက် ဒေသခံများလည်း အပြင်ထွက်သွားလာခြင်း မပြုုလုပ်ရဲကြောင်း သိရသည်။
ထို့အပြင် မိုးမိတ်မြို့ပြင် နှင့် အနီးပတ်ဝန်းကျင်၌ တိုင်းရင်းသား လက်နက်ကိုင် နှင့် မဟာမိတ်တပ်များက နေရာယူ တပ်စွဲထားသည့်အတွက် ထိတွေ့တိုက်ပွဲ ထပ်မံ ဖြစ်ပွားလာမှာကို စိုးရိမ်နေသည့်အတွက် စစ်ဘေး ရှောင်နေသည့် ဒေသခံများ တချို့က နေရပ်မပြန်ရဲသေးကြောင်းလည်း အထက်ပါ အမျိုးသားက ဆက်ပြောသည်။
“လက်ရှိမှာ စစ်ရှောင်တွေက မန်ကန်ရွာဘက်မှာ အများစုရှိကြတယ်။ ဘုန်းကြီးကျောင်းမှာပေါ့နော်။ သူတို့လည်း နေရာထိုင်ခင်း အခက်အခဲတော့ ရှိနေကြတယ်။ တိုက်ပွဲ ထပ်ဖြစ်မှာစိုးလို့သာ နေရပ်မပြန်နိုင်ကြသေးတာ။ စားနပ်ရိက္ခာ အကူအညီတွေလည်း လိုအပ်နေတာတဲ့” ဟု အထက်ပါ အမျိုးသားက သျှမ်းသံတော်ဆင့်ကို ပြောသည်။
ပြီးခဲ့သည့် ဇန်နဝါရီလ ၈ ရက်နေ့မှာ ကချင်လွတ်လပ်ရေး တပ်မတော် (KIA) နှင့် ပူးပေါင်း တပ်ဖွဲ့ ဖြစ်သည့် ပြည်သူ့ကာကွယ်ရေးတပ် (PDF) တို့က မိုးမိတ်မြို့ရှိ စစ်ကောင်စီ တပ်စခန်းကို ဝင်ရောက်တိုက်ခိုက်ခဲ့မှုကြောင့် ထွက်ပြေးတိမ်းရှောင်ရသည့် စစ်ဘေးရှောင်များ ဖြစ်ကြောင်း သိရသည်။
အဆိုပါ တိုက်ပွဲသည် တစ်ပတ်ကျော်ကြာ ဖြစ်ပွားခဲ့ပြီး မိုးမိတ်မြို့မဈေး၊ အရပ်သားနေအိမ် အဆောက်အအုံများ မီးလောင်ပျက်စီးရသလို တိုက်ပွဲကြား အရပ်သား သေဆုံးမှု ၄၀ ထက်မနည်း ရှိနေကြောင်းလည်း သိရသည်။
Leave a Comments