သျှမ်းပြည် လောက်ကိုင်မြို့သို့ ခေတ္တရောက်ရှိနေသော သျှမ်းကျောင်းသားသမဂ္ဂ အလုပ်အမှုဆောင် တစ်ဦးနှင့်အတူ အခြားလူငယ် ၄ ဦးတို့သည် ကိုးကန့်တပ်ဖွဲ့ MNDAA ၏ အဓမ္မ ဖမ်းဆီးသွားကြောင်း စုံစမ်းသိရသည်။

ပြီးခဲ့သည့် ၂၀၂၃ နိုဝင်ဘာလ ၂၄ ရက်နေ့တွင် လောက်ကိုင်မြို့သို့ ခေတ္တရောက်ရှိနေသည့် သျှမ်းကျောင်းသားသမဂ္ဂ (TSU) အလုပ်အမှုဆောင်အဖွဲ့ဝင် အသက် ၂၄ နှစ်အရွယ်ရှိ စိုင်းညွန့်သည် စစ်ဘေးရှောင်များနှင့် လမ်းလျှောက်၍ နေရပ်ပြန်လာစဉ် ပါစင်ကျော်ကျေးရွာအနီးတွင် ကိုးကန့်တပ်ဖွဲ့ MNDAA ၏ အဓမ္မ တပ်သားစုဆောင်းခြင်းကို ခံလိုက်ရကြောင်း သျှမ်းကျောင်းသားသမဂ္ဂမှ ဖေဖော်ဝါရီလ ၁၇ ရက်တွင် သတင်းထုတ်ပြန်သည်။

“စိုင်းညွန့်က ဆယ်တန်းအောင်ထားတာ မကြာသေးဘူး၊ ကျောင်းဆက်တက်ဖို့ စောင့်နေတဲ့လူပါ။ သူက လောက်ကိုင် တိုက်ပွဲကြားမှာ ပိတ်မိသွားရင်းနဲ့မှ နိုဝင်ဘာ ၂၄ လောက်မှာ တိုက်ပွဲငြိမ်သွားပြီး ပြန်လို့ရပြီ ဆိုပြီးတော့ အရဲစွန့်ပြီး လမ်းလျှောက်ပြန်လာတာလို့ ပြောတယ်။ ပါစင်ကျော်ဂိတ် ရောက်တဲ့အခါကျတော့ သူရော သူငယ်ချင်းတွေရော ၅ ‌ယောက် အဖမ်းခံလိုက်ရတယ်”ဟု သျှမ်းကျောင်းသားသမဂ္ဂမှ ဦးဆောင်ကော်မတီဝင် ဗင်ဒါ က သျှမ်းသံတော်ဆင့်ကို ပြောသည်။

လောက်ကိုင်မြို့ ပါစင်ကျော်ဂိတ်အနီးတွင် စိုင်းညွန့်နှင့်အတူ ကိုးကန့်တပ်ဖွဲ့ MNDAA ၏ ဖမ်းဆီးခြင်းခံခဲ့ရသည့် အခြားလူငယ် ၄ ဦးမှာ အသက် ၂၀ မှ ၂၅ နှစ်အကြားဖြစ်ပြီး ၎င်းတို့(၅)ဦးစလုံးမှာ သျှမ်းမြောက် နမ္မတူမြို့နယ် ဇာတိဖြစ်ကြောင်း သိရသည်။

“အဲ့ ၅ ယောက် အဖမ်းခံလိုက်ရပြီး စစ်သားစုဆောင်းရေးကို ပို့ခံလိုက်ရတယ်လို့ သိရတယ်။ အဲ့တာကို ဘယ်လိုသိရလဲဆိုတော့ တစ်ယောက်က ထွက်ပြေးပြီး ပြန်လွတ်လာတော့မှ သူတို့က အဲ့လိုမျိုး အဖမ်းခံလိုက်ရတယ်ဆိုတာ ပြန်သိရတာ။ အဲ့တစ်ယောက်ကလည်း ဇန်နဝါရီလ ဒုတိယပတ်လောက်မှပဲ ပြန်လွတ်လာတာ”ဟု သျှမ်းကျောင်းသားသမဂ္ဂမှ ၎င်းဦးဆောင်ကော်မတီဝင် ဗင်ဒါ က သျှမ်းသံတော်ဆင့်ကို ဆက်ပြောသည်။

သျှမ်းကျောင်းသားသမဂ္ဂအနေဖြင့် စိုင်းညွန့် ဖမ်းဆီးခံရသည်ကို သိလျှင်သိချင်း သက်ဆိုင်ရာ အဖွဲ့အစည်းများထံသို့ ဆက်သွယ်ကာ ပြန်လည်လွတ်ပေးရန် အကူအညီ တောင်းခံခဲ့သော်လည်း မည်သည့်တုန့်ပြန်မှုမှ မရရှိခဲ့ကြောင်း ထုတ်ပြန်ချက်တွင် ရေးသားထားသည်။

စိုင်းညွန့် အပါအဝင် သျှမ်းလူငယ်များအား ကိုးကန့်တပ်ဖွဲ့ MNDAA မှ အဓမ္မ စစ်သားစုဆောင်းနေမှုများကို သျှမ်းကျောင်းသားများသမဂ္ဂမှ ထုတ်ပြန်ချက်တွင် ပြင်းထန်စွာ ကန့်ကွက်ထားသည်။

MNDAA တပ်ဖွဲ့အနေဖြင့်လည်း ဒေသတွင်း အတူနေ လူမျိုးစုများ စည်းလုံးညီညွတ်ရေးနှင့် ဘုံရန်သူကို ချေမှုန်းရေးအတွက် ရေရှည်ကို ရှေ့ရှုကာ အဓမ္မစစ်သား စုဆောင်းထားသော လူငယ်များကို ပြန်လွတ်ပေးရန်လည်း သျှမ်းကျောင်းသားများသမဂ္ဂမှ တောင်းဆိုထားသည်။

သျှမ်းမြောက်တွင် “၁၀၂၇ စစ်ဆင်ရေး”အတွင်း ထွက်ပြေးလာရသည့် အရပ်သားများကို ကိုးကန့်တပ်ဖွဲ့ (MNDAA) က အဓမ္မ စစ်သားစုဆောင်းခြင်းသည် ဥပဒေနှင့်မညီသည့် လူ့အခွင့်အရေး ချိုးဖောက်မှုဖြစ်ကြောင်း နိုင်ငံတကာ လူ့အခွင့်အရေး စောင့်ကြည့်အဖွဲ့ HRW က ဒီဇင်ဘာ ၂၁ ရက်တွင် အစီရင်ခံစာ ထုတ်ပြန်ထားသည်