တိုက်ပွဲပြင်းထန်နေသည့် ဆီဆိုင်မြို့တွင် ယာယီအပစ်ခတ်ရပ်ပြီး ဒေသခံများကို သုံးရက်သာ ပစ္စည်းပြန်သယ်ယူခွင့်ပြုမည်ဆိုသည့် သတင်းမှားဖြစ်သည်။

ဆီဆိုင်မြို့တွင် ပအိုဝ်းအမျိုးသားလွတ်မြောက်ရေးတပ်မတော် PNLA၊ ပူးပေါင်းတပ်ဖွဲ့များနှင့် စစ်ကောင်စီတပ်တို့အကြား တိုက်ပွဲဖြစ်ပွားနေသော်လည်း နှစ်ဖက်တပ်ဖွဲ့တို့သည် ယာယီအပစ်ခတ်ရပ်ပြီး (ဖေဖော်ဝါရီ ၁၈ ရက်မှ ဇန်နဝါရီ ၂၀ ရက်) အထိ သုံးရက်သာ ဒေသခံများကို ပစ္စည်းပြန်သယ်ယူခွင့်ပြုပေးမည်ဆိုပြီး ယခုရက်ပိုင်းအတွင်း လူမှုကွန်ရက်စာမျက်နှာပေါ်၌ ရေးသားဖြန့်ချိနေသည်။

သျှမ်းသံတော်ဆင့် အချက်အလက်စစ်ဆေးသူများအနေဖြင့် အဆိုပါ အကြောင်းအရာကို စစ်ဆေးမှုပြုလုပ်ခဲ့သည်။ ယင်းမှာသတင်းမှားဖြစ်နေကြောင်း တွေ့ရသည်။

လက်ရှိတွင် ဆီဆိုင်မြို့နယ်အတွင်း ပအိုဝ်းအမျိုးသားလွတ်မြောက်ရေး တပ်မတော် PNLA၊ ပူးပေါင်းတပ်ဖွဲ့ နှင့် စစ်ကောင်စီတို့အကြား တိုက်ပွဲဆက်လက်ဖြစ်ပွားနေဆဲ ဖြစ်ပြီး ပြည်သူများအနေဖြင့် မြို့အတွင်းသို့ ဝင်ရောက်သွားလာခွင့် မပြုသေးပေ။

အဆိုပါဆီဆိုင်မြို့ဝင်ရောက်နိုင်ကြောင်းဆိုသည့် သတင်းကြောင့် ယနေ့ (ဖေဖော်ဝါရီလ ၁၉ ရက်) နံနက်ပိုင်းအတွင်း ဆီဆိုင်မြို့သို့ ဝင်ရောက်ပြီး ပစ္စည်းသယ်သူကြသူများ မွေတော်ဘုရားအရှေ့ဘက် ဝါးတောရွာမြောက်ဘက်တွင် လက်နက်ကြီး ထိမှန်ကာ လူ ၁၀ ဦးထက်မနည်း ထိခိုက်ဒဏ်ရာရထားသည်။

ထို့အတူ ဆီဆိုင်မြို့အတွင်း ပစ္စည်းပြန်ယူခွင့်ပြုမည်ဆိုသည့် သတင်းမှာ မဟုတ်မမှန်မကန်ကြောင်း၊ စစ်ကောင်စီ၏ ထောက်ချောက်အကြံအစည်သာ ဖြစ်ကြောင်းလည်း ပအိုဝ်းအမျိုးသား ဖက်ဒရယ်ကောင်စီ အတွင်းရေးမှူး ခွန်ဝေထူးက မဲခေါင်သတင်းကို ဖြေကြားထားသည်။

မူရင်းလင့် – https://www.facebook.com/MeKongNewsMM/posts/422129193506864

ထို့ကြောင့် ဆီဆိုင်မြို့ တိုက်ပွဲကို ယာယီအပစ်ခတ်ရပ်စဲပြီး ဒေသခံများကို သုံးရက်သာ နေရပ်ပြန်ခွင့်ပြုပြီး ပစ္စည်းသယ်ယူခိုင်းမယ်ဆိုသည့် လှုမှုကွန်ရက်စာမျက်နှာပေါ်မှ သတင်းမှာ အမှားဖြစ်ပြီး အချက်အလက်များကို သေချာမစီစစ်ကာ ဒေသခံများကို အထင်မြင်လွှဲမှားစေရန် သတင်းအမှား ဖြန့်ချိနေခြင်း ဖြစ်သည်။

သျှမ်းသံတော်ဆင့် စာဖတ်ပရိတ်သတ်များအနေဖြင့် လူမှုကွန်ရက် စာမျက်နှာပေါ်များတွင် ဖော်ပြနေသည့် သတင်းများကို ချက်ချင်းမယုံကြည်ဘဲ စိတ်ချရသော သတင်းမီဒီယာများတွင် သွားရောက်ဖတ်ရှု့ကြရန် တိုက်တွန်းပါသည်။

ထို့အပြင် သတင်းတု၊ သတင်းမှားဟု ယူဆရသည့် သတင်းများကိုလည်း သျှမ်းသံတော်ဆင့်၏ Chat Box မှ တစ်ဆင့် သတင်း၏ လင့်ခ် (သို့မဟုတ်) Screen Short ရိုက်ပြီး ပုံပေးပို့ခြင်းဖြင့် စစ်ဆေးနိုင်သည်။