သျှမ်းပြည် ဆီဆိုင်မြို့နယ် ဘန်းယဉ်ကျေးရွာရှိ စစ်ကောင်စီတပ်စခန်းမှ ပစ်ခတ်လိုက်သော လက်နက်ကြီးများကြောင့် အရပ်သား ၂ ဦးသေဆုံးပြီး၊ ၇ ဦးထိခိုက်ဒဏ်ရာရရှိခဲ့ကြောင်း စုံစမ်းသိရသည်။

ဘန်းယဉ်ကျေးရွာ စစ်ကောင်စီ၏ အခြေစိုက် ခြေမြန်တပ်ရင်း ခမရ ၄၂၅ နှင့် ၄၂၆ တပ်ရင်းမှနေ၍ စစ်ကောင်စီနှင့် လက်အောက်ခံ ပြည်သူ့စစ်အဖွဲ့သည် ဘန်းယဉ်ကျေးရွာအရှေ့ဘက်ရှိ ကျေးရွာများသို့ လက်နက်ကြီး၊ လက်နက်ငယ် များဖြင့် ယမန်နေ့ (ဖေဖော်ဝါရီ ၁၇ ရက်) ညပိုင်းတွင် အကြိမ်ပေါင်းများစွာပစ်ခတ်ခဲ့ကြောင်း ဘန်းယဉ်ကျေးရွာ ဒေသခံများကပြောသည်။

ယင်းကဲ့သို့ ပစ်ခတ်ခြင်းကြောင့် ထမ်းယမ်းရွာမှ ကလေးငယ် ၁ ဦး နှင့် အမျိုးသား ၁ ဦးသေဆုံးသွားခဲ့ကြောင်း ထမ်းယမ်းရွာဒေသခံတစ်ဦးက သျှမ်းသံတော်ဆင့်ကိုပြောသည်။

“မနေ့ကဖြစ်စဉ်ကတော့ ထမ်းယမ်းရွာလက်နက်ကြီး ထိမှန်တာ ကလေး ၁ ယောက်၊ လူကြီး ၁ ယောက်သေတယ်။ ခုလည်းလက်နက်ကြီး ပစ်သံထပ်ကြားနေရပြီ” ဟု ၎င်းကပြောသည်။

သေဆုံးသူသည် ထမ်းယမ်းရွာမှ အသက် ၆ လသားအရွယ် ကလေးငယ် ၁ ဦးနှင့် အမျိုးသား ၁ ဦးဖြစ်ပြီး ထိခိုက်ဒဏ်ရာရသူသည် သေဆုံးသွားသော ကလေးငယ်၏ မိဘနှစ်ပါးနှင့် ထီတမ်ရွာမှ ဒေသခံ ၅ ဦးဖြစ်ကြောင်း ပအိုဝ်းအမျိုးသားလွတ်မြောက်ရေးတပ်မတော် PNLAက ယနေ့ (ဖေဖော်ဝါရီ ၁၇ ရက်)တွင် ထုတ်ပြန်ထားသည်။

ထိုကျေးရွာအတွင်း ပအိုဝ်းအမျိုးသားလွတ်မြောက်ရေးတပ်မတော် PNLA မှ တပ်စွဲထားခြင်းမရှိသကဲ့သို့ တိုက်ပွဲဖြစ်ပွားနေသည့် နေရာမဟုတ်ကြောင်း၊ စစ်ကောင်စီက တမင်သက်သက် ကျေးရွာကို ပစ်ခတ်ဖျက်ဆီးနေခြင်းဖြစ်ကြောင်း PNLAက ထုတ်ပြန်ချက်၌ ပြောဆိုထားသည်။

အလားဆိုက်ခေါင်ကျေးရွာဘက်အရှေ့၏ စစ်ကောင်စီ အမြှောက်တပ်လည်း လက်နက်ကြီးများဖြင့် ယမန်နေ့ညတွင် အဆက်မပြတ်ပစ်ခတ်နေကြောင်း ဆိုက်ခေါင်ဒေသခံအချို့ကပြောသည်။