သျှမ်းပြည်အရှေ့ပိုင်း တာချီလိတ်မြို့နယ်တွင် ရှမ်းပြည်တိုးတက်ရေးပါတီ SSPP ဥက္ကဋ္ဌ ဗိုလ်ချုပ်ကြီးပန်ဖ အမှူးပြုသော အရာရှိစစ်သည်များက မိုင်းဖုန်းဆရာတော်ထံသို့ စက်လှေ လှူဒါန်းခဲ့ကြောင်း သတင်းသိရသည်။

ဖေဖော်ဝါရီလ ၁၅ ရက်တွင် တာချီလိတ်မြို့နယ် ရွှေတြိဂံနယ်မြေရှိ မိုင်းဖုန်းဆရာတော် စံကျောင်းတွင် SSPP/SSA ဥက္ကဋ္ဌ ဗိုလ်ချုပ်ကြီးပန်ဖ အမှူးပြု၍ SSPP ပြောရေးဆိုခွင့်ရှိသူ ဗိုလ်မှူးစိုင်းဖုန်းဟန်နှင့် အရာရှိစစ်သည် မိသားစုများက မိုင်းဖုန်းဆရာတော် ဘဒ္ဒန္တ ဉာဏသံဝရ (ခူးဝါးဝန်းစုမ့်)ထံသို့ စက်လှေနှင့် လှူဖွယ်ဝတ္ထုများ ဆက်ကပ်လှူဒါန်းခဲ့ကြောင်း SSPP Info က ဖေဖော်ဝါရီ ၁၆ ရက်တွင် သတင်းထုတ်ပြန်ထားသည်။

ထို့အပြင် သီပေါမြို့နယ်ရှိ ဆင်ကျော့ကျေးရွာ ဘုန်းကြီးကျောင်းတွင် ပရိယတ္တိ စာမေးပွဲ ဖြေဆိုနေကြသော ရဟန်းသာမ‌ဏေ (၅၂၀)ပါးတို့အား ဆွမ်းနှင့် ခဲဘွယ်ဘောဇဉ်တို့ကိုလည်း ဆက်ကပ်လှူဒါန်းခဲ့ကြောင်း ဆိုထားသည်။

SSPP တပ်ဖွဲ့ ထိန်းချုပ်သည့် သျှမ်းမြောက်ရှိ နယ်မြေများတွင် စစ်ကောင်စီနှင့် ညီနောင်မဟာမိတ် (၃)ဖွဲ့၊ စစ်ကောင်စီနှင့် ကချင်လွတ်လပ်ရေးတပ်မတော် KIA တို့ တိုက်ပွဲဖြစ်ပွားနေသော်လည်း စစ်အာဏာရှင်တိုက်ဖျက်ရေးတွင် SSPP/SSA သည် ယနေ့အချိန်ထိ ပါဝင်လာခြင်းမရှိသေးပေ။

ဖေဖော်ဝါရီလ ၁၅-၁၆ ရက်တို့တွင် SSPP/SSA ဌာနချုပ်ရှိရာ ကျေးသီးမြို့နယ်၊ ဝမ်ဟိုင်းမြို့သစ်၌ လားဟူ၊ လီဆူ ယဉ်ကျေးမှု နှစ်သစ်ကူးပွဲတော် အထိမ်းအမှတ်နှင့် တွေ့ဆုံဂါရဝပြု အခမ်းအနားကို ကျင်းပပြုလုပ်ခဲ့ပြီး လားရှိုး၊ တန့်ယန်း၊ ကျေးသီး၊ ခိုလမ်နှင့် မိုးနဲမြို့နယ်တို့မှ လားဟူနှင့် လီဆူးတိုင်းရင်းသားလူမျိုးများ ၃၀၀၀ ကျော် တက်ရောက်ခဲ့ကြောင်း ဒေသခံများက ပြောသည်။

၎င်းအခမ်းအနားတွင် SSPP/SSA ၏ နိုင်ငံရေးဦးဆောင်အဖွဲ့ ခေါင်းဆောင် ဗိုလ်ချုပ်ကြီး ဆေထင်မှ ဩဝါဒဆုတောင်းစကား ပြောကြားပြီး SSPP ဗဟိုကော်မတီများနှင့် လားဟူအဖွဲ့ခေါင်းဆောင်များ အပြန်အလှန် မိတ်ဆက်၍ SSPP တပ်ဖွဲ့မှ လားဟူ၊ လီဆူး တိုင်းရင်းသားများအား ငွေကျပ်သိန်းပေါင်း (၇၀၀) ချီးမြှင့်လှူဒါန်းခဲ့ကြောင်း SSPP Info က ဖေဖော်ဝါရီ ၁၅ ရက်တွင် ထုတ်ပြန်သည်။

ထို့အပြင် SSPP/SSA ၏ ပညာရေးဌာနမှ ဦးဆောင်၍ ပညာရေးညီလာခံကို ပထမဆုံးအကြိမ် ဝမ်ဟိုင်းမြို့သစ်၌ ဖေဖော်ဝါရီလ ၁၅ မှ ၁၆ ရက်အထိ ကျင်းပပြုလုပ်ခဲ့ပြီး သျှမ်းပြည်ပညာရေး၊ မိခင်ဘာသာစကား အခြေပြုသင်ကြားရေးနှင့် ဖက်ဒရယ်ပညာရေးစနစ်တို့ကို ဆွေးနွေးခဲ့ကာ ညီလာခံတက်ရောက်သူ ၅၀၀ ကျော်ရှိကြောင်း ပါဝင်တက်ရောက်ခဲ့သူများထံမှ သိရသည်။

ပြီးခဲ့သည့် ဖေဖော်ဝါရီ ၁၂ ရက်ကလည်း (၇၇)နှစ်မြောက် ပြည်ထောင်စုနေ့ အထိမ်းအမှတ်အဖြစ် ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) သည် ချင်းအမျိုးသားတပ်ဦး (CNF) နှင့် ကချင်လွတ်လပ်ရေးတပ် (KIO/KIA) တို့နှင့် ပူးတွဲ၍ အမျိုးသားညီညွတ်ရေးအစိုးရ (NUG) ထံသို့ ပထမဆုံးအကြိမ် သဝဏ်လွှာ ပေးပို့ခဲ့သည်။

ထိုကဲ့သို့ သဝဏ်လွှာပေးပို့ပြီးနောက် SSPP တပ်ဖွဲ့သည် သျှမ်းပြည်သူများကို ထိုင်းနိုင်ငံသို့ မသွားရန် တားမြစ်ပိတ်ပင်မှုများ ပြုလုပ်နေသည့်အပြင် စစ်ကောင်စီက စစ်မှုထမ်းဥပဒေ ကို အတည်ပြုလာပြီးနောက်တွင်လည်း စစ်ကောင်စီနှင့် စစ်ရေး မပြုလုပ်သည့် SSPP တပ်ဖွဲ့ကလည်း သျှမ်းလူထုများ သျှမ်းတပ်ထဲသို့ ဝင်ရောက်ရန်အတွက် ဖိတ်ခေါ်မှု ပြုလုပ်နေသည်။