Sunday, July 21, 2024

မူဆယ်မြို့တွင်း တိုက်ပွဲဖြစ်မည်ကိုစိုးရိမ်၊ နယ်စပ် ဖြတ်သန်းခွင့်စာအုပ်ကို အလုအယက် ပြုလုပ်နေ

Must read

သျှမ်းပြည် မူဆယ်ခရိုင် ဒေသခံများသည် တရုတ်နှစ်သစ်ကူးပြီးနောက် တိုက်ပွဲ ဖြစ်ပွားမည်ကို စိုးရိမ်သဖြင့် မြန်မာ-တရုတ် နယ်စပ်ဖြတ်သန်းခွင့် စာအုပ်ကို အလုအယက် ပြုလုပ်နေကြကြောင်း စုံစမ်းသိရသည်။

မူဆယ်ခရိုင်အတွင်းရှိ မူဆယ်၊ ပန်ဆိုင်း၊ မန်ဟီးရိုး၊ မုံးကိုးနှင့် နမ့်ခမ်းမြို့များမှ ဒေသခံပြည်သူများသည် တရုတ်နှစ်သစ်ကူးကာလ ဖေဖော်ဝါရီလ ၈/၉ ရက်နောက်ပိုင်း တိုက်ပွဲစိုးရိမ်မှုနှင့် အလုပ်အကိုင် ရှားပါးမှုများကြောင့် မြန်မာ-တရုတ် နယ်စပ်ဖြတ်သန်းခွင့်စာအုပ်ကို အလုအယက် ပြုလုပ်နေကြကြောင်း မူဆယ်ဒေသခံများက ပြောသည်။

“တရုတ်နှစ်သစ်ကူးပြီးတော့ တိုက်ပွဲပြန်ဖြစ်မှာ ကြောက်တော့ တရုတ်ပြည်ဝင်ဖို့ စာအုပ်အနီကို အလုအယက် လုပ်နေရတယ်။ လဝကရုံးကနေ ဂေါက်ကွင်းအထိ တန်းစီစောင့်တာ လူထောင်ချီ ရှိမယ်။ တချို့လည်း လဝကကို ပိုက်ဆံပေးပြီး အလှည့်ကျော်ကြတယ်၊ တချို့ကျတော့ တန်းစီပြီး နေရာပြန်ရောင်းစားတဲ့လူလည်း ရှိတယ်”ဟု မူဆယ်မြို့မှ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

လက်ရှိတွင် နယ်စပ်ဖြတ်သန်းခွင့်စာအုပ် (BP) ၁ နှစ်သက်တမ်း ကုန်မည့်သူများနှင့် စာအုပ်အသစ် လျှောက်ထားခြင်းများကို ခရိုင်လဝကရုံးတွင် မူဆယ်နှင့် နမ့်ခမ်းမြို့နယ်မှ ဒေသခံများကို သတ်မှတ်ရက်အတွင်း အလှည့်ကျ လုပ်ဆောင်ပေးနေကြောင်း မူဆယ်ခရိုင် လဝကရုံးက အသိပေး ကြေငြာထားသော်လည်း ပွဲစားများမှတဆင့် ဈေးအဆမတန် ပေးကာ ပြုလုပ်နေရကြောင်း ဒေသခံများထံမှ သိရသည်။

“တစ်နေရာတည်း လုပ်လို့မပြီးဘူး၊ လဝကရုံးမှာ စာရင်းသွင်း ဖောင်တင်ပြီးလို့ စာအုပ်ရရင် အလယ်ပေါက် နန်းတော်ဂိတ်မှာ တုံးလာထုရသေးတယ်။ ၁ နှစ်ခံ စာအုပ်က တစ်ရက်ကို ၃၀၀ ကျော်ပဲ ထုတ်ပေးတော့ တချို့လူတွေ ညအိပ်စောင့်ရတယ်။ တစ်ခါသုံးကဒ်ဆိုရင်တော့ နောက်ထပ်တစ်နေရာမှာ ကဒ်လုပ်ပြီး တခါတည်း ဝင်သွားလို့ ရပြီပြောတယ်”ဟု မူဆယ်မြို့မှ ၎င်း‌ဒေသခံအမျိုးသားက သျှမ်းသံတော်ဆင့်ကို ဆက်ပြောသည်။

လက်ရှိတွင် မူဆယ်နှင့် နမ့်ခမ်းမြို့နယ်များ၌ တိုက်ပွဲငြိမ်သက်နေသော်လည်း အလုပ်အကိုင် ရှားပါးမှုကြောင့် တရုတ်နိုင်ငံသို့ သွားရောက်၍ အလုပ် လုပ်ကိုင်နိုင်ရန် ၁ နှစ်သက်တမ်းရှိ နယ်စပ်ဖြတ်သန်းခွင့် စာအုပ်ကို အလုအယက် တိုးဝှေ့လုပ်ဆောင်နေကြခြင်းဖြစ်ကြောင်း မူဆယ်ဒေသခံများက ပြောသည်။

ပြီးခဲ့သည့် ဇန်နဝါရီလ နောက်ဆုံးပတ်ကလည်း နယ်စပ်ဖြတ်သန်းခွင့်စာအုပ်ကို ကြားခံပြုလုပ်ပေးသည့် ပွဲစားများ၏ တာဝန်ယူမှု၊ တာဝန်ခံမှု မရှိသည့်အတွက်ကြောင့် နန်းတော်ဂိတ် အလယ်ပေါက်၌ မှတ်ပုံတင်နှင့် စာရွက်စာတမ်းများ စွန့်ပစ်ခံရကာ ၎င်းတို့ထံ ပေးဆောင်ထားသည့် အခကြေးငွေများလည်း ဆုံးရှုံးခဲ့ရကြောင်း မူဆယ်ဒေသခံများထံမှ သိရသည်။

Leave a Comments

- Advertisement -spot_img

Latest article