သျှမ်းပြည် ဆီဆိုင်မြို့ စစ်ကောင်စီတပ်မှ လက်နက်ကြီးဖြင့် ပစ်ခတ်မှုကြောင့် မြို့မဈေးတစ်ခုလုံး မီးလောင်နေကြောင်း စုံစမ်းသိရသည်။
ယမန်နေ့ (ဖေဖော်ဝါရီလ ၁၅ ရက်) ညနေပိုင်း ၄ နာရီဝန်းကျင်တွင် ဆီဆိုင်မြို့သို့ စစ်ကောင်စီတပ်မှ လက်နက်ကြီးဖြင့် ပစ်ခတ်သောကြောင့် မြို့မဈေး၏ အရှေ့တောင်ဘက်မှ ဆိုင်ခန်းများ စတင်မီးလောင် သွားပြီး တစ်ညလုံးမီးငြိမ်းသတ်နိုင်ခြင်းမရှိကာ လောင်ကျွမ်းနေကြောင်း ဆီဆိုင်မြို့ဒေသခံတစ်ဦးက ပြောသည်။
“လက်နက်ကြီးထိလို့ လောင်သွားတာ။ မနေ့ညတစ်ညလုံး မီးမငြိမ်းနိုင်တော့ ဒီနေ့မနက်အထိလည်း မီးလောင်နေတယ်။ မြို့မဈေးတစ်ခုလုံး မီးလောင်သွားပြီ။ ဆိုင်ခန်းတွေလည်း လောင်ကုန်ပြီ။ ထိခိုက်ဒဏ်ရာရတဲ့သူတော့ မရှိဘူး” ဟု ဆီဆိုင်မြို့ဒေသခံတစ်ဦးက ပြောသည်။
ဆီဆိုင်မြို့မဈေးတွင် ဆိုင်ခန်းပေါင်း ၈၀၀ ကျော်ရှိရာ လက်ရှိအချိန် လောင်ကျွမ်းနေဆဲကြောင့် မြို့မဈေးတစ်ခုလုံး ပြာကျနိုင်ခြေရှိကြောင်း ၎င်းဆက်ပြောသည်။
အလားတူ ဆီဆိုင်မြို့၏ မြောက်ဘက်တစ်နေရာတွင် ပအိုဝ်းအမျိုးသားလွတ်မြောက်ရေးတပ်မတော် PNLA၊ ပူးပေါင်းတပ်ဖွဲ့များ နှင့် စစ်ကောင်စီတပ်တို့အကြား ယမန်နေ့ (ဖေဖော်ဝါရီလ ၁၅ ရက်) တွင် တိုက်ပွဲထပ်မံဖြစ်ပွားခဲ့သည်။
မြို့တွင်းလုံခြုံရေးနေသည့် PNLA ၏စစ်ကြောင်းအား စစ်ကောင်စီနှင့်အပေါင်းအပါများက ချောင်းမြင်း ပစ်ခတ်ခဲ့သောကြောင့် တိုက်ပွဲဖြစ်ပွားရပြီး အဆိုပါတိုက်ပွဲအတွင်း စစ်ကောင်စီနှင့် အပေါင်းအပါများ ဘက်မှ ၂ ဦးထက်မနည်း သေဆုံးခဲ့ကြောင်း PNLA က ယနေ့ (ဖေဖော်ဝါရီလ ၁၆ ရက်)တွင် ထုတ်ပြန်လာခဲ့သည်။
ထို့အပြင် မူးယစ်ဆေးဝါး အထုပ်ကြီး ၂ ထုပ်၊ အထုပ်သေး ၂ ထုပ်နှင့် ခဲယမ်းကျည်ဆံအချို့များလည်း သိမ်းဆည်းရမိခဲ့ကြောင်း ရေးသားဖော်ပြထားသည်။
ယင်းတိုက်ပွဲနှင့် ပတ်သက်၍ ထွက်ပြေးတိမ်းရှောင်နေရသည့် ဆီဆိုင်မြို့ခံ စစ်ဘေးရှောင်တစ်ဦးက ယခုလိုပြောသည်။
