သျှမ်းပြည် နမ့်ခမ်းမြို့နယ်တွင် တအာင်း (ပလောင်) အမျိုးသားလွတ်မြောက်ရေးတပ်မတော် (TNLA) ခေါင်းဆောင်များက နမ့်ခမ်းမြို့ အုပ်ချုပ်ရေး ကော်မတီဝင်များနှင့် မြို့မိမြို့ဖများအား သွားရောက်တွေ့ဆုံခဲ့ကြောင်း စုံစမ်းသိရသည်။
ဖေဖော်ဝါရီလ ၉ ရက် နံနက် ၁၀ နာရီခန့်တွင် နမ့်ခမ်းမြို့ ရပ်ကွက်(၃)၌ TNLA ၏ အထွေထွေအတွင်းရေးမှူး ဗိုလ်မှူးချုပ် တားဘုန်းကျော်နှင့်အဖွဲ့သည် နမ့်ခမ်းမြို့ အုပ်ချုပ်ရေးကော်မတီဝင်နှင့် မြို့မိမြို့ဖများအား သွားရောက်တွေ့ဆုံခဲ့ပြီး ကျန်းမာရေး၊ ပညာရေးနှင့် မြို့အုပ်ချုပ်ရေး ယန္တရားများ ပြန်လည်ပတ်နိုင်ရေးတို့ကို ရှင်းလင်းပြောကြားခဲ့ပြီး ဒေသခံ ၂၀၀ ကျော် တက်ရောက်ကြောင်း TNLA တပ်ဖွဲ့၏ သတင်းနှင့် ပြန်ကြားရေးဌာနက ထုတ်ပြန်သည်။
“သူတို့ မူဝါဒတွေ ရှင်းပြတာပေါ့။ မြို့ထဲမှာ TNLA စောင့်တယ်လေ၊ သူတို့ရုံးထိုင်နေကြပြီ။ အိမ်ထောင်စုစာရင်းကို ရပ်ကွက်ရုံးမှာ သေသူဖျက်၊ မွေးသူ ပိုသူ ထည့်ပေးတာတော့ ရှိတယ်။ မူရင်းတော့ ပြရုံပဲ အိမ်ထောင်စုမှာတော့ နာမည်မဖျက်ဘူး၊ သူတို့စာရင်း စာအုပ်မှာ မှတ်ထားတာ”ဟု နမ့်ခမ်းမြို့မှ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
ထို့အပြင် ရပ်ဝေးမှ နမ့်ခမ်းမြို့ရှိ ဆွေမျိုးအိမ်သို့ လာရောက်တည်းခိုသူများလည်း ရပ်ကွက်အုပ်ချုပ်ရေးမှူးရုံးသို့ ဧည့်စာရင်းတိုင်ကြားရန် လော်စပီကာဖြင့် ရပ်ကွက်အတွင်း လှည့်လည်ဆော်ဩခြင်းများလည်း ရှိကြောင်း နမ့်ခမ်းဒေသခံများထံမှ သိရသည်။
“နမ့်ခမ်းမှာ အိမ်ခြေရာမဲ့တွေ၊ ဘိန်းစားတွေကို ဖမ်းပြီး စည်ပင်သန့်ရှင်းရေးမှာ အလုပ်ခန့်တယ်။ စည်ပင်ကားတွေ အမှိုက်လာသိမ်းပြီဆို TNLA တွေလည်း သေနတ်နဲ့ လိုက်လာကြည့်တယ်။ ဟိုတလောကလည်း ကြက်ဝိုင်းကို ဝင်ဖမ်းပြီးတော့ ဆေးရုံတို့ လမ်းမကြီးတို့မှာ သန့်ရှင်းရေး လုပ်ခိုင်းတာ”ဟု နမ့်ခမ်းမြို့မှ ၎င်းဒေသခံအမျိုးသားက သျှမ်းသံတော်ဆင့်ကို ပြောသည်။
နမ့်ခမ်းမြို့နယ်တွင် တိုက်ပွဲပြင်းထန်စဉ်က ဘေးလွတ်ကင်းရာသို့ ထွက်ပြေးတိမ်းရှောင်သူများထဲတွင် အချို့မှာ နေရပ်ပြန်လာသလောက် ရှိကြသော်လည်း ရပ်ဝေးသို့ တိမ်းရှောင်သွားသူများမှာ နေရပ်မပြန်နိုင်သေးကြောင်း နမ့်ခမ်းဒေသခံများက ပြောသည်။
ညီနောင်မဟာမိတ်တပ်များဘက်ကလည်း ၎င်းတို့ သိမ်းပိုက်ထိန်းချုပ်ထားသည့် ဒေသများအတွင်း နယ်စပ်တည်ငြိမ်ရေး၊ တရားဥပဒေစိုးမိုးရေးနှင့် ပျက်စီးသွားသည့် လမ်းတံတားများ ပြန်လည်ပြုပြင် တည်ဆောက်ရေးတို့ကို ဆောင်ရွက်နေကြောင်း ဖေဖော်ဝါရီလ ၈ ရက်တွင် ထုတ်ပြန်ထားသည်။
အလားတူ ဖေဖော်ဝါရီလ ၉ ရက်နေ့ကလည်း ကိုးကန့်ဒေသ တစ်ခုလုံး စစ်အာဏာရှင်စနစ်အောက် အလုံးစုံလွတ်မြောက်ရေး အောင်ပွဲအခမ်းအနားနှင့် တရုတ်နှစ်သစ်ကူးပွဲတော်သို့ ကိုးကန့်တပ်ဖွဲ့ MNDAA စစ်ဦးစီးချုပ် ဖုန်တာရွင်နှင့်အတူ တအာင်း(ပလောင်)တပ်ဖွဲ့ TNLA ဥက္ကဋ္ဌ ဒုဗိုလ်ချုပ်ကြီး တားအိုက်ဘုန်းနှင့် ရက္ခိုင့်တပ်တော် AA စစ်ဦးစီးချုပ် ဗိုလ်ချုပ် ထွန်းမြတ်နိုင်တို့ တက်ရောက်ခဲ့ကြောင်း သိရသည်။
