သျှမ်းပြည် ဆီဆိုင်မြို့နယ်အတွင်း တိုက်ပွဲကြောင့် တောတောင်ထဲ ထွက်ပြေးတိမ်းရှောင်နေရသည့် စစ်ဘေးရှောင်များသည် စားနပ်ရိက္ခာပြတ်လပ်မှုနှင့် ကြုံတွေ့နေရကြောင်း စုံစမ်းသိရသည်။

ပအိုဝ်းအမျိုးသားလွတ်မြောက်ရေးတပ်မတော် PNLA၊ ပူးပေါင်းတပ်ဖွဲ့များနှင့် စစ်ကောင်စီတပ်ဖွဲ့တို့အကြား တိုက်ပွဲများကြောင့် တောင်တောင်ထဲထွက်ပြေးတိမ်းရှောင်နေရသည့် စစ်ဘေးရှောင်များသည် ရက်ရှည်လာ ကြာနှင့်အမျှ စုဆောင်းထားသည့် စားနပ်ရိက္ခာများ နည်းပါးလာကြောင်း စစ်ဘေးရှောင်ကူညီသူထံမှ သိရသည်။

တစ်ဖက်တွင်လည်း တိုက်ပွဲပြင်းထန်လျက်ရှိသောကြောင့် စစ်ဘေးရှောင်များသည် နေရပ်ပြန်ပြီး ရိက္ခာသယ်ယူ၍ မရကာ ယခုရက်ပိုင်းအတွင်း အစားအသောက် ပြတ်လပ်မှုနှင့်ကြုံတွေ့နေရကြောင်း ဆိုသည်။

“ဆီဆိုင်မြို့နယ် တောထဲတောင်ထဲ၊ လယ်ယာထဲနဲ့ ချောင်းဘေးနားရှိတဲ့လူတွေပေါ့ဗျာ။ အခုတလောစားနပ်ရိက္ခာ ပြတ်နေတယ်။ ဆန်ပြုတ်စားရတဲ့သူစား၊ ထမင်းခြောက်ကို ပြန်ပြီးစားရတဲ့သူကလည်း စားနေစားကြတာပဲ။ ဖြစ်ချင်လည်း ဆန်ပြုတ်နဲ့အသီးရောပြီး စားနေရတဲ့သူတွေလည်း စားကြတာပဲ” ဟု ၎င်းက ပြောသည်။

လက်ရှိ တောတောင်ထဲထွက်ပြေးနေရသည့် စစ်ဘေးရှောင်ဦးရေ စုစုပေါင်း ၁ သောင်းခန့်ရှိပြီး ၎င်းတို့ထွက်ပြေး တိမ်းရှောင်လာစဉ်က အဝတ်တစ်ထည်နှင့်ကိုယ်တစ်ခုသာ ထွက်ပြေးလာရသည့်အတွက် စားနပ်ရိက္ခာအပြင် မိုးကာ၊ ဆေးဝါးများလိုအပ်နေကြောင်း သိရသည်။

ထို့အပြင် ဆီဆိုင်မြို့နယ်တွင် တိုက်ပွဲကြောင့် ဆေးရုံ၊ ဆေးခန်းများအား ပိတ်ထားရသောကြောင့် လက်ရှိတွင် ကျန်းမာရေး စောင့်ရှောက်မှုများ အရေးပေါ်လိုအပ်နေကြောင်း လူမှုကူညီရေးအသင်းအဖွဲ့ဝင် တစ်ဦးက ပြောသည်။

“အခုကျနော်တို့နယ်မှာ တကယ်လိုအပ်နေတာက ကျန်းမာရေးစောင့်ရှောင်မှုတွေ အရေးပေါ်လိုအပ်နေတယ်။ ကိုယ်ဝန်ဆောင်၊ ကလေး၊ သက်ကြီးရွယ်အို အတွက်လိုအပ်နေတယ်။ ဆေးရုံဆေးခန်းတွေ ဘာတစ်ခုမှမရှိ တော့ဘူး။ မဖွင့်ကြတော့ဘူး။ တစ်ခုခုဆိုတောင်ကြီးပို့နေရတာ အချိန်မှီမပို့ဆောင်နိုင်ရင် သေဆုံးမှုရာခိုင်နှုန်း များတယ်။ အခုကတိုက်ပွဲထဲမှာ သွားကူညီရတော့ လူမှုကူညီရေးတွေဘာတွေမမြင်တော့ဘူး မဲမဲမြင်နဲ့ ပစ်တာပဲ” ဟု လူမှုကူညီရေးအသင်းအဖွဲ့ဝင်တစ်ဦးက ပြောသည်။

ဆီဆိုင်မြို့နယ်တွင် တိုက်ပွဲကြောင့် စစ်ဘေးရှောင်ဦးရေ စုစုပေါင်း ၄ သောင်းကျော် ထွက်ပြေးနေရပြီး တောင်ကြီး၊ ကျောက်တလုံး၊ ဟိုပုံး စသည့် မြို့နှင့် ကျေးရွာများဘက်သို့ တိမ်းရှောင်နေရသည်။