ဆီဆိုင်မြို့ကို စစ်ကောင်စီ လက်နက်ကြီး ပစ်ခတ်ဖျက်ဆီး၊ စစ်သား အလောင်းများ PNLA သင်္ဂြိုဟ် ပေးနေရ

သျှမ်းပြည်နယ် တောင်ပိုင်း၊ ဆီဆိုင်မြို့ကို စစ်ကောင်စီတပ်က လက်နက်ကြီးဖြင့် ပစ်ခတ် ဖျက်ဆီးနေပြီး မြို့တွင်း တိုက်ပွဲအတွင်း သေဆုံးခဲ့သည့် စစ်ကောင်စီ တပ်သား အလောင်းအများအပြား ကျန်ခဲ့၍ ကောင်းမွန်စွာ သင်္ဂြိုဟ်ပေးခဲ့ကြောင်း ပအိုဝ်းအမျိုးသား လွတ်မြောက်ရေးတပ်မတော် (PNLA) က ယနေ့ (ဖေဖော်ဝါရီ ၁၂ ရက်နေ့) တွင် ထုတ်ပြန်သည်။

စစ်ကောင်စီတပ်နှင့်PNO ပြည်သူ့စစ် ပူးပေါင်းတပ်က ဆီဆိုင်မြို့ကို လက်နက်ကြီးဖြင့် ပစ်ခတ်ဖျက်ဆီးပြီး မြို့တွင်း ဝင်ရောက်ရန် ကြိုးစားနေသဖြင့် နေ့စဉ် တိုက်ပွဲ ပြင်းထန်နေကြောင်း PNLA ကဆိုသည်။

ဆီဆိုင်မြို့နယ် အတွင်း ဖမ်းမိထားသည့် ပြည်သူ့စစ်များကို နှိပ်စက်ခြင်း မပြုဘဲ ကောင်းမွန်စွာ ထိန်းသိမ်းထားသဖြင့် မိသားစုဝင်များ စိုးရိမ်ပူပန်မှု မရှိကြရန် ထုတ်ပြန်ချက်တွင် ဖော်ပြထားသည်။

ယမန်နေ့ (ဖေဖော်ဝါရီ ၁၁ ရက်) နံနက် ၈ နာရီခန့်က ဆီဆိုင်မြို့ကို လက်နက်ကြီး ပစ်ခတ်မှုကြောင့် ဘုရားဖြူ အထက်တန်းကျောင်း အရှေ့ဘက်၊ အောင်ချမ်းသာရပ်ကွက် အတွင်းရှိ ဆိုင် မီးလောင်ပျက်စီးခဲ့ကြောင်း ဆိုသည်။

ယင်းဆိုင်တွင် လူမရှိသောကြောင့် ထိခိုက်ဒဏ်ရာရသူ မရှိသော်လည်း နေအိမ်နှင့် ပစ္စည်းများ ဆုံးရှုံးခဲ့ပြီး မြို့တွင်း တနေရာကို ပေါင် ၅၀၀ ဗုံးဖြင့် ဗုံးကြဲတိုက်ခိုက်ခဲ့ကြောင်း PNLA က အသိပေးသည်။

စစ်ရေးအခြေအနေ အလွန်ရှုပ်ထွေးနေသည့် တိုက်ပွဲ ကာလ ဖြစ်သောကြောင့် ဆိုက်ခေါင်မှ ဆီဆိုင်မြို့သို့ ဆက်သွယ်သည့် ပြည်ထောင်စု ကားလမ်းမကြီးအား ဖေဖော်ဝါရီလ ၁၀ ရက်မှ စတင် ဖြတ်သန်းသွားလာခွင့် ပိတ်ထားကြောင်း PNLA က ထုတ်ပြန်ထားသည်။

ထို့အပြင် ဆိုက်ခေါင်အနီးတဝိုက် ဆီဆိုင်မြို့သို့ ပြည်ထောင်စုလမ်းမကြီး၏ အနောက်ဘက်ခြမ်းမှ ဆက်သွယ်ထားသည့် ကျေးရွာလမ်းငယ်များ၊ နမ်းတဘက်ချောင်း အနောက်ဘက်ရှိ ကက္ကူမှ ဆီဆိုင်မြို့ အနောက်ဘက်ရှိ နမ်းတဘက်ချောင်း အနောက်ဘက်ဒေသများကို ဆက်သွယ်ထားသော တောလမ်းများ သွားလာခွင့် ပိတ်ထားကြောင်း ဆိုသည်။

စစ်ကောင်စီနှင့် ပြည်သူ့စစ် ပူးပေါင်းတပ်များ ဖေဖော်ဝါရီလ ၅ ရက်မှ စတင်ကာ ဆိုက်ခေါင်ကျေးရွာ အရှေ့ဘက်တွင် အမြှောက်များ တပ်ဆင် တပ်စွဲထားသကဲ့သို့ ဇောတိကရာမကျောင်းတိုက် အတွင်း အင်အား ၃၀၀ ခန့်ရှိသည့် တပ်များ တပ်စွဲ အင်အားဖြည့်တင်းခဲ့ကြောင်း ဆိုက်ခေါင် ဒေသခံအချို့က ပြောဆိုထားသည်။

ယင်းအပြင် ဆီဆိုင်၊ ဆိုက်ခေါင်၊ ဘန်းယဉ် ကျေးရွာများ၏ အရှေ့ဘက်မှ တွေးပူး၊ ပြင်သာယာ၊ လွယ်ပွတ်၊ ဗန်းကန်၊ ဗန်းနောင်ကား၊ ကောင်းဗန်တန်း၊ ဆောဆား၊ ဗန်းဗလန်၊ ထီဗွာ စသည့် ကျေးရွာပေါင်း ၁၃ ရွာခန့်တွင် ပအိုဝ်းတပ်ဖွဲ့ PNLA တပ်ဖွဲ့များ ရောက်ရှိနေ သဖြင့် နှစ်ဖက် စစ်ရေးတင်းမာနေကြောင်း ဆိုက်ခေါင်ကျေးရွာ ဒေသခံတစ်ဦးကပြောသည်။

ဆီဆိုင်မြို့နယ် နေရာ အများအပြား စစ်ကောင်စီတပ် လေယာဉ်ဖြင့် ဗုံးကြဲမှု၊ လက်နက်ကြီး ပစ်ခတ် တိုက်ခိုက်မှုများကြောင့် ဘာသာရေး အဆောက်အအုံ ၇ ခုထက်မနည်း ထိခိုက်ပျက်စီးခဲ့ပြီး နေအိမ် ၅၀ နီးပါး ထိခိုက်ပျက်စီးခဲ့ကြောင်း သိရသည်။

ဆီဆိုင်မြို့နယ်အတွင်း တိုက်ပွဲများကြောင့် အနည်းဆုံး ဒေသခံ ၄ သောင်းကျော် နေရပ်စွန့်ခွာ ထွက်ပြေးတိမ်းရှောင် နေရကြောင်း စစ်ဘေးရှောင် ကူညီပေးနေသူများထံမှ သိရသည်။