သျှမ်းပြည် ကွတ်ခိုင်မြို့နယ် နမ့်ဖတ်ကာကျေးရွာတွင် ကချင်လွတ်လပ်ရေးတပ်မတော် KIA မှ စစ်ကောင်စီတပ်နှင့် နီးစပ်သူများကို လိုက်လံဖမ်းဆီးပြီး စစ်ဆေးမေးမြန်းနေကြောင်း စုံစမ်းသိရသည်။

နမ့်ဖတ်ကာကျေးရွာရှိ စစ်ကောင်စီတပ် ခလရ-၁၂၃ ကို ကချင်လွတ်မြောက်ရေးတပ် KIA က ဇန်နဝါရီလ ၂၅ ရက်က သိမ်းပိုက်နိုင်ခဲ့ပြီးနောက် KIA တပ်ဖွဲ့မှ စစ်ကောင်စီတပ်နှင့် နီးစပ်သည့် ကျေးရွာအုပ်ချုပ်ရေးမှူးဟောင်းများနှင့် စစ်မှုထမ်းဟောင်းများကို လိုက်လံဖမ်းဆီးကာ စစ်ဆေးမေးမြန်းနေကြောင်း နမ့်ဖတ်ကာဒေသခံများက ပြောသည်။

“ကြံ့ခိုင်ရေးအဖွဲ့ဝင်တွေ၊ စစ်ထွက်တွေ၊ စစ်တပ်နဲ့ ပတ်သက်တဲ့ လူတွေတို့ကို ခေါ်စစ်တာ၊ မေးတာ။ အရင်က အုပ်ချုပ်ရေးမှူးဟောင်းတွေ ရွာမှာလုပ်ခဲ့တဲ့ လူတွေကို ခေါ်မေးတာ ခေါ်စစ်တာတို့ အဲ့လိုရှိတယ်။ ဗမာတွေကို ၁၃ ယောက်လောက်ကတော့ ပြန်မလွှတ်သေးဘူးလို့ ပြောတယ်”ဟု နမ့်ဖတ်ကာကျေးရွာမှ ဖြစ်စဉ်သိရှိသူ အမျိုးသားတစ်ဦးက သျှမ်းသံတော်ဆင့်ကို ပြောသည်။

ကချင်လွတ်မြောက်ရေးတပ် KIA က ဖမ်းဆီး၍ စစ်ဆေးမေးမြန်းခဲ့သူများထဲမှ အချို့ကို ၂ ခါ ၃ ခါ ခေါ်ယူစစ်ဆေးပြီးနောက် ပြန်လွှတ်ပေးခဲ့သော်လည်း အခြားလူမှာ ဆက်လက်ဖမ်းဆီးခံထားရကြောင်း နမ့်ဖတ်ကာဒေသခံများထံမှ သိရသည်။

“ပထမပိုင်းတော့ ကချင်တပ်ဖွဲ့ကနေပြီး ရွာထဲရှင်းရင်းနဲ့ မွှေကြတယ်ပြောတာပဲ။
သူတို့ မသင်္ကာစရာ ရှိတဲ့အိမ်တို့၊ စစ်သားလူထွက်အိမ်တို့၊ စစ်သားပုံတွေ့တာတို့ဆိုရင် အကြောင်းပြပြီး မွှေကြတာတို့၊ သော့သိမ်းသွားတာတို့ ရှိတယ်”ဟု နမ့်ဖတ်ကာကျေးရွာမှ ၎င်းဒေသခံအမျိုးသားက သျှမ်းသံတော်ဆင့်ကို ဆက်ပြောသည်။

ယခုကဲ့သို့ နမ့်ဖတ်ကာကျေးရွာမှ KIA တပ်ဖွဲ့က စစ်ကောင်စီတပ်နှင့် နီးစပ်သူများကို ဖမ်းဆီး၍ စစ်ဆေးမေးမြန်းနေခြင်းနှင့် ပတ်သက်ပြီး သျှမ်းသံတော်ဆင့်မှ KIA တပ်ဖွဲ့ ပြောရေးဆိုခွင့်ရှိသူ ဗိုလ်မှူးကြီးနော်ဘူထံသို့ ဆက်သွယ်မေးမြန်းခဲ့သော်လည်း ဖုန်းလက်ခံဖြေကြားခြင်း မရှိပေ။

လက်ရှိတွင် နမ့်ဖတ်ကာကျေးရွာ အနီးတဝိုက်တွင် မိုင်းရှင်းလင်းရေးလုပ်ငန်းများ လုပ်ဆောင်နိုင်ရန် လိုအပ်နေခြင်းကြောင့် ခွင့်ပြုချက်ရမှသာ နေရပ်ပြန်လာကြရန် KIA တပ်ဖွဲ့ဘက်မှ ပြောဆိုထားကြောင်း နမ့်ဖတ်ကာဒေသခံများထံမှ သိရသည်။

ကချင်လွတ်မြောက်ရေးတပ် KIA မှ နမ့်ဖတ်ကာ ခလရ-၁၂၃ စခန်းသိမ်းတိုက်ပွဲ တစ်လကျော်အတွင်း စစ်ကောင်စီတပ်၏ လက်နက်ကြီးနှင့် လေကြောင်းတိုက်ခိုက်မှုများကြောင့် အရပ်သား ၁၀ ဦးထက်မနည်း ထိခိုက်သေဆုံးခဲ့ပြီး ပြည်သူနေအိမ် ၄၀၀ ကျော်လည်း ပျက်စီးဆုံးရှုံးခဲ့ရကြောင်း နမ့်ဖတ်ကာဒေသခံများက ပြောသည်။