သျှမ်းပြည် မိုးမိတ်မြို့ကို စစ်ကောင်စီတပ်ဖွဲ့မှ ပြန်လည်ထိန်းချုပ်ပြီးနောက် မြို့ထဲသို့ ဆိုင်ကယ်ဖြင့် ဝင်ရောက်၍ရပြီဆိုသည့်  သတင်းအမှားဖြန့်ချိနေသည်။

စစ်ကောင်စီဝါဒဖြန့် တယ်ရီဂရမ်ချယ်နယ်များမှ “မိုးမိတ်မြို့အား စစ်ကောင်စီတပ်ဖွဲ့မှ အပြည့်အဝပြန်လည်ထိန်းချုပ်နိုင်ခဲ့ပြီး မြို့ထဲသို့ ဆိုင်ကယ်ဖြင့်ဝင်လို့ရသည်” ဟုဆိုကာ ဒေသခံပြည်သူလူထုကို လှည့်ဖြားမှားယွင်းစွာ တင်ဆက်ချက်ဖြင့် ရေးသားဖြန့်ဝေနေသည်။

Archive link- https://archive.ph/YyekL

သျှမ်းသံတော်ဆင့် အချက်အလက်စစ်ဆေးသည့် အဖွဲ့အနေဖြင့် အဆိုပါအကြောင်းအရာကို စစ်ဆေးမှု ပြုလုပ်ခဲ့သည်။ ယင်းမှာ သတင်းမှားဖြစ်နေကြောင်း တွေ့ရသည်။

ဇန်နဝါရီလ ၂၇ ရက်မှစပြီး ကချင်လွတ်လပ်ရေး တပ်မတော် KIA၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး ABSDF နှင့်ပြည်သူ့ကာကွယ်ရေးတပ် PDF ပူးပေါင်းတပ်ဖွဲ့တို့ ထိန်းချုပ်ထားသည့် မိုးမိတ်မြို့ကို စစ်ကောင်စီက ပြန်လည်ထိန်းချုပ်ခဲ့သည်။

ထို့နောက် စစ်ကောင်စီသည် ဒေသခံနေအိမ်များကို ဖောက်ထွင်းခြင်း၊ ပြန်လာသည့် ဒေသခံများကို ဖမ်းဆီးသတ်ဖြတ်ခြင်း စသည့်ဖြင့် ကျေးရွာ၁၄ ရွာခန့်ရှိ ဒေသခံများအား ၅ ရက်အတွင်း ရှောင်ပေးကြရန် တော်လှန်ရေးအင်းအားစုများက အသိပေးလိုက်သည်ဟု ဧရာဝတီသတင်းဌာနမှရေးသားဖော်ပြခဲ့သည်။

မူရင်းလင့်- https://www.facebook.com/theirrawaddyburmese/posts/791660816340441

လက်ရှိတွင်လည်း မိုးမိတ်မြို့မှာ စစ်ကောင်စီတပ်ဖွဲ့များက တပ်စွဲနေလျက်ရှိသကဲ့သို့ မြို့အတွင်းသို့ ဝင်ရောက်သူများအား ဖမ်းဆီးမှုဆက်တိုက်လုပ်ဆောင်နေသဖြင့် ဝင်၍မရသေးကြောင်း မိုးမိတ်မြို့ဒေသခံ အမျိုးသမီးတစ်ဦးက ပြောသည်။

“အခုစစ်တပ်က ပြန်ထိန်းချုပ်တာက ဟုတ်တယ်။ အခုထိမြို့ထဲဝင်လို့ မရသေးဘူး။ ဝင်သွားသူတွေကို စစ်တပ်က ဖမ်းပြီး ရွှေကျောင်းဘုန်းကြီးကျောင်းမှာထိန်းသိမ်းထားတယ်။ အခုမြို့ထဲကို ဝင်ဖို့မသင့်သေးပါဘူး ” ဟု ပြောသည်။

လွတ်လပ်ပြီးယုံကြည်ရသော အခြားမီဒီယားများတွင်လည်း မိုးမိတ်မြို့ကို စစ်ကောင်စီတပ်ဖွဲ့များမှ ပြန်လည်ထိန်းချုပ်ပြီးနောက် ဝင်၊ ထွက်သွားလာနိုင်ကြောင်း ရေးသားဖော်ပြခြင်းမရှိပေ။

ထို့အပြင် ရွှေဖာလီနှင့် နမ့်မောင်းချောင်းတံတားတွင်လည်း စစ်ကောင်စီ လက်အောက်ခံ တပ်မ-၉၉နှင့် ပျူစောထီးအဖွဲ့ဝင်များ စောင့်ဆိုင်း၍ စစ်ဘေးရှောင်များထံမှ ပစ္စည်းလုယူနေလျက်ရှိသည်။

ထို့ကြောင့် မိုးမိတ်မြို့ကို စစ်ကောင်စီတပ် ပြန်လည်ထိန်းချုပ်နိုင်ပြီးနောက် မြို့ထဲသို့ဆိုင်ကယ်ဖြင့်ဝင်ရောက်၍ ရပြီဆိုသည့်သတင်းမှာ သတင်းမှားဖြစ်ပြီး ဒေသခံပြည်သူလူထုကို လှည့်ဖြားမှားယွင်းစွာ တင်ဆက်ချက်ဖြင့် ရေးသားဖြန့်ဝေနေခြင်း ဖြစ်သည်။

သျှမ်းသံတော်ဆင့် စာဖတ်ပရိတ်သတ်များအနေဖြင့် လူမှုကွန်ရက် စာမျက်နှာများတွင် ဖော်ပြနေသည့် သတင်းများကို ချက်ချင်းမယုံကြည်ဘဲစိတ်ချရသော သတင်းမီဒီများတွင် သွားရောက်ဖတ်ရှု့ကြရန် တိုက်တွန်းပါသည်။

ထို့အပြင် သတင်းတု၊ သတင်းမှားဟု ယူဆရသည့် သတင်းများကိုလည်း သျှမ်းသံတော်ဆင့် လူမှုကွန်ရက်စာမျက်နှာ (SHAN Burmese Vision ) Facebook  Chat Boxမှဆစ်ဆင့် သတင်း၏ လင့်ခ် (သို့မဟုတ်) Screen Shortပုံပေးပို့ခြင်းဖြင့် စစ်ဆေးနိုင်သည်။