မိုင်းပွန်မြို့အတွင်း စစ်ကောင်စီ ပူးပေါင်းတပ်ဖွဲ့ ပအိုဝ်းပြည်သူ့စစ်ဖြစ်သည့် ပအိုဝ်းအမျိုးသားတပ်မတော် (PNO/PNA) နှင့် ရှမ်းပြည်တိုးတက်ရေးပါတီ/ရှမ်းပြည်တပ်မတော်( SSPP/SSA )တပ်တို့အကြား စစ်ရေးတင်းမာမှု ကြောင့် တိုက်ပွဲဖြစ်ပွားမည်ကို ဒေသခံများစိုးရိမ်နေကြကြောင်း စုံစမ်းသိရသည်။

ယမန်နေ့ (ဖေဖော်ဝါရီလ ၅) ရက်တွင် မိုင်းပွန်မြို့၊ ချိုခမ်းကျေးရွာအတွင်းရှိ ချိုခမ်းဘုန်းတော်ကြီးကျောင်းဝန်း အတွင်း တပ်စွဲနေရာယူထားသည့် စစ်ကောင်စီ နှင့် ပူးပေါင်းတပ်ဖွဲ့ PNA တို့နှင့် စစ်ကြောင်းထိုး ဝင်လာသည့် SSPP တို့အကြား တင်းမာမှု အခြေအနေ ရှိခဲ့ကြောင်း ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

“အဲ့ဒီဘုန်းကြီးကျောင်းမှာ စစ်ကောင်စီ နဲ့ PNO တပ် ရှိနေတာကို SSPP က မသိလို့ ဝင်လာတာခဲ့တာတဲ့။ SSPP အင်အား ၅၀ ကျော် ၆၀ ဝန်းကျင်လောက်တော့ ရှိတယ်။ အဲ့ကျောင်းဝန်းထဲမှာ ခဏလောက် စကားပြောကြပြီး၊ ဘုန်းကြီးနဲ့ ရွာခံတွေလည်း ဖြန်ဖြည်ပေးကြလို့ SSPP က တပ်ပြန်ဆုတ်သွားတယ်။” ဟု ဖြစ်စဥ်ကို သိရှိသူ ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

ယင်းကဲ့သို့ SSPP မှတပ်ပြန်ဆုတ်သွားသော်လည်း ဒေသတွင်း၌ နှစ်ဖက် တပ်ဖွဲ့၏ လှုပ်ရှားမှုများ ရှိနေသေးသည့်အပြင် စစ်ရေးတင်းမာမှု အခြေအနေများကြောင့် ထိတွေ့တိုက်ပွဲ ဖြစ်ပေါ်လာမှာကို စိုးရိမ်ရကြောင်း အထက်ပါ အမျိုးသားက သျှမ်းသံတော်ဆင့်ကို ဆက်ပြောသည်။

“ကျောင်းထဲကနေ SSPP က ထွက်ခဲ့ပေမဲ့ ဒေသအတွင်းမှာ လှုပ်ရှားတဲ့ စစ်ကြောင်းတွေ ရှိနေသေးပါတယ်။ ပြီးတော့ PNO အဖွဲ့တွေက ဘုန်းကြီးကျောင်းမှာပဲ နေတာမဟုတ်ဘူး။ ရွာက နတ်စင်နားမှာလည်း သူတို့ စခန်းချ နေရာယူထားတယ်။ အဲ့လိုတွေကြောင့် ဒီနှစ်ဖွဲ့ ထိတွေ့တိုက်ပွဲ ဖြစ်လာပြီး စစ်ရှောင်ရမှာကို ကြောက်နေကြတာ။” ဟု အထက်ပါ အမျိုးသားက သျှမ်းသံတော်ဆင့်ကို ဆက်ဆိုထားသည်။

SSPP တပ်သည် မိုင်းပွန်မြို့ အတွင်း ပုံမှန်သွားလာလှုပ်ရှားမှုများ ရှိသော်လည်း စစ်ကောင်စီ နှင့် ပူးပေါင်းတပ် PNA တို့က ချိုခမ်းဘုန်းကြီးကျောင်းဝန်းအတွင်း ရောက်ရှိ စခန်းချ နေထိုင်မှုသည် တစ်ပတ် / ၁၀ ရက်ဝန်းကျင် ရှိနေကြောင်းလည်း ဒေသခံများထံမှ သိရသည်။

လက်ရှိအချိန်သည် မိုင်းပွန်မြို့ ဒေသခံများအနေဖြင့် ဆီဆိုင်ဘက် တိုက်ပွဲအခြေအနေ သတင်းများကြောင့် မိုင်းပွန် အထိ တိုက်ပွဲ ကူးဆက် ဖြစ်ပွားမှာကို စိုးရိမ်နေရကြောင်း နှင့် ယခုကဲ့သို့ စစ်ကောင်စီနှင့် PNO တပ်တို့မှ ကျေးရွာအတွင်း နေရာယူ တပ်စွဲထားသည့်အတွက်ကြောင့် လုံခြုံရေးအတွက် စိတ်ပူနေရကြောင်းလည်း သိရသည်။

မိုင်းပွန်မြို့သည် ပွန်ချောင်းကို အစွဲပြုကာ ခေါ်တွင်သည့် မြို့ဖြစ်သည့်အပြင် သျှမ်းစော်ဘွားကြီးများကိုယ်တိုင် အုပ်ချုပ် စံမြန်းခဲ့ဖူးသည့် နေရာဒေသလည်း ဖြစ်ခဲ့သည်။