သျှမ်းပြည် လားရှိုးမြို့ ရပ်ကွက် ၃ အတွင်းရှိ ဆိုင်ခန်းရှေ့၌ ဗုံးပေါက်ကွဲမှုကြောင့် ပြည်သူ ၃ ဦးထိခိုက်ဒဏ်ရာရရှိပြီး ဆေးရုံတင်ထားရကြောင်း စုံစမ်းသိရသည်။
ဖြစ်စဉ်မှာ ယမန်နေ့ (ဇန်နဝါရီလ ၃၀ ရက်) မွန်းလွှဲ ၂ နာရီဝန်းကျင်တွင် လားရှိုးမြို့ ရပ်ကွက် ၃ ၊ သီရိလမ်းပေါ်ရှိ DR ကုန်မာဆိုင်ရှေ့၌ ဆိုင်ကယ်အတွင်း ထည့်ထားသော ဗုံးနှစ်လုံး ပေါက်ကွဲ မှုကြောင့် လမ်းသွားလမ်းလာ ကလေးငယ်အပါအဝင် ပြည်သူ ၃ ဦး ထိခိုက်ဒဏ်ရာရရှိခဲ့ကြောင်း လားရှိုးမြို့ဒေသခံ အမျိုးသား တစ်ဦးက ပြောသည်။
“ဗုံးကိုဆိုင်ကယ် တူးဘောက်ထဲထည့်ပြီး လာရပ်ထားတာ။ နေ့လည်ပိုင်း လူသွား၊လူလာများတဲ့ အချိန်မှာ ပေါက်ကွဲသွားတာ။ ပြည်သူ ၃ ဦးထိတယ်။ အသက် ၆ နှစ်အရွယ်ကလေးတစ်ဦးနဲ့ အသက် ၄၀ ကျော် ၅၀ ဝန်းကျင် အမျိုးသား ၂ ယောက် ဒဏ်ရာရတယ်” ဟု ၎င်းအမျိုးသားတစ်ဦးက ပြောသည်။
ယင်းပေါက်ကွဲမှု ဖြစ်စဉ်ဖြစ်ပွားပြီးနောက် ထိခိုက်ဒဏ်ရာရသူ ပြည်သူ ၃ ဦးကို လားရှိုးမြို့ ပြည်သူ့ဆေးရုံသို့ ပို့ဆောင်ခဲ့ကြောင်း သိရသည်။
ထို့အပြင် လားရှိုးမြို့တွင် လုံခြုံရေးအားနည်းခြင်းကြောင့် မကြာခဏ ဗုံးပေါက်ကွဲမှု ဖြစ်ပွားနေလျက်ရှိပြီး ပေါက်ကွဲမှုဖြစ်စဉ်အများစုမှာ ဆိုင်ကယ်အတွင်း ထည့်ထားသော ဗုံးများ ဖြစ်ကြောင်း ဆိုသည်။
ပြီးခဲ့သည့် ၂၀၂၃ စက်တင်ဘာလ ၂၇ ရက်တွင်လည်း လားရှိုးမြို့ရှိ Denko စက်သုံးဆီဆီုင်အတွင်း ဆိုင်ကယ်တူးဘောက်ထဲမှ ဗုံးပေါက်ကွဲမှုကြောင့် ပြည်သူ ၂ ဦးသေဆုံးပြီး ၁၀ ဦးကျော် ထိခိုက်ဒဏ်ရာရရှိခဲ့သည်။
လားရှိုးမြို့ ဒေသခံတစ်ဦးက “လားရှိုးမြို့မှာ ဘယ်သူ့မှလုံခြုံရေး ကောင်းကောင်းမလုပ်ပေးနိုင်ဘူး။ လုံခြုံရေး လုံးဝမရှိဘူး။ များသောအားဖြင့်တော့ အပြင်ကလူတွေဝင်လာများလို့ အခုလို ဒုစရိုက်တွေက များလာတာပေါ့။ အဲ့ဒီလိုဗုံးလာထောင်တဲ့သူတွေလည်း ပိုက်ဆံလာတောင်းတာ မရလို့ အခုလိုလုပ်ကြ တာလို့ယူဆတယ်” ဟု ပြောသည်။
လားရှိုးမြို့နယ်တွင် စစ်ကောင်စီတပ်ဖွဲ့အပြင် ပြည်သူ့စစ်အဖွဲ့၊ တိုင်းရင်းသားလက်နက်ကိုင်များ ဖြစ်ကြသည့် SSPP/SSA၊ TNLA ၊ MNDAAစသည့်ဖြင့် လက်နက်ကိုင်တပ်ဖွဲ့များ လှုပ်ရှားနေသည်။
သို့သော် လားရှိုးမြို့ပေါ်တွင် မကြာခဏ ဖြစ်ပွားနေသည့် ဗုံးပေါက်ကွဲမှု၊ ခိုးဆိုးလုယက်မှု၊ ဓားပြတိုက်မှုနှင့် ဆက်စပ်သူ တရားခံများကို သက်ဆိုင်ရာ လက်နက်ကိုင်အဖွဲ့အစည်းမှ ဖမ်းဆီးဆောင်ရွက်ပေးခြင်း မရှိကြောင်း၊ အဆိုပါ တရားခံများနှင့် လက်နက်ကိုင်အဖွဲ့အစည်းများက ဆက်စပ်နေသည်ဟု သံသယရှိကြောင်း ဒေသခံများက ပြောဆိုနေလျက်ရှိသည်။
