သျှမ်းပြည် ဆီဆိုင်မြို့တွင် ပအိုဝ်းအမျိုးသားလွတ်မြောက်ရေးတပ်မတော် PNLA၊ KNDF၊ PDF ပူးပေါင်းတပ်ဖွဲ့များနှင့် စစ်ကောင်စီတပ်၊ ပအိုဝ်းပြည်သူ့စစ်အဖွဲ့ PNA တို့အကြား တိုက်ပွဲပြင်းထန် လာမည်ကိုစိုးရိမ်၍ ဒေသခံများ ကိုယ့်နည်းကိုယ့်ဟန်ဖြင့် ထပ်မံထွက်ပြေးနေရကြောင်း သိရသည်။
ယနေ့ (ဇန်နဝါရီလ ၃၀ ရက်)မှစပြီး ဆီဆိုင်မြို့ပေါ် တိုက်ပွဲကြား ပိတ်မိနေကြသည့် ဒေသခံများသည် တိုက်ပွဲပြင်းထန် လာနိုင်သည့် အခြေအနေများကြောင့် မိမိပိုင်ဆိုင်ထားသော ပစ္စည်းဥစ္စာများကို သိမ်းဆည်းပြီး ၃ ရက်အတွင်း ထွက်ပြေးတိမ်းရှောင်ကြရန် အချင်းချင်းအသိပေးနေကြောင်း ဆီဆိုင်မြို့ဒေသခံ အမျိုးသမီး တစ်ဦးက ပြောသည်။
“အခုမြို့ပေါ်မှာတော့ ပစ္စည်းတွေသိမ်းပြီး ထပ်ပြေးနေတယ်။ တိုက်ပွဲပြင်းလာနိုင်လို့ မနေ့က စပြီး ၃ ရက်အတွင်း ပြေးရမယ်လို့ ပြောတယ်။ အချင်းအချင်းဖုန်းဆက်ပြီး ပြောလာကြတာ။ အခုကျမတို့လည်း ပစ္စည်းသိမ်းပြီး ပြေးနေပြီ။ ဘယ်ပြေးရမှန်းမသိ” ဟု ဆီဆိုင်မြို့ဒေသခံ အမျိုးသမီးတစ်ဦးက ပြောသည်။
တိုက်ပွဲကြောင့် ဆီဆိုင်မြို့ပေါ်နှင့် လွိုင်ကော်-ဆီဆိုင်ကြား ကျေးရွာများရှိ ဒေသခံများသည် ရက်သတ္တပတ် ၁ ပတ်ကျော်ကြာ တိုက်ပွဲကြား ပိတ်မိနေလျက်ရှိသည်။
ယခုကဲ့သို့ တိုက်ပွဲပြင်းထန် လာနိုင်သည့် အခြေအနေကြောင့် ၃ ရက်အတွင်း ထွက်ပြေးရမည်ဆိုသည့်အခါတွင် မနှိင်မနင်းပစ္စည်းများကို သယ်ယူရသည့်အတွက် အခက်အခဲရှိနေကြောင်း ဆီဆိုင်မြို့နယ် အသက် ၄၀ ကျော် အမျိုးသမီးတစ်ဦး က ထပ်လောင်းပြောသည်။
“အခုကဓာတ်ဆီ၊ ဒီဇယ်လည်း မရှိ။ ရှိတဲ့ဟာလည်း ရေသန့်ဘူးသေးသေးလေးပဲ ရှိတယ်။ ပစ္စည်းတွေ အများကြီးပဲ ဘယ်လိုသယ်ရမှန်းမသိဘူး။ တချို ့သယ်နိုင်တဲ့သူတွေတော့ တောင်ကြီးကိုပြေးတယ်။ ကျောက်တလုံးဘက်ကို ပြေးတယ်။ စည်နေတာမှ ပွဲလိုပဲ” ဟု၎င်းက ဆက်လက် ပြောသည်။
ပြီးခဲ့သည့် (ဇန်နဝါရီလ ၂၁ ရက်)မှစ၍ ဆီဆိုင်မြို့နယ် နော်ထော်ကျေးရွာကို စစ်ကောင်စီက လေယာဉ်ဖြင့် လာရောက်ဗုံးကြဲ တိုက်ခိုက်ဖြစ်စဉ်အပြီး ဒေသခံများသည် ထွက်ပြေးတိမ်းရှောင်ရပြီး ဖြစ်သကဲ့သို့ ယခုတစ်ခါ မြို့ပေါ်ထိ စစ်ကောင်စီတပ်စခန်း သိမ်းပိုက်နိုင်သည့်အထိ တိုက်ပွဲပြင်းထန်လာသောကြောင့် စစ်ဘေးရှောင်အပါအဝင် ဒေသခံလူဦးရေ စုစုပေါင်း ၁ သောင်းကျော် ထွက်ပြေးနေရပြီ ဖြစ်ကြောင်းသိရသည်။
အလားတူ ယနေ့ (ဇန်နဝါရီလ ၃၀ ရက်) နေ့လည် ၂ နာရီဝန်းကျင်မှစပြီး ဆီဆိုင်မြို့နယ်အတွင်း ပစ်ခတ်မှုများ ဆက်လက် ဖြစ်ပေါ်နေပြီး စစ်ကောင်စီက လေယာဉ်ဖြင့် ပျံဝဲနေလျက်ရှိကြောင်း လူမှုကယ်ဆယ်ရေး တစ်ဦးက ပြောသည်။
“ဒီနေ့လည်ပိုင်းလောက်က တိုက်ပွဲတွေ ဆက်ဖြစ်နေသေးတယ်။ အခုတိုက်ပွဲကြား ပိတ်မိနေတဲ့ သူတွေလည်း ထပ်ထွက် လာတယ်။ အန္တရာယ်ကြားထဲကပဲ တိုက်ပွဲဘယ်ချိန်ဖြစ်မယ်၊ အမြှောက်က ဘယ်ချိန်ဖြစ်မယ်၊ လေယာဉ် ဘယ်ချိန်ကြဲမယ် ဆိုတာ မသိရတဲ့အတွက် အသိစိတ်ကဦးဆောင်ပြီး ဘေးကင်းရွှေ့နေကြရတယ်” ဟု လူမှုကယ်ဆယ်ရေးတစ်ဦးက ပြောသည်။
ထို့အပြင် မိဘပြည်သူများအနေဖြင့် မလိုလားသည့် ထိခိုက်မှုများ မဖြစ်စေရန် ဆီဆိုင်မြို့အတွင်းသို့ ဝင်ရောက်ခြင်း၊ နေအိမ်ပြန်ကြည့်ခြင်း၊ ပစ္စည်းများ ပြန်သယ်ယူခြင်းများ မပြုလုပ်ကြသေးရန်နှင့် လုံခြုံဘေးကင်းသည့် နေရာများတွင် ခေတ္တခိုလှုံနေထိုင်ကြရန် PNLA မှ ယမန်နေ့ ၂၉ ရက်က တိုက်တွန်းထားသည်။
Leave a Comments