သျှမ်းပြည် တောင်ပိုင်း ဟိုပုံးမြို့နယ် မဲနယ်တောင်ဒေသ အနီးတစ်ဝိုက်ရှိ ရွာများမှ ဒေသခံများကို ပအိုဝ်းပြည်သူ့စစ် (PNO/PNA) မှ တပ်သားအဖြစ် ခေါ်ယူစုဆောင်းနေကြောင်း စုံစမ်းသိရသည်။
မဲနယ်တောင်ရှိ ရွာ အသီးသီးတွင် ရွာသူကြီးများက ဇန်နဝါရီလ ၂၇ရက်နေ့ညတွင် ဦးဆောင် အစည်းအဝေး ပြုလုပ်၍ PNO ပြည်သူ့စစ်မှ ရပ်ရွာ လုံခြုံရေးအတွက် တစ်ရွာလျှင် အမျိုးသား ၅ဦး စာရင်းပေး ခေါ်ယူခိုင်းကြောင်း ပြောကြားခဲ့ကြောင်း မဲနယ်တောင် ဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်.
“ရွာလူကြီး ပြောတာတော့ ကိုယ့်ဒေသ၊ကိုယ့်ရွာကို ချစ်တယ်ဆိုရင် ပါဝင်ရမယ်လို့ ပြောတယ်။ လောလောဆယ်တော့ လူကြီး၊ လူငယ် ၅ယောက်တော့ ရွေးထားတယ်။ ရပ်ရွာကို လုံခြုံအောင် ကာကွယ်ဖို့ အရင်ဆုံးတော့ သူတို့တာဝန်က ကင်းစောင့်ဖို့လို့ ပြောတယ်။ ကျနော်တို့ရွာတော့ စာရင်း အရင် ပေးထားရတာ၊ သူများရွာက ကလေးတွေတော့ သွားနေရပြီ ပြောတယ်” ဟု မဲနယ်တောင် ဒေသခံ အမျိုးသားတစ်ဦးမှ ပြောသည်။
ကျေးရွာအတွင်း အလှည့်ကျ ကင်းစောင့်သူများမှာ အစောပိုင်းကတည်းက ရှိပြီးသား ဖြစ်သော်လည်း လုံခြုံမှုအားနည်းနေ၍ တင်းတင်းကြပ်ကြပ် ကင်းစောင့်နိုင်ရန် လူထပ်မံ ခေါ်ခြင်း ဖြစ်သည်ဟု PNO ပြည်သူ့စစ်မှ ပြောကြောင်း အဆိုပါ အမျိုးသားမှ ထပ်မံပြောသည်။
ယခုကဲ့သို့ ဟိုပုံး-ဆီဆိုင်ကြားရှိ ဒေသများတွင် တိုက်ပွဲများ ဖြစ်ပွားနေချိန် PNO/PNAမှ လူများ ခေါ်ယူစုဆောင်းခိုင်းနေသဖြင့် ရွာသားများ ထိတ်လန့် စိုးရိမ်နေကြောင်းလည်း သိရှိရသည်။
“အခုက ကင်းစောင့်ခိုင်းမယ် ဆိုပေမယ့် တိုက်ပွဲဖြစ်လာပြီဆိုရင် စစ်မှုထမ်းခိုင်းမယ့် သဘောဖြစ်နေတယ်။ စစ်မှုထမ်းရမယ် ဆိုရင်လည်း ရပ်ရွာအေးချမ်းနေတုန်း စစ်သင်တန်း သေချာပေးပြီး ရပ်ရွာ စောင့်ရှောက်ခိုင်းရင် လုပ်နိုင်တယ်။ အခုလို တိုက်ပွဲ ဖြစ်နေတဲ့ အချိန်မှာ လာခေါ်နေတော့ ထိတ်လန့်တာပေါ့” ဟု ၎င်း ဒေသခံ အမျိုးသားမှ ထပ်မံပြောပြသည်။
ထိုကဲ့သို့ စစ်သားစုဆောင်တဲ့အပေါ် သားရှင် မိခင်များက လည်း သားစစ်မှု ထမ်းရမည်ကို စိုးရိမ်ကြောင်း မသွားစေချင်ကြောင်းလည်း သိရသည်။
“ကျမရဲ့သား စစ်မှုထမ်းဖို့ လာကောက်တဲ့ချိန် ပါသွားမှာကြောက်တယ်။ မသွားစေချင်ဘူး။ မပေးသွားချင်ဘူး။ တစ်ခုခုဖြစ်သွားရင် ဘယ်သူက တာဝန်ယူမှာလဲ။ အဲတာတွေးပြီး အိပ်လို့တောင် မပျော်ဘူး” လို့ ဒေသခံ အမျိုးသမီးတစ်ဦးက ပြောသည်။
မဲနယ်တောင်မှ ရွာအချို့တွင် တစ်အိမ်တစ်ယောက် လူခေါ်ယူနေပြီး ရပ်ရွာကာကွယ်ရေးအတွက် သေနတ်ဝယ်ယူရန် တစ်အိမ်တစ်သိန်း ထည့်ရမည်ဟုလည်း PNOမှ ပြောကြောင်း ဒေသခံများထံမှ သိရသည်။
လက်ရှိအချိန်တွင် ဟိုပုံးမြို့နယ် မဲနယ်တောင်တစ်ကျောရှိ ရွာများတွင်သာ လူစုဆောင်းခိုင်းလျက် ရှိပြီး ဟိုပုံးမြို့ပေါ်ထိတော့ လူများလာရောက်စုဆောင်းနေခြင်း မရှိသေးကြောင်း သိရှိရသည်။
ဆီဆိုင်မြို့တွင် ပအိုဝ်းအမျိုးသား လွတ်မြောက်ရေးတပ်မတော်(PNLO/PNLA)၊ မဟာမိတ်အဖွဲ့များနှင့်စစ်ကောင်စီ၊ စစ်ကောင်စီလက်အောက်ခံ ပအိုဝ်းပြည်သူ့စစ်(PNO/PNA)တို့ကြား တိုက်ပွဲများ ပြင်းထန်စွာ ဖြစ်ပွားနေပြီး နီးစပ်ရာမြို့များတွင်လည်း တိုက်ပွဲများ ကူးစက်ဖြစ်ပွားလာနိုင်သည့်အတွက် စစ်ကောင်စီနှင့် PNOမှ ဟိုပုံး၊ တောင်ကြီးမြို့များတွင် စစ်ရေးအရ ပြင်ဆင်မှုများ စတင် လုပ်ဆောင်နေပြီ ဖြစ်သည်။
