Sunday, July 21, 2024

ဆီဆိုင်မြို့တိုက်ပွဲ စစ်ကောင်စီ လက်နက်ကြီး၊ လေကြောင်း တိုက်ခိုက် ဘုန်ကြီးကျောင်းနှင့် အဆောက်အဦး ထိခိုက်ပျက်စီးမှုများ

Must read

သျှမ်းပြည် ဆီဆိုင်မြို့နယ်အတွင်း ဖြစ်ပွားနေသည့် တိုက်ပွဲတွင် စစ်ကောင်စီဘက်မှ လက်နက်ကြီး၊ လေကြောင်းပစ်ခတ်မှုကြောင့် ကျေးရွာဘုန်းကြီးကျောင်းများနှင့် အရပ်သားနေအိမ် အများအပြား ထိခိုက်ပျက်စီးသွားကြောင်း စုံစမ်းသိရသည်။

ပြီးခဲ့တဲ့ (ဇန်နဝါရီလ ၂၃ ရက်) မှစပြီး ဆီဆိုင်မြို့ပေါ်တွင် ပအိုဝ်းအမျိုးသား လွတ်မြောက်ရေးတပ်မတော် PNLA ၊ KNDF ၊PDFပူးပေါင်းတပ်ဖွဲ့များနှင့် စစ်ကောင်စီတပ်၊ ပအိုဝ်းပြည်သူ့စစ် PNO တပ်တို့အကြား တိုက်ပွဲ စတင်လာခဲ့သည်။

ထို့နောက် စစ်ကောင်စီသည် တော်လှန်ရေးတပ်ဖွဲ့များနှင့် တိုက်ပွဲဖြစ်ပွားရာနေရာကို လက်နက်ကြီးအပါအဝင် လေကြောင်းဖြင့် ဗုံးကြဲတိုက်ခိုက်မှုကြောင့် ဒေသခံ ဘုန်းကြီးကျောင်းအပါအဝင် နေအိမ်၊ အဆောက်အဦးများ ပျက်စီးသွားကြောင်း ဆီဆိုင်မြို့နယ် ကယ်ဆယ်ရေးအသင်းအဖွဲ့ဝင်တစ်ဦးက ပြောသည်။

“အခုတိုက်ပွဲထဲမှာ ဘုန်းကြီးကျောင်းတွေ ပျက်စီးတာတို့၊ ရွာထဲကို လက်နက်ကြီး ကျတာတို့ ရှိပါတယ်။ လက်နက်ကြီးကျလို့ ကောင်းမှုဗွာရွာက ဘုန်းကြီးကျောင်း ခေါင်မိုးပေါက်သွားတယ်။ ဆီဆိုင်မြို့ပေါ်က ဘုန်ကြီးကျောင်းနှစ်ကျောင်းလည်း လက်နက်ကြီး ကျလို့ပျက်စီးသွားတယ်။ အဓိကတော့ လေယာဉ်နဲ့ လက်နက်ကြီးကျတဲ့အချိန်မှာဘဲ ပျက်စီးမှုများတယ်” ဟု ၎င်းကပြောသည်။

အလားတူ (ဇန်နဝါရီလ ၂၂ ရက်) တွင် ဆီဆိုင်မြို့နယ် PNLOဗဟိုဌာနချုပ် အဝန်းအပိုင်းရှိ နောင်ထော် ကျေးရွာကို တိုက်ပွဲဖြစ်ပွားခြင်းမရှိဘဲ စစ်ကောင်စီက လေယာဉ်ဖြင့် လာရောက်ဗုံးကြဲတိုက်ခိုက် သောကြောင့် အမျိုးသား ၁ ဦး ဒဏ်ရာရပြီး အဆောက်အဦးများ ပျက်စီးခဲ့သွားသည်။

သျှမ်းသံတော်ဆင့်မှ သီးခြားကောက်ယူထားသည့် စာရင်းမှတ်တမ်းအရ ဇန်နဝါရီလ ၂၂ ရက်မှ ယနေ့ ဇန်နဝါရီလ ၂၈ ရက်အထိ ဆီဆိုင်မြို့နယ် တိုက်ပွဲကြားမှာ လက်နက်ကြီးအပါအဝင် လေကြောင်း တိုက်ခိုက်မှုကြောင့် ပြည်သူ (၂) ဦးသေဆုံးပြီး အမျိုးသား ၁ ဦးနှင့် အမျိုးသမီး ၁ ဦး ဒဏ်ရာရှိခဲ့သည်။

ဆီဆိုင်မြို့နယ်ကို PNLAနှင့် ပူးပေါင်းတပ်ဖွဲ့တို့ ထိုးစစ်ဆင်တိုက်ခိုက်နေစဉ် ရက်သတ္တပတ် ၁ ပတ်အတွင်း စစ်ကောင်စီ မြို့မရဲစခန်းအပါအဝင် တပ်စခန်းနှင့် ဆီဆိုင်မြို့ကို ထိန်းချုပ်နိုင်ပြီဖြစ်ကြောင်း ယနေ့ (ဇန်နဝါရီလ ၂၈ ရက်)တွင် ကြေညာထားသည်။

“သိမ်းပိုက်နိုင်တယ်ဆိုတာတော့ သတင်းတစ်ခုပဲ ဖြစ်မှာပါ။ ဒီနေ့မနက်ကစပြီး ဆီဆိုင်မြို့ပေါ်မှာ ပစ်ခတ်သံ တွေကြားနေရပြီ။ စစ်ကောင်စီဘက်ကလည်း လက်နက်ကြီးနဲ့ လေယာဉ်နဲ့ ဗုံးကြဲနေတုန်းပဲ” ဟု ဆီဆိုင်မြို့နယ် ဒေသခံတစ်ဦးက ပြောသည်။

ယင်းကဲ့သို့ တိုက်ပွဲဆက်လက် ပြင်းထန်နေသောကြောင့် ဆီဆိုင်-လွိုင်ကော်လမ်းတကြောရှိ ကျေးရွာများမှ ဒေသခံနှင့် စစ်ဘေးရှောင်များလည်း ပိတ်မိနေလျက်ရှိသည်။ ထိုကဲ့သို့ တိုက်ပွဲကြား ပိတ်မိနေသူများကို ကယ်ထုတ်ရန်အတွက် အချိန်အကန့်အသတ်ဖြင့် မြို့ဝင်ခွင့်ပေးရန် လိုအပ်ကြောင်း ဆီဆိုင်မြို့နယ် လူမှုကယ်ရေးအဖွဲ့မှ တောင်းဆိုထားသည်။

ပြီးခဲ့တဲ့ ဇန်နဝါရီလ ၂၁ ရက်က ဆီဆိုင်မြို့နယ် PNLOတို့ဌာနချုပ် ဗဟိုဌာနချုပ် အဝန်းအပိုင်းရှိ နော်ထော်ကျေးရွာကို တိုက်ပွဲဖြစ်ပွားခြင်းမရှိဘဲ စစ်ကောင်စီက လေယာဉ်ဖြင့် လာရောက်ဗုံးကြဲ တိုက်ခိုက်ချိန်မှစ၍ လက်ရှိအချိန်ထိ တိုက်ပွဲဖြစ်ပွားရာဒေသကို စစ်ကောင်စီက လက်နက်ကြီးအပါအဝင် လေယာဉ်ဖြင့် ဗုံးကြဲတိုက်ခိုက်မှု ပြုလုပ်နေသည်။

Leave a Comments

- Advertisement -spot_img

Latest article