Monday, July 22, 2024

ဆီဆိုင်မြို့နယ် အခြေစိုက် ခမရ (၄၂၃) နှင့် (၄၂၄) တပ်ရင်းကို PNLA ပူးပေါင်းတပ် တိုက်ခိုက်သိမ်းပိုက်

Must read

သျှမ်းပြည် ဆီဆိုင်မြို့နယ် အခြေစိုက် စစ်ကောင်စီ စကခ (၇) လက်အောက်ခံ ခမရ (၄၂၃) နှင့် ခမရ( ၄၂၄) တပ်ရင်းတို့ကို ယနေ့ (ဇန်နဝါရီလ ၂၅ ရက်) တွင် PNLA ပူးပေါင်းတပ်များ တိုက်ခိုက်သိမ်းပိုက်လိုက်ကြောင်း တပ်တွင်းသတင်းရင်းမြစ်က အတည်ပြုသည်။

PNLO

တိုက်ခိုက် သိမ်းပိုက်ခံရသည့် ခမရ (၄၂၃) တပ်ရင်းတွင် အရာရှိ ၂ ဦးနှင့် စစ်သားအင်အား ၄၅ ဦး ရှေ့တန်းထွက်နေပြီး တပ်ရင်းတွင် စစ်သား အင်အား ၅၀ သာရှိကြောင်း၊ ခမရ (၄၂၄) တပ်တွင် အရာရှိ ၂ ဦးနှင့် စစ်သားအင်အား ၄၃ ဦး ရှေ့တန်းထွက်နေပြီး တပ်ရင်းအတွင်း စစ်သားအင်အား ၄၂ ဦးသာ ကျန်ရှိကြောင်း ၎င်းကဆိုသည်။

“တပ်ရင်းတွေ သိမ်းတာအတည်ပြုလို့ ရပါတယ်။ အသေးစိတ်ကတော့ မသိရသေးပါဘူး” ဟု သတင်းရင်းမြစ်က ဆက်ပြောသည်။

ယမန်နေ့ (ဇန်နဝါရီလ ၂၄ ရက်) တွင် ဆီဆိုင်မြို့ပေါ်တွင် ပစ်ခတ်မှု ဖြစ်ပွားခဲ့ပြီး နောက် ညပိုင်းတွင် စစ်ကောင်စီ လေကြောင်းက ဗုံးကြဲ တိုက်ခိုက်သဖြင့် မြို့ခံ ပြည်သူ ၂ ဦး သေဆုံးခဲ့ကြောင်း မြို့ခံများက ဆိုသည်။

ယနေ့ PNLA ပူးပေါင်းတပ်များက ဆီဆိုင်မြို့မရဲစခန်း၊ အပါအဝင် ဌာနဆိုင်ရာရုံးများကို ထိန်းချုပ်ထားပြီး PNO ပအိုဝ်း ပြည်သူ့စစ်များ ဆုတ်ခွာသွားသည်ဟု မြို့ခံတစ်ဦးက ပြောသည်။

“ရဲစခန်း သိမ်းထားပြီ။ မနေ့ညကနေ ဒီနေ့အထိ လေယာဉ်နဲ့ ဗုံးကြဲတယ်၊ မြို့ကလူ အကုန်ထွက်ပြေးပြီ၊ ပိတ်မိသူတွေလည်း ရှိသေးတယ်” ဟု ၎င်းကဆက် ပြောသည်။

ယနေ့ ဆီဆိုင်ဒေသတွင် လက်နက်ကြီး လက်နက်ငယ်ပစ်ခတ်သံများ ဆက်တိုက်ထွက်ပေါ်နေသကဲ့သို့ မြို့နယ်အတွင်း ကျေးရွာများမှ ပြည်သူများလည်း တောင်ကြီးမြို့ဘက်သို့ ထွက်ပြေး တိမ်းရှောင်နေကြကြောင်း သိရသည်။

Leave a Comments

- Advertisement -spot_img

Latest article