သျှမ်းပြည် ကွတ်ခိုင်မြို့နယ် နမ့်ဖတ်ကာအခြေစိုက် စစ်ကောင်စီတပ် လက်အောက်ခံ ခြေလျင်တပ်ရင်း (ခလရ-၁၂၃) တပ်ရင်း ကချင်လွတ်လပ်ရေးတပ်မတော် ( KIA) က အပြီးသတ်သိမ်းပိုက်နိုင်ခဲ့ကြောင်း စုံစမ်းသိရသည်။

ယမန်နေ့ (ဇန်နဝါရီလ ၂၄ ရက်) ညနေ ၃ နာရီကျော်တွင် ကွတ်ခိုင်မြို့နယ် နမ့်ဖတ်ကာရှိ စစ်ကောင်စီလက်အောက်ခံ ခလရ-၁၂၃ တပ်ရင်းကို ကချင်လွတ်မြောက်ရေးတပ်မတော် KIA က အပြီးသတ် ဝင်ရောက်သိမ်းပိုက်နိုင်ခဲ့ကြောင်း KIAတပ်ဖွဲ့ ပြောရေးဆိုခွင့်ရှိသူ ဗိုလ်မှူးကြီးနော်ဘူက သျှမ်းသံတော်ဆင့်ကို အတည်ပြုသည်။

“ကျနော်တို့ ကြားရတာကတော့ မနေ့က ဇန်နဝါရီ ၂၄ ရက်နေ့ မှာ အပြီးအပိုင် သိမ်းလို့ရပြီဆိုတဲ့ သတင်းလောက်ပဲ ကျနော်တို့ ကြားပါတယ်။ အချက်အလက်တွေပေါ့နော် မြေပြင်သတင်းတွေ ဘာမှမကြားဘူးပေါ့”ဟု KIAတပ်ဖွဲ့ ပြောရေးဆိုခွင့်ရှိသူ ဗိုလ်မှူးကြီးနော်ဘူက သျှမ်းသံတော်ဆင့်ကို အတည်ပြု ပြောဆိုသည်။

လက်ရှိတွင် သိမ်းပိုက်ရရှိထားသည့် နမ့်ဖက်ကာ ခလရ-၁၂၃ ကို နယ်မြေရှင်းလင်းရေး ဆက်လက်လုပ်ဆောင်နေပြီး KIA တပ်ဖွဲ့က ပစ်ချနိုင်ခဲ့သည့် လေယာဉ်ဓာတ်ပုံများကို လတ်တလော ထုတ်ပြန်ရန်မရှိသေးကြောင်း ဗိုလ်မှူးကြီးနော်ဘူက သျှမ်းသံတော်ဆင့်ကို ဆက်ပြောသည်။

ပြီးခဲ့သည့် ဇန်နဝါရီလ ၁၆ ရက်တွင် ကွတ်ခိုင်မြို့နယ် နမ့်ဖတ်ကာကျေးရွာကို လာရောက်ဗုံးကြဲတိုက်ခိုက်သည့် စစ်ကောင်စီတပ်၏ ဂျက်ဖိုက်တာ လေယာဉ်တစ်စီးကို ကချင်လွတ်မြောက်ရေးတပ် (KIA)က နမ့်ဖတ်ကာအနီး မနော်ယာန်တွင် ပစ်ချနိုင်ခဲ့ပြီး နှစ်ဘက်ထိတွေ့တိုက်ပွဲ ဆက်တိုက်ပြင်းထန်ခဲ့ကြောင်း နမ့်ဖတ်ကာဒေသခံများထံမှ သိရသည်။

နမ့်ဖတ်ကာအခြေစိုက် ခလရ-၁၂၃ တပ်စခန်းကို KIA တပ်ဖွဲ့က ၂၀၂၃ ဒီဇင်ဘာလ နောက်ဆုံးပတ်မှ စတင်ထိုးစစ်ဆင် တိုက်ခိုက်ခဲ့ပြီးနောက် တစ်လအကြာတွင် အပြီးသတ် သိမ်းပိုက်နိုင်ခဲ့ခြင်း ဖြစ်သည်။

နမ့်ဖတ်ကာတိုက်ပွဲ တစ်လကျော်အတွင်း စစ်ကောင်စီတပ်၏ လက်နက်ကြီးနှင့် လေကြောင်းတိုက်ခိုက်မှုများကြောင့် အရပ်သား ၁၀ ဦးထက်မနည်း ထိခိုက်သေဆုံးခဲ့ပြီး ပြည်သူနေအိမ် အများအပြား ပျက်စီးဆုံးရှုံးခဲ့ကြောင်း နမ့်ဖတ်ကာဒေသခံများက ပြောသည်။

အလားတူ ယမန်နေ့ (ဇန်နဝါရီလ ၂၄ ရက်) တစ်ရက်တည်းတွင် ကွတ်ခိုင်မြို့နယ် နမ့်ဖတ်ကာကျေးရွာသို့ စစ်ကောင်စီတပ်မှ Jet Fighter ဖြင့် (၇)ကြိမ်၊ Mi35 ဖြင့် (၃)ကြိမ်၊ Y12 ဖြင့် (၁၁)ကြိမ်၊ ဗုံး (၁၀၁) လုံး နှင့် ဖျက်အားပြင်း ပေါင် (၅၀၀)ဗုံး (၃)လုံးဖြင့် လာရောက်တိုက်ခိုက်ခဲ့ကြောင်း TNLA တပ်ဖွဲ့ကလည်း ထုတ်ပြန်ထားသည်။

“၁၀၂၇ စစ်ဆင်ရေး” ဆင်နွှဲနေသည့် ညီနောင်မဟာမိတ် ၃ ဖွဲ့တို့သည် စစ်ကောင်စီနှင့် သျှမ်းမြောက်တွင် ယာယီအပစ်အခတ် ရပ်စဲပြီးနောက် KIA တပ်ဖွဲ့က မိုးမိတ်နှင့် မဘိမ်းမြို့နယ်များရှိ စစ်ကောင်စီတပ်စခန်းများကို ထိုးစစ်ဆင်တိုက်ခိုက်ခဲ့ပြီး မြို့ ၂ မြို့ကိုလည်း သိမ်းပိုက်ထိန်းချုပ်ထားသည်။