သျှမ်းပြည် ညောင်ရွှေမြို့နယ် အင်းလေးဒေသကို အင်းလေးပြည်သူ့ကာကွယ်ရေးတပ်ဖွဲ့ IPDF တို့ စတင် အခြေချနေပြီဖြစ်ကြောင်း ယမန်နေ့ ဇန်နဝါရီလ ၂၃ ရက်တွင် အင်လေးလူထုလှုပ်ရှားမှုအဖွဲ့များမှ ထုတ်ပြန်ထားသည်။
ပြီးခဲ့သည့် ၂၀၂၃ ဒီဇင်ဘာလ ၁၁ ရက် သျှမ်း-ကရင်နီ (ကယား)ပြည်နယ်စပ် ဖယ်ခုံမြို့ရှိ အင်းအရှေ့ခြမ်း ဆောင်နန်းခဲစခန်းကို တော်လှန်ရေးတပ်များ သိမ်းယူလိုက်ပြီဖြစ်သကဲ့သို့ ညောင်ရွှေမြို့နယ် တောင်ဘို့ကွဲ၊ ဟိုပန်နှင့် ညောင်လေးပင်ကျေးရွာ၊ ပင်လောင်းမြို့နယ် နမ့်တုတ်၊ ကုန်းသာ၊ အိမ်မူရွာတွင်လည်း တော်လှန်ရေးတပ်ဖွဲ့များ ရောက်ရှိနေပြီး အင်လေးဒေသကိုလည်း IPDF တပ်ဖွဲ့အနေဖြင့် စတင်အခြေချနေပြီဟု ရေးသားဖော်ပြထားသည်။
အလားတူ ၂၀၂၃ ဒီဇင်ဘာလ ၁၈ တွင် အင်းလေးထိုးဖေါက် တိုက်ခိုက်ရေးအထူးအဖွဲ့ (ဓားမကူး)တပ်မှ စစ်ကောင်စီလက်အောက်ခံ အင်းလေးဗျူအဖွဲ့ခေါင်းဆောင် ၁ ဦးနှင့် ဗျူအဖွဲ့ဝင်တချို့ကို မင်းချောင်းရွာအနီးတွင် ပစ်ခတ်ခဲ့ကြောင်း ဆိုသည်။
ထို့အပြင် အင်းလေးဒေသအတွင်းရှိ စစ်အာဏာရှင်ဆန့်ကျင်ရေး အင်အားစုများကို စုစည်း၍အနာဂတ် အင်းလေးဒေသအရေးနှင့် ပြည်ထောင်စုအရးအရာကိစ္စများကို ဦးဆောင်ဦးရွက်ပြုနိုင်သည့် အင်းလေး အတိုင်ပင်ခံကောင်စီ ပေါ်ပေါက်ရေးဆက်လက်ကြိုးပမ်းဆောင်ရွက်သွားမည်ဟု ကြေညာထားသည်။
အင်းလေးဒေသတွင် အင်းလေးပြည်သူ့ကာကွယ်ရေးတပ် (IPDF)၊ အင်းလေးဖက်ဒရယ်ဒီမိုကရေစီလှုပ်ရှားမှု (IFDM)၊ အင်းလေးအမျိုးသမီး သမဂ္ဂ (IWU) တို့အပြင် အင်လေးထိုးဖောက်တိုက်ခိုက်ရေး အထူးအဖွဲ့ (ဓားမကူး)နှင့် လူထုအတွက်တရားမျှတမှုဆောင်ရွက်ရေးအဖွဲ့ -အင်းလေး (JMC-Innlay) စသည့်ဖြင့် အဖွဲ့အစည်းများရှိသည်။
တစ်ဖက်တွင် အင်းလေးဒေသမှာ စစ်ကောင်စီတပ်ဖွဲ့နှင့် ပအိုဝ်းပြည်သူ့စစ် PNO တို့ လှုပ်ရှားနေပြီး စစ်ကောင်စီမှ ဖွဲ့စည်းထားသော ဗျူစောထီးတပ်ဖွဲ့များလည်း ရှိသည်။
Leave a Comments