သျှမ်းပြည် ဆီဆိုင်မြို့နယ်အတွင်း အာဏာသိမ်း စစ်ကောင်စီ တပ်ဖွဲ့၏ တပ်စခန်းများကို ပအိုဝ်းအမျိုးသား လွတ်မြောက်ရေး အဖွဲ့ချုပ် (PNLO) က ဝင်ရောက်သိမ်းပိုက်နိုင်ခဲ့ကြောင်း စုံစမ်းသိသည်။

ယမန်နေ့( ဇန်နဝါရီလ ၂၃) ရက်နံနက်ပိုင်းတွင် အာဏာသိမ်းစစ်ကောင်စီ၏ တပ်စခန်းများ ဖြစ်ကြသည့် ဆီဆိုင်မြို့နယ်၊ နောင်ထော်ရွာ အရှေ့ဘက် နှင့် တောင်ဘက်ရှိ စစ်ကောင်စီတပ်စခန်း နှစ်နေရာ နှင့် နောင်ထော်ရွာအနီး ရှိ စစ်တပ်နှင့် ၎င်းတို့၏ လက်အောက်ခံ PNA တို့၏ တပ်စခန်းတို့ကို PNLO/PNLA မှ ဝင်ရောက်သိမ်းပိုက်နိုင်ခဲ့ကြောင်း တပ်ဖွဲ့မှ တာဝန်ရှိ ပုဂ္ဂိုလ်တစ်ဦးက သျှမ်းသံတော်ဆင့်ကို ပြောသည်။

“တပ်စခန်းလေးနေရာကို ကျနော်တို့ PNLO နဲ့ ပူးပေါင်းတပ်ဖွဲ့ကနေ ဝင်ရောက် ထိန်းချုပ်နိုင်ခဲ့ပြီလို့တော့ သတင်းသိရပါတယ်။ ဒါပေမဲ့ မြေပြင် အခြေအနေရဲ့ အသေးစိတ်ကိုတော့ မသိရသေးဘူး” ဟု PNLO/PNLA မှ ဝာာဝန်ရှိ ပုဂ္ဂိုလ်တစ်ဦးက သျှမ်းသံတော်ဆင့်ကို ပြောသည်။

အဆိုပါ စစ်ကောင်စီ၏ တပ်စခန်းနေရာများကို ထိတွေ့တိုက်ပွဲဖြစ်ပွားခြင်း မရှိဘဲ ထိန်းချုပ်ရရှိနိုင်ကြောင်းကို လည်း အထက်ပါ တာဝန်ရှိ ပုဂ္ဂိုလ်က သျှမ်းသံတော်ဆင့်ကို ဆက်လက် ပြောဆိုထားသည်။

“ကျနော်သိရသလောက်တော့ လက်ရှိ နောင်ထော်ထဲမှာက ထိတွေ့တိုက်ပွဲ မရှိသေးဘူး။ ခုလို စကစ စခန်းကို သိမ်းပိုက် ထိန်းချုပ်နိုင်တယ်ဆိုတာကလည်း စကစတွေက သူတို့ တပ်စခန်းကို စွန့်ခွာ ထွက်ပြေးလို့လား ဘာလား ဆိုတာ မြေပြင်ကို ပြန်မေးဖို့ လိုအပ်အုံးမယ်။ ကျနော် တိတိကျကျတော့ မသိရဘူး” ဟု အထက်ပါ တာဝန်ရှိ ပုဂ္ဂိုလ်က ဆက်လက်ပြောဆိုထားသည်။

ပြီးခဲ့သည့် ဇန်နဝါရီလ ၂၂ ရက်တွင် ဆီဆိုင်မြို့ အခြေစိုက် စစ်ကောင်စီ တပ်များဖြစ်ကြသည့် စစ်ကောင်စီ ခြေမြန်တပ်ရင်း ခမရ ၄၂၄ ၊ ၄၂၃ နှင့် တခြား တပ်ကင်းစခန်းတို့ရှိ တပ်မိသားစုတင်များသည် တောင်ကြီးမြို့ ပေါ်သို့ ပြောင်းရွှေ့ ထွက်ခွာသွားကြကြောင်းလည်း သျှမ်းသံဝောာ်ဆင့်က စုံစမ်းသိရသည်။

အဆိုပါ ဇန်နဝါရီလ ၂၂ ရက်တွင်လည်း ဆီဆိုင်မြို့နယ်၊ နောင်ထော်ကျေးရွာအတွင်း ထိတွေ့တိုက်ပွဲ ဖြစ်ပွားခြင်း မရှိဘဲ စစ်ကောင်စီဘက်မှ လေကြောင်းလိုင်းဖြင့် ဗုံးကြဲတိုက်ခိုက်မှုကြောင့် နောင်ထော်ကျေးရွာအတွင်းမှာ အရပ်သားနေအိမ်များ ထိခိုက်ပျက်စီးခြင်း၊ စစ်ဘေးရှောင်များ ထိခိုက်သေဆုံးခြင်းတို့ ရှိနေကြောင်းလည်း သိရသည်။

နောင်ထော်ကျေးရွာသည် သျှမ်း – ကယားနယ်စပ် ဆက်သွဘ်ထားသည့် လမ်းကြောင်းလည်း ရှိနေသည့် အလျှောက် ကရင်နီမှ စစ်ဘေးရှောင်များစွာ ခိုလှုံနေထိုင်သည့် ကျေးရွာလည်း ဖြစ်နေသည်။

လက်ရှိ အချိန်၌လည်း ဆီဆိုင်မြို့နယ်၊ နောင်ထော်ကျေးရွာအတွင်း၌ အာဏာသိမ်း စစ်ကောင်စီ နှင့် ၎င်းတို့၏ လက်အောက်ခံ PNO ပြည်သူ့ စစ်တပ်တပ်ဖွဲ့ နှင့် PNLO/PNLA တပ်တို့က စစ်ရေး တင်းမာနေလျက်ရှိသည့် အတွက် ဒေသခံများကလည်း ဆီဆိုင်မြို့ပေါ် ၊ တောင်ကြီးမြို့ပေါ်သို့ စစ်ရှောင်ထွက်ပြေး နေကကကြောင်းလည်း စုံစမ်းသိရသည်။